Santlai Lomi Kha Santlaimi Ah

Filemon 1:11: Hlanah cun na caah santlaihnak zeihmanh a rak ngei taktak lo, sihmanhsehlaw atu cu nangmah ca he keimah ca he santlaimi a si cang (cang 12-14, 16, 18 rel chih) 
Hi Filemon cakuat hi cakuat tawite a si nain nunzia dawh tampi a kan chimtu cakuat a si. Filemon cakuat hi Paul nih Colossa khua Khrihfa hruaitu mirum pakhat a simi Filemon sinah Rom thonginn in a kuatmi ca a si. A kuat chan cu dinfel loin a um i a sinin a zammi a salpa Onesimas kha ṭha tein cohlan ṭhan dingin a nawlnak a si. Bawi pakhat dirhmun in, Filemon nih a salpa Onesimas (a sinin a zammi) cohlan ṭhan ding hi a har taktakmi thil a si. Zeicahtiah, hi lio chan ah sal cu an bawile nih an duh ah an zuar khawh i an thah khawh. Filemon nih hin Onesimas hi zuarnak nawl le thahnak nawl a ngei. Cu tluk in nawl a ngeih ko nain zei harnak hmanh pek loin ngaihthiam ṭhan i cohlan ṭhan ding hi a fawi hrimhrim lomi thil a si. Nain, a ngaihthiam khawh i a cohlan khawh ruangah Onesimas cu Bishop tiang ah aa chuah ti si.

Hi Filemon cakuat nih a kan cawnpiakmi cu:


1.    Thawngṭhabia nih zeitluk misual hmanh kha a thlen khawh i santlaimi ah a ser khawh. Onesimas hi a bawipa Filemon thil pakhatkhat a fir i a tli tiah Baibal thiam cheu khat nih an ti. A bawipa Filemon sinin a tli i Rome thonginn a va phan. Paul he thonginn ah an i tong i Paul nih thawngṭha a chimhnak in a lung aa thleng. Khrih dawtnak thawngṭha nih cun cu misual pa Onesimas lungthin cu a thlen phut ko. Din lonak le nawl ngaih lonak in a tli cangmi Onesimus kha thawngṭha nih a ciah tikah dingmi le nawl ngaimi ah aa thlen. Sal dirhmun in Pathian rianṭuantu dirhmun ah aa thleng. Thawngṭha nih a nun a cawi sang. Sualnak in a khat i Pathian sinin a rak zammi sihmanh usihlaw Jesuh Khrih dawtnak thawngṭha kan theih tikah, cu thawngṭha nih cun zumhtlak a simi le nawl a ngaimi ah a kan thlen awk a si.


2.    Kan nun ah mi nih tehte an khan khawh ding a biapi. Onesimas cu mihrokhrol, santlailo le a bawipa sin in a zammi sal ṭha lo a rak si. Sihmanhsehlaw thawngṭhabia nih a nun a thlen tikah Paul nih, “Hlanah cun na caah santlaihnak zeihmanh a rak ngei taktak lo, sihmanhsehlaw atu cu nangmah ca he keimah ca he santlaimi a si cang” tiah a nun ah tehte a khan i aamah zong a khan ngam (c. 11). Kan nun zoh in a ho tal nih tehte an khan bal maw? Kan nun ah a ho tal nih zumh ngamnak he aamah an khan ngam lai maw? Kan nun ah mi nih tehte an khan khawh ding hi a biapi ngaimi a si.


3.    Mi le mi kar ah remnak sertu si ding a kan cawnpiak. Paul nih Onesimus hi a hngal tuk lem lo. Filemon zong a hngalhtukmi le aa kom tukmi an si lai lo ti cu a biachim dan in ruahdomh khawh a si (cang 5-7, 17). Sihmanhsehlaw a cungah ṭhat lonak a tuahmi le lei a batmi vialte cham piak ding tiangin a bawipa Filemon cu a nawl piak. Paul nih Filemon le Onesimas an i rem ṭhannak ding caah a hmur le kaa in siseh pek a herhmi vialte peknak in siseh an karlak ah tlang a tlak hna. Aa rem lomi pahnih karlakah hmurka in siseh, pekchannak in siseh tlangtlak in remnak sertu si hi Pathian nih a kan fial. Jesuh zong nih, “Mi le mi karah remnak a sertu cu lunglawmmi nan va si dah! Pathian nih ka fa tiah an ti hna lai” tiah a kan cawnpiak (Matt. 5:9). Nu le va karlak ah siseh, pakhat le pakhat kar lakah siseh rem lonak chuahpi tu siloin rem lonak a umnak hmun ah Paul bantukin remnak le daihnak sertu si hi kan biapi tuk hringhran.


