A Sunglawimi Thangthat Awktlak Thluachuak NU

Nupi ṭha cu hlawn nakin tampi in a sung deuh, cu bantuk mi hmuh bel cu a har hringhran! A va nih aa bochan i a va cu a si a fak bal lai lo. A nupi nih cun a nun chung vialte a va caah khan chiatnak si loin ṭhatnak kha a tuah. Thazang tlung ngaiin le lungtho ngaiin rian kha a ṭuan i a ngan zong a dam. A rianṭuanmi a hlawhtling ti kha a hngalh i zan ah a mei inn kha a mit bal lo. Sifak retheimi sinah nun a siang. Amah cu a ṭhawngmi a si i hmaizahmi a si i hmailei caan kha a ṭih lo. A kaa cu fimnak in a pau i a lei cungah zaangfah cawnpiaknak kha a um. A innchungkhar umkalning kha ṭha tein a zoh i an herh an baunak kha ṭha tein a hmuh. A fale nih khan, thluachuak nu, an ti ia va zong nih khan a ti ve i a thangṭhat ( Phungthlukbia 31: 10-28).

Ralbawi Napoleon nih, "France nih Nu tha tampi a ngeih pauh ahcun fanu/pa tha tampi an chuak ko lai (Let France have good mothers, and she will have good kids)" arak ti. Hi bia a chimh lio hi Vawlei Ralpi Avoi 2nk an thok cuahmah lio asi i, ram le miphun caah nusal pasal tha tampi aherh lio caan baki a chimhmi bia asi. Khua le ram le miphun thawnnak hi Nu le kutchung ah a um. Fa hi ngeih khawhpet tiah ngeih ding asilo, thate cawnken le thithruai khawh, thate'n zohkhent khawh zat ngeih i Pathian le miphun le ram caah nusal pasal tha ah can ter khawh i zuam ding asi.

Pathian saltha minthang Dwight L. Moody nih, "Ka nunnak i kaa liim khawhmi vialte hi ka Nu thawngin asi ( All that I have ever accomplished in life, I owe to my mother"  ati ve. D.L.Moddy hmangin Pathian liangan sunparnak tampi alang i vawlei Khrihfa tuanbia ah D.L.Moody hi rian pipa tampi a liim khotu ah theihmi asi. Pathian lianngan sunparnak caah hmanmi saltha hna hi an Nu le nih Pathian an bochan caah arak si hrimhrim.

Chungkhar le cingla innpa hna i sining dik taktak hi Nu le nih an theih bik. Jesuh nih khuaruahhar hmelchunhnak a tuah hmasat bikmi Kana khua mopuai ah a nu Mery nih "Misur a dih" tihi Jesuh a va chim hmasami asi. Nu le nih chungkhar harsatnak le thilrit tampi hi an kan chim dih leemlo. Pathian sin tu ah zeizong vialte a chim dih hmasatu, Pathian aa bochantu Nu cu Nu thlachuah ava si dah. Jesuh nih a Nu chimhmi bia hi a ngaih piak i a caan a tlin tikah khuaruahhar thil a can ter taktak ko. Nule hna kan herhbaunak zeizong vialte hi Pathian sinah nawl lengmang ko usih. A caan a tlin tikah Pathian nih kan herhmi cu akan pek ko lai khah :). Jesuh Nu Mery nih "An chimhmi hna pauh kha tuah te u" atimi zawn hi a biapi hringhran. Nule nih fale cu "Pathian Chimhmi Bia" ning in nun ding, zeipauh tuahser dingah cawnpiak le lamhmuhsak hi abiapi bikmi asi. Fale hi Bawipa sinin kan hmuhmi ro an si, thluachuah a kan pekmi an si (Salm 127:3) Pathian ro cu na sunsak awk asi, nan sunlawih awk asi. Mikip nih hi ro hi an co lo, ro cotu na simi hi thlachuah asi. Nule nih fale an pekkhawhmi ro sunglawi bikmi Jesuh Khamhnak kha fale nih an in fian i Jesuh kha an Khamtu ah an cohlan khawh nakhnga lamhmuhnak hi asiko. Na fale khamh an i fian le fianlo na thei maw? Khamhnak thawngtha voikhat te tal hmanh fale a chim rihlomi Nule kan um sual maw? Nuncan ziaza le thiltha dangdang, Khrihfa zulhphung hna zeitluk na chimh bal zongah, na fale nih a hram asimi Khamhnak an i fian hmasa phot lo fale nun a rawh a fawite. Na fanu fapa nih nangmah nakin Pathian an dawt deuh ding hi a biapi mi asi. Pathian a daw taktakmi fale nih cun a nu le pa a dawtzia hi amak ngaingai ko.

Nu nih umtu ziaza an thiam lo ahcun midang chungkhar le nuva karlak tiang hnahnawh petu an si khawh caah "nutar deuh pawl kha, nan umtuning ah mi hmaizah a thiammi nan si awk a si, na ti hna lai. Mi congoih hmangmi le mizuram an si awk a si lo. Nu no deuh pawl kha, an vale le an fale dawt an thiam nakhnga le, mah le mah aa uk khomi an si nakhnga le a thiangmi an si nakhnga le innchungkhar khuasak ṭha tein a zohkhenh khomi an si nakhnga le an vale bia a ngaimi an si nakhnga, thil ṭha nan cawnpiak hna lai, tiah nutar deuh pawl cu na chimh hna lai. Cuti an tuah ahcun Thawngṭha cu mi nih an thangchiat kho lai lo( Titus 2:3-5)

Pa nih an nupile cu anmah pum an i dawt bantukin an dawt hna awk a si. A nupi a dawmipa cu amah le amah aa dawt a si ko.(Ahohmanh nih mah pum kha an hua bal lo) (Efesa 5:28). Pathian ka dawt atimi pa nih cun a nupi a dawt awk hrimhrim asi. Cun, mah nupi cu biahrang zongin raak chih le chawnh ding asilo. Khrihfa taktak nih cu bantuk ziaza an ngeilo khah! Vale hna, nan nupi le kha daw hna u law bia hrang in ti hna hlah u (Kolose 3:19).

Fale cheukhat cu an pale kha chiat a serh i an nule kha a thangṭhat lomi an um tawn (Phungthlukbia 30:11). Nule ṭhithruainak cu hlawt ding asilo (Phungthlukbia 1:8). Kanmah ruangah harsat le thabat a tuartu akan hringtu kan Nu le hi an taksa cu a zor chin thluahmah, mah cucu kanmah ruangah asi. Cu asi caah kan Nule an tar tikah kan serhsat lailo mu. (Phungthlukbia 23:22). Na Nu pawng i na um khawhlo i na Nu hna na chawnh tawn lo ahcun na Nu zei ah na reellobia asi i, na serhsat asi. A pa kha a nihsawh i a nu khaa tar tikah zei ah a rel lomi cu, a mit kha nelrawn langak nih an khoih lai i langta nih an ei lai (Phungthlukbia 30:17); Ahohmanh nih a nu siseh a pa siseh a vawlhpamh hna ahcun, muihnak a rat tikah a mei-inn kha a mit lai (Phungthlukbia 20:20; khuaawng an tong hrimhrim lailo tinak asi. Khrihfa ka si aa timi nih cun Nu le Pa bia ngaih ding asi, zei caah tiah cun mah hi (1) Khrihfa Rian asi. Cun, (2) A Hmanmi Rian asi. Cun, (3)Pathian Nawl Peknak (Order) asi. Hi hna 3 kan tuah ahcun  biakamnak a um, cucu Thlachuah Ratnak Lam asi (Efesa 6:1-3).

Nule vialte Pathian nih thlachuah in pe hna seh. Nan fapale hna cu an tlanval lioah, a ṭhawngmi thingkung bantuk si hna seh law, nan fanule hna cu bawi inn ṭamhnak tung bantuk si hna seh (Salm 144:12)