Jesuh A Thihnak le A Thawhthannak A Ruang

A thi lo dingmi minung kan umllo. Pathian aa timi viale zong hi minung an rak si cio caah an thi cio. Sihmanhsehlaw Pathian nih JESUH cu mithi hna sin khan a thawhter ṭhan, thihnak nih amah cu a tlaih peng khawhnak ding zeihmanh a um lo (Lamkaltu 2:24).Cu JESUH cu kannih nih kan biakmi, kan zumhmi Pathian asi. “Amah he kan thih ṭi ahcun, amah he nun zong kan nung ṭi lai. Kan in khawh peng ahcun, a uk zong amah he kan uk ṭi lai. Zumh awk tlak loin kan um hmanh ah, anih cu zumh awk tlaka si ko.( 2 Timothy 2:11 -13).

Minung a dingfelmi ahohmanh kan um lo ( Rom 3:10). Kannih nih, sualnak kan ngei lo, kan ti ahcun kanmah le kanmah kan i hlen a si i kan chungah biatak a um lo. (1 John 1:8). Kan sualnak nih hin Pathian he a kan tthen (Isaiah 59:2). 

Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi. Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang. (Rom 5: 8,10,11). Kannih cu Pathian nih vel akan ngeih hna caah akan khamh hna i khamhnak kan hmuh cu amah kan zumhnak thawngin a si. Khamhnak kan hmuhmi cu kanmah tuahmi a si lo, Pathian laksawng a si.(Efesa 2:8). Pathian nih cun amah mi hrimhrim si awkah a kan khamh i a kan auh; cucu kanmah tuahmi ruangah si loin amah nih aa tinhmi le vel a kan ngeih ca ruang tu ah khan a si.( 2 Timote 1:9).  

Hi tluk velngeihnak he akan dawtu Pathian cu upat ding asi i, zumh ding hrimhrim asi. Ahohmanh nih zumhnak loin Pathian lung ton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh.( Hebru 11:6). Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai.(1 John 1:9). 

Pathian nih a kan dawtnak a langhterning cu hitihin a si: a Fapa ngeihchun kha vawlei ah hin a run thlah i amah thawngin nunnak kan ngei lai. Dawtnak cu, Pathian kan rak dawt hi a si lo, amah nih a kan dawt i kan sual ngaihthiamnak caah a Fapa kan sinah a run thlah hi a si.( 1 Johan 4:9). 

Jesuh thawngin kannih cu thimmi miphun, Siangpahrang tlangbawi, miphun thiang, Pathian miphun hrimhrim kan si. Muihnak chungin amah ceunak chungah akan kotu hna Pathian nih khuaruahharmi thil a tuahmi thanh awkah kannih cu akan thimmi hna kan si. Hlanah cun kannih cu Pathian mi kan rak si lo, sihmanhsehlaw atu cu kan si cang; hlanah cun Pathian zaangfahnak kha kan rak hngal lo, sihmanhsehlaw a tu cu zaangfahnak kha kan hmuh cang.( 1 Peter 2:9).