BAWIPA HE I THAWK


Baibal: Phungthlukbia 16:1,3; Salm 128:1-2



Kum 2014, kum khat chungah kan hmuhtonmi aa dang cio lai. “Kum 2014 cu kum `ha, thluachuak kum” a timi an um lioah, “Kum chia, harnak kum” a timi zong an um len ve ko lai. Kum 2014 cu liamter siang loin tlaih peng a duhmi an um lioah liam zok seh tiin namchih a duhmi zong an um ve `hiam ko lai. Liam lai sian loin tlaih chih kan duh zongah kan tlai kho lo. Liam sok seh tiin nam chih kan duh len zongah a liam sok hlei lo. Kum le caan cu Pathian nih a fial hna ningin an kal ko. Kum cu kanmah nih kan tlaih thawngin a dir lo i, kan doi thawngin a tli hlei lo. Amah le a caan tein a kal ko i kum 2014 cu a liam ko cang. Amah le a caan tein a kal komi kum nih kan nunnak kum le caan a kal pi i, kum 2014 kan nunnak cu tuanbia ah an cang ko cang. Kum 2014 nih kan tuanbia a chiah tak cang. Remh awk le chap awk a `ha ti lo. Kum 2015 nih a `ial laimi tuanbia cahmai thar tu ah Bawipa he nun i thawk in tuanbia dawh, tuanbia `ha kan `ial ding a biapi.

Kum 2015 dongh zaan ah kum khat chung kan nunnak hmanthlak kan zoh `han te lai ding kha kan mitthlam in hei suai cia u silaw, cu tikah kan i ngaihchih sual lo ding kha atu tein timhtuahnak kan ngeih cia a herh. Timhtuahnak timi ah a biapi ngaimi cu chunmang (vision) `ha asiloah khuakhannak `ha ngeih hi a si. Phun dang cun, a fiang i a `hami tinhmi ngeih a herh. Cu kan i tinhmi, kan chungmang a tlin khawh nakhnga cu Bawipa he kum kan i thawk i, Bawipa he kar kan hlan`i i, Bawipa he kan dongh`i a herh.  

Zeiruangahdah Bawipa He I Thawk Kan Herh ti ahcun:
1.      Bawipa cu zeizong vialte sertu le uktu a si (Job 12:7-10; Kol. 1:16). 
2.      Bawipa cu kan nunnak thaw kengtu a si (Job 12:10)
3.      Bawipa cu kan khuakhannak le kan tuah`uanmi cungah hlawhtlinnak petu a si (Phungt. 16:1,3). 

Bawipa cu a kan ser i a kan uktu, kan nunnak thaw a kengtu le kan tuah`uanmi cungah bia ngeitu a si ruangah zeizong vialte hi Amah he kan thawk hrimhrim a herh. Bawipa tel loin zeihmanh tlam a tlin khawh lo zia Salm 127:1-2 nih fiang tein a kan chimh. Bawipa he hramthawk in nun kan timi nih a tanglei hna hi chim duhmi a si.
1.      Kan tuah laimi thil paoh ah lungtak tein thlacamnak he hram thawk kha a si. Rian`uan lai ah, rawl ei lai ah, zung kai lai ah, pakhatkhat ah kal lai ah, ti kholh lai ah, tbk, zei kan tuah lai paoh ah lungtak tein thlacamnak he thawk a herh. Kan tuahmi thil vialte hi Bawipa min in a si dih awk a si (Kol. 3:17).
2.      Kan tuahmi thil kipah Pathian ruah chih bu le hngalh chih buin tuah kha a si (Salm 91:14-16). Zei kan tuah hmanh ah Pathian kha hlawt hlah u sih. Pathian kan lungthin ah hmunhma pe loin um sual hlah u sih.
3.      Bawipa Pathian zumh ngamnak ngeih in bochan kha a si (Salm 27:3; 37:3-5,9).
4.      Cheuhra cheukhat hmaan te le tling tein pek (Mal. 3:10) le a dang pekchanhnak zongah siang tein pekchanh (Phungt. 11:24-25) kha a si.
5.      Zarh khat chungah ni hmasa a simi Zarhpi Ni (Johan 20:1) biakpumhnak le a dang pumhkhawmhnak ah felfai tein i pumh peng kha a si (Luka 11:23; Heb. 10:25).    

Cuti Bawipa he nun kan i thawk ahcun:
1.      Nunnak le daihnak kan hmu lai (Rom. 8:6).
2.      Kan nun cu tiva kam ah a khomi tingkung hring dildel in a um pengmi bantuk a si lai (Jer. 17:7-8; Salm 1, Phungt. 11:28).
3.      Amah nih a kan bawmh lai (Salm 37:5).
4.      Kan khuakhannak a tling kho lai (Phungt. 16:3).
5.      Khua awng kan pem lai, pawcawmnak khim kan hmu lai i, kan lung aa lawm lai (Salm 128:1-2).
Hi hna hi Amah aa bochan i, Amah he nun a thawkmi hna sinah Bawipa biakam a si.  

Tuluk ram Communist hruaitu Moshitung nih Mirang le Khrihfami a rak huat tuk hna caah Tuluk Communist pawl kha Khrihfa tei dingin chunzaan din loin fakpi in rian`uan a rak hnek hna. Zarh khat chung din loin ni sarih bak a `uanter hna. Asinain zarh khat chungah ni hmasabik a simi Zarhpi Ni cu Pathian thang`hatnak ah an hmang i, an nunnak Bawipa a pek hmasa i, Bawipa he nun an thawk i zarh khat chung Bawipa he caan a hmang `imi Khrihfa pawl tu an rum deuh kha a hmuh tik 6>7 (Six greater than seven – 6 cu 7 nakin a tam deuh or a ngan deuh) tiah a rak ti phah. Bawipa he nun i thawk a hlawk zia fiang tein a lang. Cucaah kum 2015 hi “BAWIPA HE I THAWK” u sihlaw kum 2015 hi kan caah thluachuak kum a si lai tiah ruahchannak le zumhnak ka ngei.  

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU