Kan Nunnak Hi Zei Dah Asi?

Phungchimtu 3:11
Salai Pum Za Mang
2002-2003 cacawn kum ah MIT ka phan. MIT ah kum 3 ka kai. Philh khawh loding thil tete ka rak ton mi an um len. Sianginn kan kai ka June 2002 ah ka tonsil a phing, cuticun, Karen Baptist Convention Clinic ah major operation an ka tuah. Kum 1 chung bia tha tein ka rak chim kho lo. Bia a chim thiam lo mi u/nau hna an feeling khi ka theih thiam ngaingai. Phaisa har deuh ruangah MIT kum 3 ka kai chungah Insein deuh ah ka um. Thal sianginn khar lio ah Saya Cung Ling he MIT Hostel ah kan rak um. Lautu biakinn ah rawl kan rak ei ton, cucun, zaanlei paohah Table Tennis kan rak tu ton theu. MIT in YLBC ah Bus in kan kal hi arak tlawm ngai. Ke deuh in kan rak kal. Kum 9 avan rau tikah tuanbia ah an cang ko cang. Saya Cung Ling nih teh a philh cang hnga ma kati ton. Cupinah, 2005 February ah khan kan class nih Rakhine ram Ngapali Beach ah kan kal lai anti. Kan i dawt ngaimi Kachin ka hawi pa (JD) nih 15000 (2005 lio ah) a ka pek piak. Cuticun, Ngapali lei cu kan kal ko. 
Zanglei nazi 5:00 pm hrawngah MIT in kan kal. Zing lei nazi 5:30 am hrawngah Ngapali cu kan rak phan. MBC nih an ngeihmi Guesthouse ah kan i thum hna. Zaan khuadei kal asi tikah kan baa ngai ko. Lam a tha tuk ve lo, cucaah, kan baa khunnak cu asi. Ka hawi le cu zing lei 7:00 am tiang hrawng cu an it hmasa. Ngapali a phan bal mi nihcun nan theih ko lai. Ngapali hi ti a thiang ngaingai. Mah cucu aa dawh hleinak cu asi. Kan phan i, ka thil ka chiah hnu ah thingkung tangi an tuah mi thutnak te ah ka van thu. Ka Diary ka van lak, cuticun, notes ka tial. Bible tialtu hna nih sermi thil zoh tikah Bawipa a lianngan ning kan theih anti mi hi a rak hman tuk kati len. Ngapali cu aa dawh ve hrimh ko mu. 
Ngapali ah zaan 2 ni 3 kan cam. A tawi tukin kan theih cio hna. Thaizing MIT lei kan kir cang lai kan ti. Cu zaan cu meiphu mi-pong-pue (kawlholh) kan rak tuah. Khah! MIT in degree kan lak cang lai. Zeidah nan tuah/kan tuah cio lai?  tiah biaruahnak le lung duhbia kan rak chim cio hna. Lungtak tein hei chim cio asi. Cu lio caan ah Kachin ka hawi pa nih a chimh mi bia hi atu tiang ka philh kho lo.
Ngapali Beach hi zing lei ahcun aa dawh ngaingai ko, nain, chun nitlak minung nih kan ke in kan lamh tikah aa dawhnak a rawk dih. Zang lei ahcun, kan keneh lawng te asi. Remh than awk an tha maw? Zaan a tlai tikah Beach cu ti nih dawh tein a remh than khawh. Aa dawh than lengmang ko. Nain, minung nunnak cu Ngapali Beach he aa dang ngai. Pathian nih dawh tukin a kan ser, dawh tein hman ahcun aa dawh tuk, a sunglawi tuk. Nain, voikhat te kan hrawh sual ahcun remh than awk a tha ti lo. Cucaah, dawtmi hawi lei hna Bawipa nih an pek mi nunnak kha sunsak thiam ko u tiah bia kan cah hna (Kachin ka hawi pa bia).
Kan kalti mi nu pawl nihcun an hei ni men ko. Pa cheukhat zong nih te zeitin dik an ruah ve cio hnga? Kei cu ziah, ka hawi pa hi ka-bia-saya asi ka theih bal tung lo kati. Sa-yi-saya zong asi ve fawn lo. Thaizing cu MIT lei tlung ding kan si, lam a that lo caah Bus cungah kan i hngilh khawh lai lo tiah zaan 12:00 am cun ihnak lei an kal cio. Ka hawipa cu it ve cang si kati. Salai, tuzaan cu Ngapali Beach in Thutnak an tuah mi ah khin zaan khua ka dei lai, thlapa he kan leng ti lai. Nang cu va ih cang ko kakawi, a kati. Kan i kawmhnak kum 3 asi cang, nain, tuzaan cu da ngai aa dang ko e kati.
2005 May ah MIT in Mandalay lei ka kal. Ka hawi pa cu Kachin ram lei a kal. Minkyina a um lio ah telephone in kan i chonh. Hmaizar ahcun Chi-phwe khua (China-Burma Border) lei ka kal cang lai. Keimah nih telephone in kan contact than te lai a kati. Mah cucu a hnu bik kan i chonh asi. Mandalay ah kum 5 leng ka um, nain, contact a ka tuah than ti lo. Kachin ka hawi le ka hal ton hna, nain, Kachin-China Border lei a um ti tiang lawng an ka chim khawh.
Phungchimtu ca-uk nih nunnak hi zei asi, cucun, vawlei hi zei asi, cucun, minung kan sining hi te zei ngaingai dah a si ti mi philosophy asi. Bia dangin chim ahcun, hi ca-uk nih minung sining (the law of human nature) kha fiang ngaingai in a langhter. A bikin atu kaa thim mi Phungchimtu 3:11 nih hin vawlei cungah nunnak hi zungzal in a hmun lo ning, chikhat te ah a tlau than ning, cucun, kan nunnak hi sullam a ngeih tlukin kan hman thiam lo ahcun zeihmanhlo ah aa cang ning te hna hi a kan cawn piak.
Kachin ka hawi pa (JD) kha a hnu ah ka theih than mi cu AIDS a nei ti asi. Keicu vawlei ah sau ka um ti lai lo, cucaah, ka um chung caan te hi Church-based NGO ah rian ka tuan lai ati e anti.  Kan nunnak hi voikhat te remh than aw tha seh law cu mu ati theu anti. Nain, a tlai tuk cang.  AIDS a nei anti hnu cio ah Ngapali Beach kan kal lio a bia chim mi te hna kha ka lung a hung fiang. Aw, ka kawi, na celh ve lai lo mu kati. Nunnak, nunnak, zeihme ma tluk cun na rawh a fawi kati. 
Cucaah, u/nau hna Phungchimtu nih a chim bangin kan nunnak hi zungzal in vawlei ahcun a hmun ding asi lo, nain, caan kar te Bawipa nih a kan hlanh chung te hi hman thiam i zuam hna u sih, dawt thiam i zuam hna u sih, hrawh hna hlah u sih. Voikhat te kan palh sual ruangah remh aw tha ti lo kan si khawh ngai. Vawlei kan nun caan hi a tawi ko, a tawi hrim ko, nain, sullam nei tein kan hman thiam ahcun, zeital cu kan tuan manh ko lai. 
Ngapali Beach cu a rawh zongah remh than aw atha, nain, Kachin ka hawi pa nih a nunnak a remh than kho ti lo. Kanmah nih te kan nunnak cio hi zeitin dah kan hman ve hna lai?

Comments

Popular posts from this blog

Zohchun Awktlak Khrihfa Innchungkhar

Zumh Awktlak Nun

Bawipa Cu A Tha