Zumh Awktlak Nun

Aa thawh i, ‘A tha, nangmah cu saltha na si. Thil hmete ah zumh awk tlak na si caah khua pahra uktu ah kan chiah lai’ ati. Luke 19:17

Dr. Pa Hnin
A bawipa nih “saltha" tiah a kawh i khua pahra uktu ah a chiahnak a ruang:

  1. A bawi pa nih a khinh mi rian kha i pumpek in a tuan caah;  Phungthuak bia 12:24 Mi teima mi cu tuktu an si lai sihmanhselawh mi thathu cu an thathutnak nih mi sal ah a can ter hna lai.
  2. A bawipa nih a pek mi nawl kha tangtor te in a zulh caah; Phungthlukbia 18:12, Toidornak cu upatnak phaknak lam asi.
  3. A rian kha dinfelnak le zumh awk tlak te in a tuan caah; Phung 16:8, Dinlonak in hmu mi thil tampi nak cun dinnak in hmuh mi tlawmte a tha deuh.
                Joseh tuanbia (Genesis 37:12-36) hi kan theih tawn lengmang mi asi. Joseph cu a u le nih Egypt ram ah an zuar i, Potifar an ti mi bawi sin ah “Sinum” (servant) sinak in a va phan. Joseph cu Potifar nawlngaihnak tangah mah sining i hngalh but e in a thut dir i, a hmaikaa i a um mi rian paoh paoh kha tordornak lungput le zuamh awktlak te in a tuan caah Potifar nih a uar (a tlaihchan) hrianghran. Cu tikah Potifar nih a ngeih mi thil vial te zohkhenh tu ah a chiah. Cu thawk vun Joseph ruang ah Pathian nih Egypt ram mipa Potifar innchungkhar cu thluachuah a pek hna.
                A cunglei i Bible cang ka thim mi chung ah a bawipa nih saltha tiah a kawh mi pa zong hi a bawipa nih a um lo kar ah suitangka pharkhat in chaw let ding ah a khinh mi rian kha i pumpeknak le toidornak lungput he a tuannak nih a bawipa caah suitangka phar kua a miak hlei ah a mah zawng khua pahra uktu ah a chiah.
                 Prophet Jonah cu Pathian nih Nineveh khua ah thawng tha va chim hna tiah rian a fial. Pathian nawl a ngaih duh lo i a mahnak hmun ah a kal. Sangpalawng cung I anmah te in khual a tlawng ko mi ko mi tampi kha awlawkchawng in a tuah hna. A donghnak ah a mah zawng ngapi paw chung ah a phan.
                 U le nau hna, toidornak lungput le zumh awktlak in rian kan tuannak thawngin kan “Rank” an kan kai ter mi kan si hna  maw. Kanmah thawngin kan innchungkhar, kan Khrihfa bu, kan khua le ram le kan boss te cung ah thluachuahnak a tlun ter mi kan si hna maw asi lo ah Prophet jonah bantuk in buainak a chuah ter tu dara kan si. Kanmah le kanmah bia i hal hna usih, Phungthlukbia 15:33, Upatnak phak lam cu toidornak asi.
                Joseph cu Potifar  nupi nih ka ih pi law tiah sualnak tuah pi ding ah a lem tikah mit hmuh lo Pathian thlarau nih a ka um hnawh peng ko ti le Pathian bia (Aw aan) kha a hna thlam ah a um peng caah cu sualnak cu a tuah duh lo.
        U le nau hna bawipakhat a si mi nupi cu aa dawh ngai lai si kaw hi bantuk thil hi ton cio han usih law zei kan lawh cio hnga. Mit hmuh lo Pathian thlarau aa ukter lo mi Khrihfa menmen asi mi caah cun hnu le hmai hawih in a ho hmanh nih an ka hmuh lo tiah thlarau ngaihchiat ter a fawi te. Boss pa nih a ka hmu lo. Company nih an ka theih lo. A Cozah nih an ka theih lo tiah Pathian ngaih a chiat ter mi kan si sual hna maw? Phung 16:8,  Dinlonak in hmu mi thil tampi nak cun dinnak in hmuh mi tlawmte a tha deuh.
               U le nau hna, Pathian bia hi theih i, zumh lawng hi a za lo. Pathian bia hi hi bantuk a chia le a tha thleidanak ah hmang hna usih. Pathian nih a kan pek mi fimnak thlarau fimnak asi. Thlarau fimnak nih a chia le a tha hi thleidang hna usih.Cu nun cu zumtu nun, Khrihfa nun asi. Pathian thlarauduhnak le taksa duhnak an i ton zawn ah hin Pathian nih a kan pek mi thlarau fimnak hmang hna usih.
Joseph cu a dinfelnak nih thawng chung  ah a phan ter.Sihmanhselaw dinfelnak a tanhtu Pathian nih Joseph a dinfelnak thawng cun Egypt ram tuktu bawi ah a ser. Phung 14:34 Miphun a lianhngan ter tu cu dinnak asi.
                Zumh awktlak nun  nih Pathian lung a lawmh ter I, ram le miphun a thancho ter. Taksa thinlung le thlarau damnak asi.
                A bia fiang kan I ruah ti mi Pathian nih kan dihlak caah thluachuahnak kan pek piak hram seh, Amen!

Comments

Popular posts from this blog

Zohchun Awktlak Khrihfa Innchungkhar

Bawipa Cu A Tha