Vanram A Um Lo, Hell Zong A Um Fawn Lo

"Thih hnu nun tthannak le vanram nih akan hngah ko timi hi tuanbia bantuk men asi i, thihnak a ttihmi caah asi ( A belief that heaven or an afterlife awaits us is a "fairy story" for people afraid of death) . Kan thluak nih rian a ttuan lo hnu cun zei pauh hi adih cang ko caah mithi cu a rawk cangmi computer bantuk kan si"  Hi bia hi  Stephen Hawking nih The Guardian thawngzamhca he May 2011 lio bia an i ruahnak ah arak chimhmi bia asi. 

Van le vawlei le a chung um thilri le minung kongkau a hlattlaitu a nung rihmi scientist hna lakah a thiamsangbik pakhat asi lai tiah ruahmi Stephen Hawking biachimhmi hi mi tampi nih an i laak ngaingai mi asi. Thil thar tampi an sersiam i minung thanchonak caah thil ttha tampi a tuahtu an si fawn. Asinain, an hlattlai cuahmahmi van le vawlei le a chung um thilti vialte a sertu Pathian hi, a um lo tiah an ruah. Pathian a um lo atimi caah cun Pathian umnak vanram zong a um awk a ttha tilo.

Vanram hi mi tlamtling mi caah asi. Vawlei cungah a ho hmanh kan tlamtling lo. (Romans 3:9, 3:23). Ka tlamtling ko, ka suallo kan i ti ko rih ahcun kanmah le kanmah kan i hlen hi a si. (1 Jh 1:8); mah le mah cu i hlen khawh phung a si lo. Kanmah pumpak i zuam nak in Pathian hmai ah mi tlamtling kan si kho lo, thiam kan co kho lo. Kan sualnak nih hin Pathian he a kan tthen (Isaiah 59:2). Thiam coter kho tu, lam hmuhsaktu kan herh, biatak kan herh. Jesuh cu lam le biatak le nunnak cu a si. Jesuh thawngin dah ti lo cun Pathian sin phanh khawh a si lo (Johan 14:6). Jesuh cu biatak a si i cu biatak cu kan luatnak a si (Johan 8:32). Kan caah Pathian i aa timhlamhnak sang bik cu Jesuh thawngin sualnak in a kan tlanh hi a si. Jesuh nih amah muisam keng in a kan ser (Gen 1:27) i, hi vawlei ah Van nunzia a cawng chung dingin a kan chiah. 

Van nun kan co khawh nakhnga Pathian nih afapa ngeihchun pek ngam tiangin vawlei hi a dawt (John 3:16). Cu Jesuh nih cun vailamtah cungah a nunnak pek tiangin nangmah le keimah a kan dawt. Vailamtahnak vanlam asi. Vailamtahnak i Khrih a thihnak kong hi a tlau lio lengmangmi hna caah cun pakpalawng bia a si ko, sihmanhsehlaw khamh lio lengmangmi hna kannih caah cun Pathian hmual a si. (I Cor 1:18). Jesuh cu sualnak chungin a ka khamtu le a ka tlantu asi tiah a zummi ahopauh nih Vanram ah zungzal nunnak kan co lai. Vanram hi ahodang ca hmanh siloin, Pathian a zummi kanmah caah sermi asi.

Cu asi caah, Pathian a zumlotu hna caah Vanram a um lo i, Pathian a zumtu hna ca zongah Hell a um ve lo.

Comments

Popular posts from this blog

Zohchun Awktlak Khrihfa Innchungkhar

Zumh Awktlak Nun

Bawipa Cu A Tha