Pathian Hmanmi Nu Hna

Dr. Esther Hle Khia

Kan Bible hi kan zohthan lengmang tikah Pathian nih abia pi tak mi rian țuan (a bik in khamh nak)  a duh tikah  nupawl hi a hmang ton hna ti kan hmuh. Cu hna tampi lakah a tang lei nu pa 5 pawl hi vun langh ter ka duh.

1. Faraoh fanu ( Exodus 2:5)

Israel pawl Izipt sal an tan lio i fapa an ngeih mi paoh thah piak dih ding in le tiva ah hlawnh dih ding in nawl an chuah lio ah a chuak mi Moses kha,  a pa nawl chuah mi hmanh pahchih in a nunnak a khamh tu cu mi zangfah thiam nu Faraoh siangpahrang fanu a si. Siangpahrang fanu a si i Moses kha a duh ah cun a nun nak a lak khawh. Si hmansehlaw mizangfah thiam tu nu pakhat a si caah a pa nawl chuah mi hmanh kha el ko in Moses nunnak cu a khamh. Faraoh fanu nih a nunnak a khamhmi pa te Moses cu ni ni khat ah cun Israel miphun vialte luat pi tu ah a cang. Zangfahnak thinlung nih an ram nawl an chuah mi he ralchanh in rian a tuan ter ngam. Israel miphun Izipt sal tannak in an luat nak ding riantuan thawk tu cu Pharaoh fanu a si.

  

2.Rahap nuhmei nu (Joshua 2: 8-9)

Israel pawl tinh mi ram co nak ding ah le an ral tei khawh nak ding ah a bom tu nu a si.

Ram ngiat tu kha Pathian nih a tanh mihna an si ti a theih fiang  caah raltha ngai in a inn ah a thup hna.  Israel pawl kha tinh mi ram a co ter hna hlei ah a mah le a inn chungkhar zong thihnak ral in an luat. Mi țhawng le mi ngeihnung a si lo, nu hmei nu te a si ko nain Pathian nih Isreal pawl Jericho teinak ding ah lamsial tu ah a mah cu a hmang. Pathian nih a mi hna cungah zeidah a tuah ti kha a dothlat tu le a tuak tan tu nu a si.

  

3.Esther Siangpahrang nu (Esther 4:16)

A mui dawh nak cu a miphun luat ter tu ah a hmang tu nu a si. Esther siangpahrang nu hi a mui a dawh hlei ah a ral tha. A miphun caah cun thih ah thih si ko seh ti tiang in a miphun caah a țang ngam tu a si hlei ah Pathian a bochan ngai mi pakhat a si. Rianpi pa țuan hlan ah rawlulh in thla a cam tu nu a si hlei ah  a miphun pawl zong rawlulh thlacam a cawnpiak tu nu pakhat asi. A mui dawh nak cu a hmanzia a thiam caah a miphun luat ter tu le miphun hmaihngal ter tu a si.  A herh lo pi in a miphun sinak kha a langh ter lem lo. Sihmanhsehlaw, a can a phak tikah cun a miphun kha a philh lo hlei ah a miphun caah cun thih tiang a ngamh mi nu a si. Cun Pathian fanu a si nak kha a herh tak tikah a nunnak in a langh ter. A kaa in  Khrifa ka si tiah a ti lem lo nain a herh  tikah a zumh nak cu tuah ser nak in a langh ter khawh.

  

4.   Mary (Luka 1: 38)

Mi lungthiang,  mi fel  le nawl ngai tu a si ko lai ti cu a fiang. Zei cahtiah vancung mi nih “nau na pawi lai” an ti lio ah khan an nunphung ah nungak pakhat nih va ngeih lo in lakfa pawi ding dir hmun cu a har tuk. Cu long si lo in a tlangval Joseph he zong an i ham fon cang. Sihmansehlaw, a dawt mi a tlangval Joseph kal tak ding in le ningzah mual pho ding vial te kha intuar ding ah vancung mi sin ahcun ‘nan chim bang si ko seh,  kei cu Bawipa salnu ka si ko’ tiah a leh hna.  A mah cu nu vial te lakah thluachuah bik nu na si tiah Elizabeth nih a ti. A nawl ngaih nak le a nunthian nak nih a mah cu vawlei mivial te khamhtu kan Bawipa Jesuh hring tu ding ah Pathian nih a thim.

  

5.      Mary Magdaline le hawipawl (Matthai 27: 61, 28: 1-9)

Jesuh vailam an tah lio a zul tu pa pawl nih an tlik tak dih lio ah  a thawk in a dongh tiang a pawngte ah a um tu kha nu pawl an si. An dawt mi an Bawipa / an fapa cu a thawk in a dongh tiang an zulh. Tihnung hriamnam lakah an zulh chih. Vailam ah an thlai lio a aihram lio  zongah a pawng te ah an um hnawh. Cu long si lo in an vuinak thlan tiang in an va zulh. Pathian nih nu a ser hnawh chan hi mah hi si ko rua, ngeihchiat vansan ton lio ah hnemh tu țha an si. Dawtnak lungthin he an khat caah țihnak  an ngei kho ti lo. Judah rawlkap pawl hriamnam lak ah a hnu tein an zulh chih ko. Thin phang thlalau in an um cio lio ah an Bawipa thlan veh ding le rimhmui va thuh ding in an i tim rih. Cu lio ah Jesuh he an i tong. Thawh țhan zingah Jesuh a tong  hmasa i thawhthannak biathli a phuang hmasa tu an si. An Bawipa kha lungthin tak tein an dawt ruang ah a thawh țhan lio zong ah an mah sinah a lang hmasa ve. Dawtnak thinlung nih  țihnak le ralchiat nak zong a pah chih dih.

Pathian nih hin nu paoh paoh hi a hmang ve hna lemlo. A hman mi thil ah raltha ngai in  a dir ngam tu, zangfahnak le dawtnak he a khat mi,  a lung thin athiang i nawl ngai tu, an muidawh  nak kha Pathian sunpar nak caah a hmang tu nu hna, zumhawktlak in a nungmi, miphun le ram a daw tu  le thlacamnun  a ngei tu hna kha a hman ton hna. 

Tu chun kan i dawh nak hi miphun ningzah mualpho ter tu ah kan hmang sual maw?. Khrifa ka si tiah au leng mang ko nain Pathian sunparnak kan bau ter sual maw? Kan miphun kan dawt ti  i au leng mang, miphun sinak hnipuan cu i hruk len ko i miphun zuartu kan si sual maw? Pathian nih a biapi mi riantuannak ah hman ding in thim mi kan si ve maw?