Pathian Kan Zeizong

 01.Pathian kan Siibawi

        1980 kum  in 1984 kum tiang Zomi Baptist Convention ( Chin Baptist Convention ) nih Paletwa peng ah ramthar rian( Ahmasa bik Paletwa Baptist Mission Field dirh dingin )  ttuan dingin an rak kan thlah hlanah hin Zunthlum , thithlum ,pawfahnak ,raifanh ,lu hrapcheu fah zawtnak hna ka rak ngeih i atuar ahar ngaingai. Ka ngandamnak arak tha hrimhrim lo . Cu ruangah akan daw ve mi Pu Lal Hngin Loa ( HA ,Hnaring ) nih, "Paletwa ah kal hlah na thi sual lai" arak ka ti . 

        Cu lioah ZBC nih kan Area ah voithum tiang an rak hal i an ka siang lo . Avoi 4 nak ah  TABC General Secretary arak ttuanmi Rev.Sang Awr ( Sangpui pa ) nih TABC Youth Secretary caah arak kan hal tikah Hnaring A ah kan Area Emergency Meeting an auh i an ceih than .EC nih TABC Youth Secretary caah peknak cun Thlarau atlaumi zawn ruahah Meeting akai mi vialte nih mitthli he Paletwa ramthar rian ttuannak ah kal ko seh tiah biachahnak an ngei. 

        Kan khua Surngen in kan i thawh i Thantlang ,Hakha ,Falam ,Falam in Kalaymyo kan kal ah lam ah rai nih arak ka fanh colh. Cu lio KVBA Youth Director attuantu kan u asi mi Rev.Peter Thang Hlun ( Vumpi pa ) te inn ah kan i thumh i Siikhan ah aka kalpi i Quinine an ka chunh . Rai nih aka  fanh bu Mandalay ah kan lanh i kan nu he Mandalay tlang kan va kai . Pura tam pi aumnak ah hman kan i thlak . Aruang cu kan ram hi zuk abiakmi ram asi i zei tluk in dah ramthar rian tuanvo kan ngeih ti theih pengnak caah kan i thlakmi asi. 

        Yangon kan phak i Grace nu zong adam ve lo caah Nu Siizung nganbik ah kan u a si mi Htin Aung nu nih akal pi . Keimah zong Siikhan ah ka kal ve . 

        Yangon in Sittwe ah Vanlawng in kan kal .Sittwe in Paletwa ah Sangphawlawng ( Ship ) in kan kal . Lam ah zan khat kan riak i athaizingah Paletwa kan phan. 

         Paletwa vulei kan lamh in Siibawi sin in treatment lak lo te in Pa Pathian nih aka dam ter i atu ka damnak hi kum 34 asi cang . 

         Zeicah tiah 1983 kum Yangon ka kal lioah aka check tikah, "Zun thlum le thi thlum na ngei ti lo" an ka ti . Ka relh lo i Singapore ah Siibawi attuanmi kaa check ter tthan i,"na dam" a ka ti thiam thiam . "Pathian cu akan dam tertu Bawipa asi tak tak ko .

 

Exodus 15:26 ; Bawipa nan Pathian ka bia ttha tein nan ngaih i a ding ka timi kha nan tuah i ka nawlbia kha nan zulh hna i ka phunglam    kha nan tuah hna ahcun, Izipt mi cungah ka tluntermi rai kha nan cungah ka tlunter lai lo. Keimah cu an damtertu hna Bawipa ka si," a ti.

 

02.Pathian ( Jesuh Khrih ) cu kan Advocate ( Sihni )  asi .