4.    Kan nawlngeihnak le kan thinhunnak hna humh in mi a cohlang khomi si ding a kan cawnpiak. Filemon nih Onesimus kha thahnak nawl le zuarnak nawl tiang a ngei ko. A duh paoh in a tuah khawhmi a si. Sihmanhsehlaw cu a nawlngeihnak le a thinhunnak cu ṭhumh in a sal kha ṭha tein a cohlan ṭhan. Khrih a zumhnak nih doitor nun a ngeihter i lungṭhumh khawhnak a pek. Nawlngeitu kan si lioah kan nawlngeihnak hmangin kan tang minung zong fakpi in sik le rak kan hmang sual kho. Kan fale cungah siseh kan minung hawi cungah siseh kan thinhun tuk lung in fak piin kutthlak ding ruahnak zong kan ngei kho men. Cu bantuk caan ah Filemon nih a nawlngeihnak le a thinhunnak a ṭhumh i a salpa Onisemas a cohlan ṭhan khawhnak hi thazaang lak u sih. 


5.    Hnekchommi siloin mah lungtho tein rianha ṭuan ding a kan cawnpiak. Paul nih Onesimus hi amah rian bawmtu siseh ti a duh. Filemon kha a si khawh ahcun rak ka thlah piak law tiah a nawl. Amah lung i thleh ningin siseh ti kha Paul nih a duh. Cucaah Paul nih, “Thawngṭha ruang i thong chung i ka um lioah hin, nangmah can i a ka bawmtu dingah amah hi ka sinah um seh ti cu ka duh ko. Sihmanhsehlaw hnekchom in i bawmhter cu kan duh lo, nangmah nih nangmah lungtho tein na ka bawmh kha ka duh deuh” tiah a ti (cang 13-14). Sal bantukin hnekchom le fialchom ruangah si loin thil ṭha kan hngalhmi kha kanmah lungtho tein tuah lengmang ding tu hi a si deuh. Fial chom ruang le hnek chom ruangah pekmi siloin mah lung tho tein pek tu hi Pathian nih a duh deuh.


6.    Santlai lo te zong kha Khrihfa chung i unau ti khawh i santlaimi ah ser ding a kan cawnpiak (Cang 16). Khrihfabu ah siseh, khua le ram ah siseh, kan mibu ah siseh santlai deuh le santlai lo deuh cu um phung a si. Santlai deuh le santlai deuh lawng i komh i santlai lo deuh kaltak si loin santlai deuh nih santlai lo deuh kha ṭhithruai cawisang in kalṭi i santlai mi ah ser ve ding tu a si.  Santlai lomi kha dawtnak le zawnruahnak he zohkhenh i santlaimi ah ser ve ding hi hi Filemon cakuat nih a kan cawnpiakmi a si.

 

Biatlang komh: Pathian thawnghabia nih:

1.      Zumhtlaklomi sinak in zumhtlak sinak ah,

2.      Mi nih sual puh tawnmi sinak in dinnak puhmi sinak ah,

3.      Dawtnak le zawnruahnak a ngei kho lomi sinak in dawtnak le zawnruahnak he rianuan khawhnak ah,

4.      Puarhrannak in toidornak le nunnemnak ah,

5.      Hnekchom tawnmi sinak in mah lungtho tein rian ṭha a ṭuanmi sinak ah, le

6.      Santlailomi sinak in santlaimi sinak ah a kan thlen ding a si. 

Comments

Popular posts from this blog

BAIBAL ZEITINDAH KAN REL LAI?

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU