THIHLOHNAK HI KHRIFA HNA NIH ZEITINDAH KAN HMUH AWK A SI?



Biahmaithi:    Thihlonak  hi mi vialte nih kan ton dih hnga mi a si tihi  Pathian bia nih fiangte in a kan chimh. { Zeicatiah thihnak nih a kan hngah cio ko ti hi minung hna nih kan hngalh zungzal awk a si. ( Phungchimtu 7: 2) } . Cucaah hi thihlonak kan ton tikah hin KHRIHFA HNA NIH ZEITINDAH KAN RUAH AWK A SI? ti hi kan I ruah ti hna lai. DAVID, JOB le PAUL,  hna  nih zeitindah thihlohnak hi an hmuh  ning a si tihi van zoh hna uh sih. 


 Pakhatnak: David nih thihlohnak a hmuh ning ( 2samuel 12:15-23)

            David cu Uriah nupi sin in a ngei mi fa a zaw i, a zual ngai tikah rawl ul in a bawk i thla a cam. Nain a thih ti thawng a theih tikah a tho i aa khawlh i sathau aa thuh i rawl a ei, cu tikah a sin um hna nih na tuah mi hi zeidah a si? tiah an hal. An hal hnawhchan duh mi cu zeicadah a nun lio ah cun rawl na ulh, na tap i a thih hnu tu ah, tap loin rawl na ei, i sathau nai thuh? Ti khi a si. Anmah Israel Phung ningah mi an thih tikah i tah le i ulh an hmang tawn tikah David nih hi ka i a tuah mi hi an Phung he ai keih(rem) loh. Nain David nih a let mi hna cu “hngachia  cu a nun lio ah a caah rawl ka ulh i ka tap, pathian nih a hei ka zangfak i a nun ter phum maw tiah. Nain a thih tikah zeicadah ka tap hnga i rawl cu ka ul len ti hnga, ka nunter kho ti lai maw?  Keimah tu a sin ah ka kal lai Sihhmanhselaw  amah cu ka sinah a rak kir ti lai loh tiah a ti”.( 2samuel 12: 23). Hi ka hi David nih a hmuh ning cu taksa in a thih mi cu taksa in kan sinah zeitik hmanh ah an rak kir ti lai loh nain zungzalin kan I then lai loh . Nini khat ah kan mah a nun lio mi tu hi an sinah kan kal te lai ti hi an kan chimh. Cucaah U le Nau hna khrihfa hna nih thihlohnak kan ton tikah David bantuk in Zumhnak he kanmah tu an sinah kan kal te lai ti kho ve hna u sih. Cun David bantuk in kan nun lio tu ah hin i sunsak hna u sih, kan thih hnu i, i sunsak tuk le thlan(thlanlung) hna rumra ngei tak in i tuah piak nain nun lio i, i dawt, i hmaizah, i bawmchan le thla i cam piak hi biapi deuh ah ruat  hna u sih.  


Pahninhnak : Job nih thihlohnak a hmuh ning (Job 1: 12-19)

            Harnak le ngeihchiat nak minung nih a ton khawh mi vialte cu Job nih hin a ton dih ko tining law ka palh lem lai lo dah! A tuanbia kan thei mi a si ko caah ka van chim ti lai loh. Zatlak nak chimpit in a ton,( a ngeihmi satil le inn le lo a ciam dih), thihlohnak chimpit in  a ton ( fanu pa 3 le fapa 7  nikhat ah an thih dih), zawtnak fahnak chimpit in a ton ( a kechik in a luthlung tiang hma le rung in a khat). Hi ah hin ka lak duh mi cu thihlohnak a ton mi hi a si. Thihnak hi minung sinak ah a fak bikmi thil a si ka ti lai. Thihlohnak ton cu a fah ning hi chimthiam a si loh.  Nain Job, Pathian sal pa hi i siter hmanh fanu pa 3 le fapa pa 7 ni khat i thih dih ko cu. Nain Job nih thihlohnak hi zeitindah a hmuh ti hi van zoh hna uh sih. (Job 1:21) Cun aa thawh i, “ Ka nu paw chungin tak lawng in ka chuak i taklawng in ka kir than lai ; Bawipa nih a ka pek i Bawipa nih a lak than Bawipa min cu thangthat si ko seh” tiah a ti. Cucaah Job bantuk in Zeizong vialte hi Pathian ta an si dih ko : kan u, kan nau, kan nu, kan pa, kan fanu le kan fapa, kan ngeichia thilri vialte zong si hna seh Pathian  kut ah an um dih tiin kan ruah ah cun thihlohnak kan ton tikah a tuar zia a awl deuh ngai hnga. Zeicatiah kanmah ta bantuk in kan ruat tuk tikah a fak khun. Cucaah Krihfa hna nih cun kan zeizong vialte( kan u, kan nau, ka nu, kan pa, kan fanu, kan fapa etc…) le kanmah kan pum hrimhrim hi Pathian ta an si dih tiin kan ruat  awk a si.   


Pathumnak : Paul nih thihlohnak a hmuh ning ( 1Thesalon 4:13,14 )

            Biakamthar  Thesalon cakuat chung kan zoh tikah Paul nih thihlohnak kong a hmuh ning tha tein kan hmuh khawh. Pathian rian tuan tu tampi nih thihlohnak a tongmi caah phung chim tikah  kan ngeih a chiat awk a si loh an ti sual  tawn. Khrihfa kan si caah ruah chan nak kan ngei ko I ngeih chiat ding a si loh an ti duhnak zong a si ko men hnga nain minung kan si caah ngeih chiat phung a si I tap zong hi kan ngeih chiat nak diriam nak caah a si I thlauh ding a si thlu loh nain an ngandam nak thih tiang in tap bel cu a tha hnga loh. Cucaah a zatawk in ngeih chiat ding zong a si ko zeicatiah Bible nih nan ngeih va chia hlah uh a ti  loh. Mi cheu nih  1Thesalon 4:13 ah pei, “ nan ngei va chia hlah uh..a thih cia mi hna kongah ..”A ti cu tiah an ti men lai. Nain tha tein kan zoh tikah “Ruahchannak a ngei lo mi hna(zumlotu hna ) bantuk in nan ngei va chia hlah uh, a thih cia mi hna kongah” a ti. “Bantuk in” a ti tikah, a chim duh mi cu,  Zum lo tu hna cu an thih ni khi an donghnak a si caah an ngeih a chiat awk a si nain kan nih zumtu cu kan thih ni khi kan donghnak a si loh. Ruahchannak kan ngei ko caah zum lotu hna bantuk in kan ngei  a chiat awk a si loh a tinak khi a si hnga. Cucaah Paul nih  a hmuh ningah cun thihlohnak kan ton tikah kan ngei a chiat awk a si ko nain zum lo tu hna bantuk in zeihmanh tuah zuam loh, zeizong vialte a dih ti phun in ngeihchiat in um khi a kan duh pi loh. Zumhtu kan si bantuk in thihlohnak hi Bible nih a hmuh ning le a ruah ning bantuk in a ruah, le a hmuh thiam I zuam hna uh sih. 


Tlangkomh:

Pakhat nak : David nih thihlohnak a hmuh ning ah cun, “a kan liamtak mi hna cu kan sinah taksa in an rak kir ti lai loh nain kan nih a nun lio mi hna tu an sinah kan kal te lai”.

Pahninhnak : Job nih thihlohnak a hmuh ning ah cun, “zeizong vialte hi Pathian ta an si dih ko I amah kut chungah an um dih, tak lawng in kan rak chuak bantuk in tak lawng in kan kir than ko lai,  Zeihmanh kan ta an um loh”. 

Pathumnak:   Paul nih a hmuh ning ah cun “thihlohnak kan ton tikah taksa in kan ngeih a chiat awk a si ko,  nain zumh lo tu hna bantuk in ruahchannak ngei lo in kan ngeih a chiat awk a si loh ”



BAWIPA NIH THLUACHUAH IN PEK KO HNA SEH

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU

Pathian Kan Sinah A Um