        1987 kum in 1979 kum tiang hi Chindwin Mission Field ( Monywa in Phaungpin tiang ) dirh dingah ZBC nih an rak kan thlah than. Cu lio ah Chindwin Baptist Mission Field Chairman hi Pu Hrang Uk ( Sung Sung pa ) arak si. Amah hi Trade Manager arak si i acozah aiawh in Sahtunglung nih taza an rak cuai lio asi . Curuangah anupi Pi Chiah Tial ( Sung Sung nu ) nih ava luat khawhnak dingah tiah experience angeih tak takmi Kawl Sihni  tar pa pakhat le aleklak tak takmi Kawl Sihni mino te pakhat arak hlang hna . Cu Sihni pa hnih hlannak dingah cun phaisa tampi an rak dih ko lai . 

         Keimah nih cun Sung Sung nu Sihni nan hlanmi nak in Pathian rian ttuannak hna ah pe u law ahlawk deuh lai tiah ka rak ti. Zei cah tiah Sung Sung pa hi Sihni pa hnih na hlan ruangah aluat lai lo. Asi na in Bawi Jesuh Khrih thawng in aluat hrim hrim lai ka rak ti. Voikhat cu Sung Sung pa kha Biakinn ah thla kan cam lai tiah ka sawm pah i Biakinn ah cun kan pahnih te in kan kal. Biakinn kan phak ah cun Pulpit lei hoih in kan khuk bil in thla kan cam tti . Tlawmpal arauh ah Sung Sung pa cu thla cam ti loin thutdan cungah athu ko.Ka mit ka au lo nain thlacam ti lo in tthutdan cungah a thu ko ti kha ka hngalh. 

        Kei tu cu thla cu apeh thluahmah in ka cam ko .Saunawnpi ka cam hnu ah Amen ka pek tik ah cun Sung Sung pa cu thlacam lo in thutdan cungah cun athu tak tak ko. "Ziah Sung Sung pa thla na cam lo?" ka ti . "Pastor pa, thla ka cam zongah taza an ka cuaimi hi ka tei  lai lo. Zeicah tiah thla ka cam ah ka hmuhmi hi atha lo" aka ti i,  "zeidah na hmuh ka ti tikah, "Solo /Deut asatu pawl nih hla cauk an chiahnak tungah khan Rul nganpi nih azel i akaa a aang i dolh aka timh" ati . "Ka mit ka au ahcun atlau i ka mit kaa chin i thla ka cam cangka Rulpi cu ka hmai ah arak lang than i cuk aka timh peng" aka ti. "Cu ruangah cun ka hmuh mi thil atha ti lo caah thlacam lo in ka thutnak a si" aka ti. Keimah nih cun, "Sung Sung pa mah cucu Setan rian ttuannak pei asi ko cu . Kan nih cu Setan rian ttuannak Teitu ah pei Pathian nih akan ser ko cu" tiah ka hei ti . Luke 9:1 - 2; 10:20. "Cu na hmuhmi nih akan donh kho tung lo .Teinak cu Pathian ta asi ko cu" ka ti. Malakhi 2:10 

         Cu ti cun Sung Sung pa case ateinak ding caah hin hmunkip in Khrihfabu pawl le Zumtu tampi hna nih thla kan cam piak cio lai tiah ka zumh ko. Sung Sung pa cu Biaceihnak Zungah cun kal leng mang asi ko. 

         Voikhat cu Kalaymyo ah Chindwin Field Mission caah Committee meeting kan tuah. Acaan cu 20th July 1989 ah asi .Cu lio ah keimah cu ZBC ah Mission Secretary ka ttuan cang. Kan Meeting ah cun Sung Sung pa cu Chindwin Mission Field Chairman asi caah kan Meeting hruaitu asi . Cu tin meeting kan tuah cuahmah lio pi ah cun zan 08:00pm Radio nih thawng athanh thluahmah ko . Cu athanhmi thawngpang ah cun Cukum cu thla cu caan ah acozah nih taza acuaimi pawl cu tazate in luat ter asi cang timi Amnesty thawng athanh ai. Cu caan cu Sung Sung pa taza anrak cuai caan bak a si ngelcel. Cu ruangah Sung Sung pa cu 20th July 1989 zan 08:00pm in Tazate bak in aluat i athaizing cu Sung Sung pa cu Trade Manager dirhmun in zung akai than cang . Pathian kan luatnak le kan Sihni tha bik asi. 

