Miphun Damnak Caah

Bawipa cu nanmah khamh awkah a kut a tawi lo, bawmhnak nan halmi theihnak caah a hna a chet lo. An theih hna lo cu nan sualnak ruangah a si. Biak nan timh tikah amah sin phanh an dawntu hna cu nan sualnak kha a si. Lih nan chim, nan puar i lai nan nawn. Isaiah 59: 1-3
 

Rev. Chan Hnin

Hi bantukin kan biakmi kan Pathian a thatnak le a thawngthabia phuan khawhnak can tha ka hmuh caah Bawipa min ka thangthat ko.

Isaiah 59:1 hi kan rel tikah a rel a nuam ngai i kan caah thazang tampi a kan pekmi Pathian bia a si. Zeicahtiah Pathian thawnnak, a thil ti khawhnak a langhter caah a si. vs2 le vs3 hi cu a rel a nuam lem ti lo. Zeicahtiah minung sualnak a langhter caah a si. Cucaah Isaiah 59:1-3 nihhin thil pahnih a langhter tiah ka hmuh.

01. Pathian leikap:

A kut a tawi lo..... A saunak a langhtermi a lo ko nain kan biakmi kan Pathian a kut caknak, a thil ti khawh thawnnak le a riantuannak a tlai, a tuan manh lo timi a ngeih lo zia kha a langhtermi a si.

A hna a chet lo..... Jer. 33:3 ah " nan ka auh ahcun kan leh hna lai" a ti. Zei bantuk dirhmun, khuaika hmun in kan auh hmanhah a auhtu vialte a lehtu kan Pathian a si. A hna a chetmi cu auh zongah zeihmanh a tha hnem lo. A hna a tha ko hmanh ah kan auh tikah a kan chawnh duh lo ahcun zei bia hmanh chim awk a tha lo. Pakhat le pakhat kan i chawnh tikah a herhmi kan in chim i rian tlam a tling. Pathian nih kan auhnak aw a thei i a kan leh tikah kan herhmi rian tlam a tling tinak a si. Cucu Pathian leikap a si. Hi zawn ah tehte khan ka duhmi a um.

1993 kum ahkhan Kalay myo ah Sianginn kai dingin ka tum. Thlahnih deng ka um hnu ah Hnaringah Sianginn thialnak ca (congpianglehmat) kan lak kholo, hung kir seh tiah an rak ka ti. Phaisa tlawmpal kaa phorhmi cu a herhmi ka cawk dih cang i ka kut ah Ks.180 lawng a tang. Kalay-Hakha maawtaw man cu Ks. 200 a si i, lampi ah rawl voikhat ei ah Ks. 60 a si. Ks. 260 ngeih longah Hakha phan ding  asi. Ka hawile nih kal rih hlah, phaisa hmanh a um lo hi, an ka ti ko nain kal kaa tim thiamthiam. Zingkate ka tho i inn hmai, inntual vawlei ah khupbil in thla ka cam. Bawipa, ka zangfah ko, nihin Hakha ka phakter hram ko. Ka phaisa hi mah zat long a si tiah ka ti. RTC mawtaw cu ka kai. Tainging khua hrawng kan phak ahkhin motor hnuzulh pahnih nih RTC mawtaw cung i a kamlei ah a kulh in a thumi hna
kha mawtawman an van hal thluahmah hna. An ka hal ahcun Ks. 150 ka pek hna lai i Falam ah ka tum ko lai tiah ka lungthli tein kaa ruah. Kehlei in a van halmi pa nih keimah changtupa tiang a van hal ah a kir. A zei ka ti. Orhleipa cu a van hal thluahmah i ka pongte ah a thumi pa a van hal cang khan cun ka lung cu a tur htluahmah ve cang. Ruah lopi ah a ka kir tak ko ai. Halelujah tiin fak pi in au ka duhning cu a mak ko. Ka au ahcun an ka thei lai i hal than ding kha ka si hnga. Ka aw a thang lo, ka aw a chuah lo nain ka chungah hmual a ngei i lunglomhnak in ka khat. Thiangthlarau nih kan cungah rian a tuan tikah cun lomh lo in um khawh a si ti lo. Minung pakhakhat nih hipa hi nan philh tiah a au ahcun ka lo ko. Chiandeh kaa hmanh a phih kho tu kan Pathian nih an ka a phih hna caah a ho hmanh an au lo. Car owner fapa hronghrang khi an ka ruah i a naih hmanh an ka naih tuk lo,
tha dam tein Hakha a ka phak ter.

Kan Pathian cu a thawng, khamh manh lo ti a ngei lo. Kan auhnak aw a thei dihtu a si i, a can hman tein rian a tuanmi a si.

02. Minungleikap:
 

Lih chim....... Bawi Jesuh nih Saadusi le Farasi hna kha "Lihchim hna, nan pa cu khuachia a si" a ti hna(Jn.8:44). Lih chim hi Bawipa nih a huat. Lih a chim mi vialte hna cu vancung khua an lut kho lai lo, a ti (Bia.21:8).

Pur i lainawng........ Mi thah le lainawn hi aa khat lo. Mi thah cu kan ral va thah khi a chim duhmi a si i cucu sunlawi ngai ah ruahmi a si. Israel mi nih an ral tampi an rak thah hna tikah an lung a lawm, Pathian nih a bomh hna tiah kan ti. Lainawng cu mah minung, mah miphun thah khi a si i cucu sualnak nganpi ah ruahmi a si.

A donghnak:
Lihchim le hlen hi aa khat lo mi a lo ka nain thenawk a tha lomi a si. Lihchim le hlen hi an tha lo, sualnak a si. Asinain huam ahcun miphun dang hna tal kha va hlen ding a si. A tha kan ti lo hmanh ah pasal/nusal a si tal kan ti lai. Mizo ram ah kuli kan rak tuan lio ah a cheu cu kan u lei nih an kan hlen dih i phaisa an kan pek tawn lo. Mah minung, mah miphun hlen hna hi lainawn a si. Mah minung le mah miphun zahpi hi lainawn a si. mah minung le mah miphun a thang chiather hi lainawn a si. Pathian duhmi a si lo.

A dammi Khrihfabu, a dammi miphun timi cu an ngeihmi phaisa, thilri, member a tlawm le a tam ah  a si lo. Zeitluk in member an tam hmanh ah an i daw lo ahcun an dam lai lo, a buai peng lai. Aa daw mi hna cu tlawmte an si hmanhah an i nuam, an dam. Cucaah kan Lautu miphun , kan Lautu holh le ca dawt hna hi Pathian duhmi a si. Kan ram le kan miphun a dam lai. Kan Lautu mipnun le nunphung, ca holh a dawmi hna cungah Pathian kut a tawi lo, an auhnak theih lo dingin a hna a chet lo. Zeicahtiah Pathian duhmi a si.