NANNIH TAH, AHO ASI NAN KA TI DAH?

Cun a thawh hna i, “Nannih tah, a ho a sin an ka ti dah?” tiah a hal hna. Simon Peter nih a leh i, “A nungmi Pathian fapa, Messiah khan asi,” tiah a ti. Jesuh nih cun, Johan fapa Simon,  mi van tha ngaingai na si! Zeicahtiah hi biatak cu minung sinin na hgalhmi asi lo i vancung i a ummi ka Pa nih an pekmi asi, tiah a ti (Mt. 16:16-17).

Rev. Chan Hnin

Biahmaithi:  Jesuh nih a zultu hna cu, “Mi nih Mi Fapa hi aho asi, an ka ti dah?” tiah a hal hna tikah zultu hna nih,”A cheu nih Tipil petu Johan asi, an in ti. A cheu nih, Elijah asi, an in ti, a cheu nih Jeremiah maw prophet pakhatkhat dih asi, an in ti” tiah fawi tein an leh khawh ko nain, nannih tah, aho asi  nan ka ti dah? tiah a hal hna tikah fawi tein an leh kho ti lo. Zeicahtiah mi nih an timi kha chimawk a tha ti lo, anmah hmuhning taktak kha chim ding asi cang caah asi. Bible Sianginn ah amah nih a ti, timi cu tampi cawn le rel asi bantukin tampi chim khawh zong asi ve ko. Asinain hi biahalnak nih a langhtermi cu mi nih an ti, timi lawngin a zaa lo, mahnih hmuhmi le theih taktakmi a biapinak kha asi. Kan theih fiang deuhnak dingah a tanglei hna hi kan zoh hna lai.

01.  Saul le Jesuh an i tonnak: Saul cu an biaknak le  a Pathian a tanh tuknak  ah Khrihfami hna kha a rak hrem hna(Fili.3:6). Asinain  kha tlukin biaknak ah aa zuammi kha Damaskas  khua pongah Jesuh nih a ton tikah a thei lo. “Ahodah na si” tiah a ti(Lam. 9:5). Aruang cu biaknakmi lawng a rak si i, Jesuh kha a nunnak in arak tong rih lo caah asi.  Cucaah Biaknak ah a zuam ngaimi hna le a fel ngaimi vialte hna hi zumtu an si dih lo tinak a langhter. Saul cu Jesuh he an iton hnu, Saul in Paul ah thlen asi hnu lawngah zultu hna sinah a va kal i “Jesuh cu Pathian Fapa asi,”tiah a chimh khawh(Lam.9:20). Cucaah Jesuh sinin phuannak kha nunnak in a ton taktak hnu, nun thlennak a um hnu lawngah Jesuh kong kha fiang tein a chim khawh ti kha kan hmuh.  

02.  Kleopas le a hawipa, Jesuh he an i tonnak: Kleopas le a nupi Mary hi Jesuh cu Judah ram Siangpahrang asilai tiah arak hngakmi an si. Jesuh Khrih a thih hnu a thawhthan ni ah Kleopas le a hawipa cu Emmaus khua lei kalnak lampi ahkhan Jesuh Khrih thawhthannak kong kha an iceih len, cu lioah Jesuh nih a naih hna i zei kong dah nan i ceih len ko tiah a hal hna(Lk. 24:17). Jesuh kong an iceih len ko nain Jesuh nih a ton hna tikah Jesuh kha an thei kho lo. Minih an chimhmi le mi dang sinin an theihmi lawng kha an i ceih len ko. Jesuh nih an nunnak ah aa phuang i an lung a fimter hna hnu lawngah Jesuh asi kha an theih fiang khawh ti kha kan hmuh.

 03.  Isrealmi le Mana changreu: Mana timi cu Changreu tinak asi lo, “zeidah” tinak asi. Pathian sinin pekmi kha an thei lo ruangah “zeidah asi?” tiah pakhat le pakhat an i halmi biahalnak asi. Cu biahalnak cu “Mana changreu” tiin min ah a cang. Bawipa nih ei awk caah an pekmi asi tiah Moses nih a ti hna(Ex.16:15). Pathian nih kan caah zeidah a tuah timi Isreal mi hna nih an theih lo lio ah Moses nih Bawipa tuahmi a chim khawhnak cu Pathian sinin biathli, Pathian nih a theihter caah asi. Isrealmi nih an theih khawh lonak cu an hrut ruangah asi lo, Pathian sinin theihternak a um lo caah asi ti kha kan hmuh.

04.  Jesuh le Samarianu: Samaria minu cu Jakop tikhor ah ti a van thannak ah Jesuh he an i tong i, Jesuh kha a hmuh fiang tikah khua chungah a va kal i Jesuh kong kha fiang tein a chimh khawh hna, ti kha kan hmuh(Jn.4:28-30). Misifah, mirum, mifim le misual thledan lo, a nunnak in a tongmi paohnih Jesuh kha an hmuh fiang khawh i, an hmuhmi Jesuh kong kha fiang tein an chim khawh tinak a langhter. 

A donghnak: Nihin ah Bible chungah Jesuh cu Messiah asi tiin kan hmuhmi hi kanmah nih kan timi asi lo. Pathianmi hna le zultu hna nih an rak timi asi.  Cu bia cu  kan zumh i kan nunnak nih a ton taktak lawngah kanmah nih kan timi kha kan chim khawh lai. Mi nih an timi lawng tampi theih le hngalh, cawn le thiam cu Jesuh nih a lung asi lo caah hi biahalnak hi a hal hna nak asi. Zultu (12) an si ko nain Peter lawng nih Jesuh cu Messiah asi tiah a chim khawhnak cu Pathian sinin theihternak a co caah asi. Vawlei ahhin cawnnak le thiamnak lawngin cun minih an ti timi lawng chim a fawi ngai. Cucu cawnnak le thiamnak a herh lo tinak asi lo, zei thil paoh hi nunnak in ton taktak hnu lawngah fiang tein chim khawh asi. Vawlei cungah Bible a thiam bikmi cu Satan asi ko lai. Asinain Pathian a thangthat kho hlei lo. Bible ca hi a thiam lawngin thiam ding si lo. 

Jesuh nih Peter kha biatak cu minung sinin asi lo, Pathian sinin asi tiah a ti tikah Thiang thlarau  phuannak le theihternak a um lo ahcun Jesuh hi hmuh fiang khawh asi lo tinak a langhter. Peter sinah Pathian nih a theihter bantukin kan nunnak ah Thiang thlarau sinin theihternak kha a biapi ngaingai. Cucu amah kha kan hmuh fiang chinchin khawhnak ding caah asi.

Kan zapi caah Pathian nih thlua kan chuah piak hram koseh. Amen.