Thlachuah Co Daan le Reel Daan

Pangpar dum nuam ngaingaimi pakhat ah minung tampi nih zinglei sang le zaanlei pauhah exercise an tuah lengmang. Cu pangpar dum kalnak lam kamah daar kuang tete he changreu a zuarmi an tampi ve. Changreu hmete pakhat ah fang 5 asi. Tlangval pate pakhat cu zing chialin cu pangpar dum leiah a tli, exercise a tuah ve lengmang. Lam kam i changreu a zuar mi pitar nu pakhat a hmuh i a zaangfah caah changreu pakhat man, fang 5, cu a peek taak lengmang, changreu tu cu a ei ballo. Pitar nu cu a khuaruah a har, "kaa lawm tuk" a ti ; asinain, caan a sau deuh tikah zei ah a reel tilo. Zing chialte tlangval pa arak phanh tikah fang 5 cu a tthenh taak lengmang i pangpar dum leiah cun a tli lengmang. Zing zingkhat cu tlangval pa nih pitar nu fang 5, a tthenh hnu, pangpar dum lei ah a tlik hnik lioah pitar nu nih tlangval pa cu aw thang nawnpi khin a auh. Tlangval pa nih cun "hi pitar nu nih hin zei ko dah a ka chimh duh hnga" tiah arak i mer i, pitar nu chimh dingmi bia cu a hngah. Pitarnu nih cun, "Ka fa,....changreu man a kai cang, fang 5 a si tilo, tuzing thawk in fang 6 a si cang" tiah a ti. Tlangval pa nih cun fang 1 a pek chap i pangpar dum lei ah cun a tli. 

Pathian nih thlachuah thar tampi in akan peek lengmang ko. Thlachuah kan hmuh ka ah cun Pathian sinah kan i lawm tuk ko nain, a caan a rauh deuh tik pauhah Pathian sin lunglawmh biachimh kan philh hlei ah, kanmah lungduh ning pauhin Pathian sinah thlachuah kan hal chap lengmang. Pathian nih cun kan herhmi thlachuah cu a kan peek chap lengmang peng rih ve ko. Cu tluk Pathian that le lungsau reru ning cu!

Thaw kan thawt mi hna hi a si awk a si ko ti phun in maw kan reel hnga, Pathian sin ah lawmhnak bia kan chim tuk ballo. Thaw kan thawt mi hi i ruah ciammam in thawt ding si sehlaw kan philh caan a tamtuk hnga i nikhat hmanh kan nung men lai lo. Ni ceu dawh, ruahti kik, thli thiang, kaathawtnak, nuam te i i hngilh khawhnak, nikhat ah voi 2/3 nak in nihchuahnak...tbk..hi cawk awk va si sehlaw, kan cawk cawk lai lo dah. 

Zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna.1 Thes 5:18