Kan Biakmi PATHIAN

Fing le tlang hmanh khi an cim hnga i an rawk ko hnga, sihmanhsehlaw kei nih kan dawtnak cu zeitikhmanh ah a dong lai lo. Daihnak kan pek lai, tiah bia kaa kammi cu, a zungzal in ka zulh lai,” tiah nangmah an dawtu Bawipa nih a ti. Isaiah 54:10

Kan biakmi Pathian hi zeibantuk Pathian dah asi? timi biahalnak hi Khrihfa kip nih aphi kan chuah kho cio hnga maw? Vawlei kan nunnak ah kan tonmi thilcang hna zohchih in Pathian hi ka caah zei bantuk dah asi tihi kan phuanning aa dang cio khomi asi.

1. Kan biakmi Pathian cu sertu Pathian asi. Van le a chung um vialte, vawlei le a chung ummi vialte Pathian nih akan sermi kan si. Kum zabu 18 hnu leiah minung fimthiamnak a san chin thluahmah tikah mifim tampi nih vawlei hi sermi asilo, amah tein a cangmi asi tiah Big Bang Theory hna an chuahpi. Asinain, kum zabu 20 hnu lei ah science lei fimnak a sang chin, minung hngalhnak nih a phanh khawhlomi Pathian sermi thil a tam chinchin zia an hngalh chinchin. Cu tikah biahalnak dang pakhat a chuak than mi cu "Pathian nih zeica ko ahdah, zei ruang ahdah van le vawlei le a chung um vialte hi a ser hnga?" ti hi asi tthan. Cu tikah Sciences lei mi fimthiam hna le biaknak lei thiamsang hna nih "How Creation" le "Why Creation" tiah Pathian thil sermi kongah biatak te in rian an tuan. Cu asi caah, "Kei hi Pathian sermi ka si, kan nunnak ka pawngkam vialte hi Pathian sermi asi. A sawhsawh ka silo, Pathian kutchuak ka si, ka pawngkam thilri hna zong hi Pathian kutneh dawh lawngte asi" tiah Pathian dawtnak kha sunsak thiam aherh. Cu lawnglawng ah kan nunnak ah kan lung a nuam lai, Pathian sinah fek deuh in kan dir kho lai. "Hi thil vialte hna hnuah hin chim awk pakhat lawnglawng a um rih: Pathian cu ṭih law a nawlbia kha zul hna, zeicahtiah minung cu hi nawlbia hna tuah awk caah hin pei rak ser a si cu" Phungchimtu 12:13. 
2. Kan biakmi Pathian cu akan zohkhentu, a hnakar ah akan tenh tu Pathian asi. Pathian akan sertu Pa cu akan ser hnu ah akan kaltaak sawhmi Pathian asi hrimhrim lo. Nitlak lei, abikin German pawl, nih Pathian nih hin akan ser hnu ah zeihmanh akan saing  akan uk tilo, thil zeipauh hi amah sining tein kal ko seh tiah akan chiahtaak timi ruahnak Deism faakpi'n an rak dirpi bal. Kan biakmi Pathian cu cu bantuk asermi thil a sawhsawh in a chiahta mi Pathian asilo. Kan Pathian cu asermi thil vialte cungah zawnruahnak le dawtnak a ngei i a zohkhenmi Pathian asi. Mah cucu Greek holh in Theism an ti. Kan biakmi Pathian cu kan tuahmi vialte cu a hngal dihmi Pathian, lamhlatpi khin ka ruahnak vialte a hngal dihmi Pathian, rian kan ṭuan ah siseh, kan i  dinh ah siseh, a kan hmu i kan tuahmi vialte kha na hngalh dihmi, bia kan chim hlan in ka chim ding vialte a hngal dihtu Pathian kan hnulei le kan hmailei in a ka cawngh i kan cungah na kut a zartu Pathian, kan pum chung thil vialte a ser dihtu Pathian, ka$n chuah hlan in a rak kan hmu diam cangmi Pathian asi. Psalm 139. Cu asi caah Pathian cu akan cawmkeng, akan zohkhenhtu Pathian asi. "Pathian zaal ah himte in ka um, Pathian nih aka zohkhenh" ti kan hngalh chung pauh cu kan hna a ngam hirhiar ko lai.
3. Kan biakmi Pathian cu akan dawttu Pathian asi.  "Maw, van ka zoh a dang, lei ka zoh a pit; khua-awng ka tong lo tuk ee" tiah khuaruahhar vansang au in hnabeidong in kan um lio caan zongah Pathhian nih akan dawt ko. "Pathian cu kanmah lei i a ṭan ahcun aho nih dah an kan doh khawh lai? A Fapa hrimhrim hmanh kha a zuah ṭung lo, kan dihlak caah pei a pek kha! A Fapa kha a kan pek — thil vialte zong hi a lak in a kan pe hnga lo maw?" Rom 8:31-32 Kan biakmi Pathian cu akan sertu Pathian asibang a sermi thil vialte a dawttu Pathian asi. Pathian nih vawlei hi a dawt hringhran caah a Fapa ngeihchunte kha a pek. Johan 3:16. Zeihmanh nih an kan ṭhen kho lai lo, hi thil vialte hna chung hin a kan dawtu thawngin kannih cu teitu hna nakin teitu kan si deuh. Zeicahtiah a kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh, ³⁹cunglei vawlei nih siseh, tanglei vawlei nih hin siseh, an kan ṭhen kho lai lo — kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo. Rom 8:37-39. 
4. Kan biakmi Pathian cu akan tharchuah thangcho tertu Pathian asi. Kan biakmi Pathian cu kan nunnak ah kan tonmi thil hna chirhchan in akan tharchuah tu asi. Kan nun a kan thlengtu asi. Caan tampi cu harsatnak le buainak, kan ruahchan ningin thil akal lo tikah Pathian nih aka hlawt cang hlah maw tiah kan ruah sual caan a um tawn. "ka bawm ko sawh tiah chun he zaan he kan auh zongah dinh ka hmu kho hlei lo" tiah kan ti caan a tampi tawn. Psalm 22: 1-2. 1570 lio hrawngin "Back to The Bible" (Baibal Lei-ah Kirthan Usih) tiah Roman Catholic lakah thangphoknak arak thoktu biaknak hruaitu German mifim Martin Luther nih, " Amah Pathian Bia lei ah ka mipi kir than pi kaa timh lio-ah, Pathian nih aka kaltaak hlah maw aww..." tiah ngaihchia ngaiin arak hram bal, nain adonghnak ah Pathian nih a dirpi caah Khrihfa thangphoknak nganpi a cang. Khrihfa kan nunnak a sunlawih hleinak cu zei bantuk thil kan ton zongah Pathian nih aka zaam taak lo, ka tonmi thil cungin a ka tharchuah aka thancho ter duh ti hngalh hi asi. Harsatnak kan tonmi hi Pathian lei ah kan thanchonak caah asi tawn. Harsatnak lakah Pathian nih akan zaam taak lo. Bawipa nih a mi cu akan hlaw lai lo,amah ta a simi cu a akan zamtak hna lai lo.Psalm 94:14.  Zeicahtiah Pathian nih, “Kan kaltak bal hna lai lo i kan hlaw bal fawn hna lai lo,” a ti. Hebrew 13:5
5. Kan biakmi Pathian cu akan haltu Pathian asi. Zeizong vialte hi Pathian ta an si. Asinain Pathian nih kan sinin zeikodah akan hal hnga? Bawipa nan Pathian cu nan lungthin dihlak le nan nunnak dihlak le nan ruahnak dihlak le nan thazang dihlak in nan dawt lai,’ Mark 12:30 tiah Amah dawt ding akan hal. Pathian nih dawtmi lawng siloin kanmah hrimhrim nih Pathian kha kan dawt ding hi Pathian nih aduhmi asi. Leonard Swidler timi Khrihfa catialthiam pa nih atialmi cu "Khrihfa kan nunnak Pathian nih "H" pathum akan hal" ati. H hmasa cu "Head" asi hi kan lu kan thluak kan ruahnak hrimhrim hi fim seh, ngal seh ti akan duh piak. Khrihfa taktak asimi cu a ruahnak le thluak hrimhrim fim sehlaw Pathian hngal seh ti akan duh piak. Paul zong nih, " Kaa bochanmi cu ahodah a si kha ka hngalh" tiah ati. 2Timote 1:12 Kan ruahnak kan fimnak vialte in Pathian hi kan dawt ding Pathian nih akan hal. Pathian nih a fale cu fim seh thiam sehla ka lianngan sunparnak caah hmang seh ti akan duh piak zungzal. "H" pa 2nk cu "Heart" asi i lungthin asi. Khrihfa asi taktak mi nih cun lungthin thiang, lungput ttha ngeih i mizawn ruah ding Pathian nih akan hal. Kan lungthin hi Pathian umnak hmun si ding aduh i kan lungthin dihlak in Amah Pathian dawt ding akan hal. "H" pa 3nk cu "Hands" ti asi i tuahsernak le riantuannak - thazang hrimhrim in Pathian hi dawt ding ah akan hal. Pathian rian ah kut tam a herh ti asi khah. Pathian hi kan lungthin le kan ruahnak in kan dawt ko zongah tuahsernak a tel lo ahcun mah cucu a tlam a tling kho lo. Khrihfa taktak cu Pathian le midang caah thahnem santlai asi ahau. Mah cucu Pathian nih akan halmi asi.

A kan sertu, aka dawtu, akan thangcho tertu Pathian nih Amah cu kan lungthin dihlak le kan nunnak dihlak le kan ruahnak dihlak le kan thazang dihlak in kan dawt ding akan hal tu Pathian asi.