BAWIPA KUT TLAIH BUIN A KAN HRUAINAK KIP AH ZUL U SIH

Bawipa nih, “Na zulh awk hnga lam kha kan hmuhsak lai, kan cawnpiak lai i lungthin kan cheuh lai” (Salm 32:8)

Ngakchia cheu khat cu nu le pa nih an kut in hruai i an kalpi lioah “ka nu, ka pa ka thlah, keimah tein ka kal lai” an ti i anmah duhnak paoh an tli an le. Cu bantuk ngakchia cu motor le cycle hna nih pah sual a fawi. Lam palh a fawi. Lam tlau a fawi. Ral a tam. Thin a phang. Lung a dai lo. Hna a ngam lo. Cucu “Duh tlawng” a duhmi ngakchia nih an hngal kho lo.

Pathian nih kan kut in hruai a kan duh. Sihmanhsehlaw “Bawipa, ka thlah rih ko, keimah tein ka kal ko lai” tiah kan al theo tawn. Pathian nih hruai nakin kanmah tein zalong tein kal kan duh deuh caan tampi a um. Kanmah tein kal cu za a long a deuh i a nuam deuh in kan thei. Nain, kan ral tampi an um kha kan hmu kho tawn lo. Bawipa loin kal cu ral a tam. Tih a nung. Lung a dai lo. Hna a ngam lo. Hna hnawhnak le buaibainak a tam. Bawipa lo cun zei can hmanh kan kal kho lo. Bawipa kut i tlaih in amah hruainak ah kal cu a him, hna a ngam, lung a nuam, thinlung a dai, i thla a lum.

Bawipa he um ṭi cu lungdaih hnangamnak a si. Cu biathli a hngaltu hna nih cun Bawipa cu “ZUNGZAL NANGMAH KAN HERH, nangmah loin zei can hmanh ka kal kho lo. Nangmah nih ka hruai law ka kalpi ko, ka nunnak kan pek, na ka hruainak kipah kan zulh lai” tiah Bawipa sinah nun an i hun i an nunnak cu Bawipa an pek. Annie S. Hawks nih cun hitihin hla a phuah (KHB 309).  

1.      Zungzal Nangmah kan herh, Nun ṭha Bawipa,

Nangmah aw nem lawng nih, Ka hna-ngamter,

Kan herh ko, maw kan herh ko,

A zungzal kan herh ko,

Atu thluachuah ka pe tuah,

Na sin ka ra

2.      Zungzal Nangmah kan herh, Run ka naih tuah,

Tukforh ka in tikah, A ka tei lo.

3.      Zungzal Nangmah kan herh, Lawmh caan zongah,

Nangmah tel lo in cun, Nun ṭha-hnem lo

4.      Zungzal Nangmah kan herh, Na duhnak cu,

Nifa ka tuah nakhnga, Ka cawnpiak tuah

5.      Zungzal Nangmah kan herh, A Thiang bikmi,

Na mi ka siter tuah, Maw Pathian Fa

Hi hla nih hin Bawipa loin nun a ṭhahmen lo zia le Bawipa he nun a va sunglawi zia, hna a ngam zia a langhter. Hi hla sak pah in kan nunnak dihlak Bawipa sin pe u sih. “Bawipa, ka nunnak ah a herhmi vialte keimah tein ṭuanvo kaa lak kho lo nangmah tu nih ṭuanvo ka lak ko” tiah Bawipa sinah na nunnak dih lakah na pek ah cun na nun ah a herhmi vialte ṭuanvo an latu cu Bawipa a si lai. Kan nunnak caah a herhmi vialte hi kanmah tein ṭuanvo kan i lak dih kho hrimhrim lo. Kan herhmi vialte a hngalh i ṭuanvo a kan lakpiak khotu cu kan biakmi Pathian lawnglawng a si.

Cucaah Bawipa, zungzal nangmah kan herh, nangmah nih ka hruai zungzal ti u si law Khrihfa Hlabu No. 46 sa tuah u sih.

1.      Pathian nih a ka hruai zungzal, Vancung lungdaihnak in a khat,

Ka tuahnak le ka umnak ah, Jesuh kut in a ka hruai ko.

A ka hruai ko, A ka hruai ko, Amah kut in a ka hruai ko,

A kut in a ka hruai ca ah, Lung fek zulhnak ka lung a si.

2.      A caanah sifahnak lakah, A caan ah lunglawmhnak lakah,

Ti daihnak le tilet lak ah, Jesuh kut in a ka hruai ko.

3.      Bawipa, na kut tlaih ka duh ko, Zeitik hmanh ah al ka duh lo,

Khuazei hmanh ah na ka hruai ca'h, Hnangam te in ka um zungzal.

Hi hla phuahtu Joseph H. Gilmore nih “Bawipa, na kut tlaih ka duh ko, Zeitik hmanh ah al ka duh lo” a ti bantuk in Bawipa nih kan kut tlaih in hruai, kalpi a kan duh lio ah al lo tein Bawipa kut cu i tlaih peng u sihlaw a kan hruainak kip ah zul zungzal u sih. Bawipa nih, “Na zulh awk hnga lam kha kan hmuhsak lai, kan cawnpiak lai i lungthin kan cheuh lai” tiah a kan ti (Salm 32:8). Bawipa nih a kan hmuhsakmi le a kan cawnpiakmi lam hi Amah kut tlaih buin zul u sih. Bawipa he cun khua zeihmanh ah kan kal kho. BAWIPA KUT TLAIH BUIN A KAN HRUAINAK KIP AH KAL U SIH.