Khrih Pekmi Ruahchannak (Advent First Week)

“Khrihnih a kan pekmi ruahchannak hi atu kan nun chung calawng hi a si ahcun, mi vialte lakah zaangfah awktlakbik cu kanmah hi kan si hnga,”
 1 Korin 15:19).

© Rev. Dr. Si Khia 

Advent Sullam: 

Advent timi cu “Jesuh Khrih chuah le chuahcam tuah hngahnak” tinak a si. Jesuh Khrih chuah lomhnak Christmas puai cu December 25 ni ah tuah a si. December 25 hlan zarhpi 4 (Four Sundays before Christmas) cu Advent Sundays an si.Hi Advent Sundays zarh hna ahhin Jesuh Khrih nih a ratpimi thawngtha phun 4 langhternak ah phazawngdaing vannak hi Khrihfabu tampi ah tuah a si. Advent Sundays le phazawngdaing hmelchunhnak hnacu: 

  1. Ruahchannak – Hope
  2. Daihnak – Peace
  3. Lawmhnak – Joy le 
  4. Dawtnak – Love hna ansi. Hi pinah Christmas laizan (Christmas Eve) asiloah Christmas Ni ah Khrih (Messiah) hmelchunhnak phazawngdaing van a si. 
  5. December 25 (Khrih Messiah) 

Ka umnak Khrihfabu hna (Yangon Lautu Baptist Church – YLBC) le Lautu Baptist Church, Victoria (LBC) ah kan tuahning cu chungkhar 5 kan thim hna. Christmas tuahtu dong an um ahcun December 25 ni ah Messiah Phazawngdaing kan van ter hna. An van lai ah Baibal cangthim an rel i chungkhar tlingin phazawngdaing cu an vang hna. Cun thiahmi chungkhar 4 cu a ni le an vanmitlangtar (tchk. Ruahchannak, Daihnak …tbk) he aa tlakmi Baibal an rel i phazawngding cu zarh changchang in an van.

Hi bantuk in chungkhar in phazawngdaing vannak tuahtikah chungkhartling in Christmas thla le ni phakkhawh caah Pathian lawmhnak, Jesuh Khrih cu kan caah ceunak a silawng siloin vawlei a rat hi kan nunnak ah Ruahchannak, Hnangam Daihnak, Lomhnak le Dawtnak a kanphorhtu Bawi zong a sinak kha a kan theihter than.

Khrih Phorhmi Ruahchannak 

Psycholist William Marston nih, “Minung 3,000 kha zeidah na nunchan tiah bia a hal hna. Cu hna lakah 2,820 (94%) nih an chimmi cu, ‘Hmailei ka nunnak cu atu nakin ka tlam a tling deuh lai timi ruahchannak he ka nung ee’ tiah an ti. Asinain ei usih, ding usih, i nuam usih, timi hi mi zaran lungthin ah a um bikmi a si,” tiah a ti. Greek pawl zong mah ticun an rak um ve (1 Korin 15:32).

Nihin (Dec. 1) kan vanmi Phazawngdaing nih a langhtermi cu Jesuh Khrih cu zumtu hna dihlak caah RUAHCHANNAK phawrtu Bawi a si tinak a si caah Khrih nih kan caah zei bantuk Ruahchannak dah a kan phorh timi Baibalcang hna zoh hnik hna usih.
Baibal Thiang nih ruahchannak le zumhnak he nun ding hi a kan cawn piak(Rom 8:24-25). Paul zong nih ruahchannak he Kawltung lei ah ka tli ee tiah a ti(Filipi 3:14).

Cu lawng siloin:
  1. Pathian cu ruahchannak hram a si. Amah kan zumh hi, a sin ah ruahchannak kan ngeih khawh taktak tikah hnangamnak, daihnak, le lunglawmhnak kan hmuh (Rom 15:13). 
  2. Pathian lawnglawng hi kan i ruahchannak a si (Salm 39:7). 
  3. Ruahchannak ngeih lo in khuasak tikah Pathian he kan i then (Efesa 2:12). 
  4. Ruahchannak cu a ni khua rauh ter tik ahhin a lung a fak, sihmanhsehlaw saduhthah a tlin tikah hin nunnak thingkung a si (Pungthlukbia 13:12). 
  5. Khrih nih a kan pekmi ruahchannak hi atu kan nun chung calawng a si ahcun mi vialte lakah zangfah awktlakbik cu kanmah hi kan si hnga (1 Korin 15:19). 
  6. Hi ruahchannak kan ngeih caah hin kan ral a tha kan hna a ngam (2 Korin 3:12).
Nihin kan ruahawk:

Vawlei nih a chuahpimi thilphunzakip ruangah lungretheih vansang au in a ummi caah Pathian nih a fapa Jesuh Khrih cu a rak kan pek. Kan nunnak lamthluan ah Jesuh Khrih Thiang Thlarau nih kan nunnak uk in hruai a kan duh. Vawlei kan nun chungah kan herhbaunak vialte tlinter a duh fawn. Ruahchannak he kan nun ding hi a kan duh. Cu ruahchannakcu vawlei kan nun lio calawng a si lo. Vawlei kan nunnak a dih tik zongah zungzal nunnak laksawng a kan chiahpiak rih (2 Korin 2:15:19; 9:6-8).

Jesuh Khrih lawng kan ruahchannak hrampi a si. Amin thiang zungzal thangthat si koseh!

Comments

Popular posts from this blog

BAIBAL ZEITINDAH KAN REL LAI?

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU