Lawmhthiamnak Lungput (An Attitude of Thankfulness)

“Zeibantuk thil nan ton hmanh ah lunglawm in um u,. Khrih Jesh chung in nan nunning ah hin hitihin nung hna she, tiah pathian nih an duh hna” 
(1 Thesalon 5:18) 

Rev.Dr. Si Khia
November zarhlinak cawn nili ni cu America ram ah Thanksgiving Day (Pathian sin ah lawmhnak chim ni) a si. Zeicahdah Thanksgiving Day hi an tuah hnga? Atawinak bik in a tuanbia kan chimh ta tuah lai.

Scotland le England ram ah khuacaan a chiat caah an nifatin rawl caah an cinmi aalu athu dih caah an rak pam ngai. Mah hna rammi cheukhat cu ramthar le ramtha panh dingah America ram an fuh. America ram hngak, Red Indian (Native Indian) pawl an umnak an va phan. Harnak tampi an tong. Khuasik can ah a bik in an temh-in khun. 1621 kum, Plymouth ah ram thar a tlami pawl le mah ka i khua a rak sami Wampanoag Indians pawl cu an thlaithlak rawl a vui hmasat can lawmhtinak an tuah. Cu cu nihin tiang tuah pengmi Lawmhnak puai (Thanksgiving celebration) a voikhatnak cu a si. Kum 200 chung cu, pumpak tete in an umnak khua le hmunhma cio ah Thanksgiving an rak tuah cio. 1863 kum, America ram thlanglei le chaklei ral an tuk lingcing ah President Abraham Lincoln nih November zarhlinak, cawn nili ni cu Thanksgiving Day tiah a thanh hnu ah nihin tiang America ram pumpi in zungkhar a si i chungkhar cio (zum lotu zong nih) nih Pathian sin lawmhnak le Lunglawmhnak Ni cu tuah a si peng.

Minung pakhat cio hi Pathian thangthat lawmh awk tlak thil pakhatkhat, a ruang pakhatkhat cu kan ngei cio lai tiah ka zumh. Kan cangthim 1 Thesalon 5:18 ah hin zei thil paoh, thil dihlak … caah i lawm zungzal tiah aa tial lo. Zeibantuk thil nan ton hmanh ah (harnak chung ah) i lawm uh … ti in a kan cawnpiak (Scripture doesn’t say to be thankful for all things but to be thankful in all things). Aharbik kan tonmi thil chung zongah ilawmhnak khawhnak thinlungput ngeih ding tu a kan cawnpiakmi a si. 

Mipakhat nih, “Kedan danh awk ka ngeih lo ruangah ka rak zai nain ke a ngei lomi pa ka hmuh hnu ah zai cu ka ngol,” (I complained because I had no shoes until I met a man who had no feet) ti in a rak chim bal.  

Zei bantuk thil kan ton zongah lawmh awk a ruang a um peng ko. Kan tonmi thil cu ithleng lo in um hmanhsehlaw nangmah le keimah kan lungput kan thlen ahcun phundang pi in thil an cang kho ko. 

Canada rammi Terry Fox an timi pa cu lam hla tlik a zuam ngaimi a si. Canada ram khat te lei in khat lei a donghnak tiang tlik a rak itimh. Nikhat ah a tlawmbik Marathon tlikzuamnak tluk hlat in Meng 26 paoh cu a tli peng i Cancer zawtnak dothlatnak (research tuahnak) ding caah phaisa a kawl (fundraise) a tuah. Amah hrimhrim zong Cancer zawtnak ngeimi a si.  Khuaruahhar a simi cu a ke pakhat a khuptang an tanmi a si caah ke pakhat te lawng in a tlik peng cu a si. Nifatin te ti awk in TV thawngla pawl nih cancer zawtnak damh khawh ding in research tuahnak caah ti in na tlikmi cu zei tindah a si? tiah bia an hal peng. Thadih le zaangba ngai, chim huam lo bu zong in, “Thaizing kong ka theih chung lo nain Pathian nih nikhat nun rih dingah cantha a ka pek hin Pathian cu ka lawmh,” tiah a leh theomi hna.

Terry cu Canada ram khat le khat tlik a lim hlan ah a cancer zawtnak ruangah a thi. Asinain a thih ni tiangah Pathian thangthat le lawmh cu a ngol bal lo. Nikhat nikhat nunnak hi Pathian laksawng a si tiah Pathian cu a lawmh peng. Cu ticun tuar a har tukmi cancer zawtnak cu lunglawmhnak lungput he cun a tuar i ni a rak liamter khawh lengmang. 

Nihin kan nun rih caah siseh, nihin kan dirhmun le kan sining tiang kan phak khawh caah siseh … Pathian cu lawmh ve in thangthat ve usih.

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU

Pathian Kan Sinah A Um