Johan 8:32 ; Biatak cu nan hngalh lai i biatak nih cun an luatter hna lai.   1Tim 2:5 ; Pathian cu pakhat lawng a si i Pathian le minung kar ah remnak sertu cu minung Khrih Jesuh lawng a si. 

03.Pathian cu kan Contact Person asi tak tak ko

        Mission Filed Kalaywah ah kan um lio ah Kalaywah Baptist Church Compound kau deuh ding in Sayama Khua Cuai cu kan fa le paruk he Kalaymyo peng ah bawmh nak hal ah khual atlawn lio asi. Keimah cu Kalaywah kan Khrihfabu zohkhenh ah inn ah ka um lio a si. Cu lio ah cun Falam in sayama nu kha na hmatpungtin kong rak la zok zok an rak ti caah Sayama Khua Cuai ai awh in Gospel team hruaitu ding ah Thasi khua i an Khrihfa upa Palik pension alaa cangmi U Shwe Toe nih va thlen seh ti kan duh i nihin thawng kan theih ah thiamtuh ah va thlen aherh cang i ni hnih lawng caan kan ngei cang.

       Kalaywah inThasi khua ah aum mi U Shwe Toe auhnak ding caah telephone aum lo.Thilhri tuknak ding zong aum lo.Cu ruangah thawngpang kan theih zan ah cun kan nu va in Pathian sin ah thla kan cam mi cu Pa Pathian U Shwe Toe kha tuzan kan chimh piak law thaizing zingka te in rak i thawh seh law kan sin rak phan seh tiah thla kan cam . Thasi khua Minking peng in Kalaywah rak phan ding cu U Shwe Toe  Kum 65 hlei asi cang mi nih nihnih arak kal tawnnak asi .

        Thaizing zaanlei 07:00pm ah U Shwe Toe cu kan inn hmai Palik station hmai khin, "Sayataw Sayataw (Sayapa Sayapa) zei ruangah dah Kalaywah nihin rak phan tiah na ka auh?" ti in fak nawn pi khin a au bu in kan inn cu arak phan . "U Shwe Toe zahan ah khan auh kan i duh tuk ko na in telephone aum fawn lo, thilhri tuk ding zong aum fawn lo caah, maw kan Pa Pathian U Shwe Toe kha kan chimh piak law thaizing Kalaywah kan inn ah a rak phak ding in nangmah nih kan chimh piak hram tiah thla kancam mi asi .Kanmah nih kan i auh lo" tiah ka ti ve.

         Amah nih a ka chimhmi cu zahan kan ih hlan ah ka nupi he, "thaizing khua adei lai i Lo ah peikhing ah pei lak ding in kan kal lai tiah bia kan i ruah cangmi asi .Asinain tuzing khua adei hlan pi ah khin U Shwe Toe ,U Shwe Toe ; Tho ,Tho ;Sayataw Timothy Pa Hrang nih an herh nihin bak ah Kalaywah phan ding in i thawh tiah aka auh i khua ka zoh ah ka hmuh fawn lo.Cucu ka nupi ka chim tikah kal ding ah amah zong nih alung atling ve caah tuan tein rawl aka chumh piak i ka ei hnu ah chuncaw aka rawnh i zingka tuan te ah ka rak i thawh i atu ka rak phan nak hi asi" tiah a kati.

 

Cu ruangah Pathian cu Telephone le thilhri um lonak zong ah kan zeizong asi zia alangh tertu Pa Pathian asi ko . Cu ti cun athaizingah Kalemyo ah cun Sayama khua Cuai cu acan khel in ava thleng manh .

 

Pathian cu kan Contact Person asi tak tak ko . 1Timothy 2:5