Khrih Seihnam

                                 

Rethei le thilrit mi vialte hna, ka sinah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang.Matthew 11:28

Cu asi caah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai. Cucaah thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo. Matt 6:33-34

Pakhat le pakhat nan thilrit kha i chawng u law cuticun Khrih nawlbia kha nan zulh a si lai. Galati 6:2





Zeithil kong hmanhah lungrethei in um hlah uh. Pathian daihnak, minung hngalhnak a lonhtu nih cun, khrih Jesuh chungah nan lungthin le nan ruahnak cu him tein a chiah lai. Filipi 4:6-7

Nifa kan nunnak ah kan phorhmi thilrit a um cio. Sualnak, lungretheihnak, ngaihchiatnak, lung awtawmnak, lungrawhnak, zawtnak le harsatnak phunkip, uhttanhnak le midang huatnak, mi he i raalnak le i rem lonak, midang ngaihthiam khawhlonak le midang sual cinkenpengnak, leiba le chungkhar unau fale kongah thilrit tbk thilrit phorhmi kan ngei cio. Khrihfa nuncan ziaza kan timi hi hi bantuk retheihnak le thlirit tampi a um lio ko zongah Pathian kha fekte'n zumhnget peng i nuntha ngeih hi asi bik. 
 

Thilrit le retheimi kan si ahcun:

1. Pathian sin panh hmasat a herh. " ka sinah ra tuah u, dinhnak kan pek hna lai." tiah zeizong vialte cung i nawl ngeitu a lianngan Pathian nih akan sawm. Zei bantuk thilrit kan phroh hmanh ah cu thilrit he Pathian cu panh hmasat a herh. Cu lawnglawngah dinhnak kan hmuh lai. Pathian sinin kan i hlat deuh pauh ah kan thil a rit deuh lai tinak asi. 
2. Khrih seihnam kan i bei hmasat a herh. Khrih seihman cu toidornak le nunneemnak an si. Amah Pathian hrimhrim nih " kei cu nunnem le mitoidor ka si" ati. Toidor te le nunneem te in kan nunthiam a herh. Toidornak le Nunneemnak hi Khrih nawl asi caah kan i cawn hmasat a herh, zeicaah tiah Pa thian nih "ka nawl hi i cawn ve u" akan ti. Zeicaah tiah Pathian nawl asimi toidornak le nunneemnak hmangin dinhnak kan hmuh nakhnga caah asi. "Ka nawl hi i cawn ve u,cun dinhnak kha nan hmuh lai" tiah Pathian nih a ti.  Mi toidor le mi nunneem cu mi he an i reem. "Ral pakhat ngeih hi atamtuk, hawi thawngkhat ngeih hi a tlawmtuk" tiah an i ruah. Mi tordor le mi nunneem pawl cu an thinlung a zaang, an i nuam, an i lawm, an nun a nuam, an seihnam bei a nuam i an thil a zaang. Zeicaahtiah Pathian hrimhrim nih "Ka seihnam cu a bei a nuam i ka thil cu a zaang" ati. Pathian seihnam cu Toidornak le Nunneemnak asi.
3. Cu asi caah a thilritmi kan hawile kan unau rualchan kha an thilrit kan chawn a hau. Lungrethei ngaihchiami cu kan hnemh ahau, ruahchannak a dawng dengmang mi zong thazaang pek kan hau, a dam lomi veh kan hau, kan cung i a thinhungmi sinin ngaihthiam hal kan hau, kan cung i a sualmi hna zong kan ngaihthiam hau. Sualnak chung i aa ciahmi, Jesuh Khamhnak aa fiang lomi zong Khamhnak Thawngtha kan chimh ahau. Zei caah tiah Bible hrimhrim nih Pakhat le pakhat nan thilrit kha i chawng u law cuticun Khrih nawlbia kha nan zulh a si lai ati.Mi nih kan cung ah tuah hna seh ti kan duh bantuk in mi cung ah kan tuah hmasat ahau. 
4. Pathian nih zeidah tuah rih hna seh ti a kan duh hnga? Thil dang tampi a um ko lai. Cu vialte lakah a tang lei thil pawl ruat than hna usih. 

1. Pathian Pennak  Kan Nunnak Ah Tlung Seh ti a duh. 

Pathian cu mi vialte nih khamhnak hmu hna seh ti le biatak kha hngal hna seh ti a duhmi Pathian kan Khamtu Bawi asi (1 Timothy 2:3-4). Pathian pennak cu minung thinlung chung asi bik i kan nunnak kip ah Amah Pathian kha akan Khamtu le kan Nunnak Bawi ah kan cohlan tikah Khirh Pennak akau chinchin. Cu caah Khrih nih a nunnak pek tiangin akan dawtnak kha a langh ter. Khrih Jesuh he kan i pehtlaihnak thawngin vancung khua i amah sin i uktu si ve dingah, amah he cun a kan thawhter. Khrih Jesuh thawngin a langmi a dawtnak chung i a ummi a vel cu zeitluk in dah a ngan ti kha a zungzal in hmu hna seh ti a kan duh caah, hi cu a tuah (Efesa 2:6). Khrih nih thlacam ning akan cawn piaknak hrimhrim ah "Na Pennak Tlung Cang Ko Seh" (Matt 6:10) tiah akan cawn piak. Zeitin dah Pathian Pennak kan nunak ah a tlun khawh ve lai, Khanmhnak Ro zeitin dah kan co khawh ve lai?

1. Pathian sinah kan sualnak kan phuan ahau. Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai (1 John 1:9)
2. Pathian kha kan thinlung taktak in kan zumh i, kan ka in kan phuan a hau. Zeicahtiah kan lung in kan zumh i Pathian he i remnak kan hmuh; kan kaa in kan chim i khamh kan si. Cathiang nih, “Amah a zummi paoh cu ningzahnak an ing lai lo,” tiah a ti^. A zummi paoh, a ti, Pathian cu kan dihlak Bawipa a si i amah a zummi paoh cu thluachuahnak tampi in a pek ko hna. Cathiang nih, “Bawipa min a aumi paoh cu khamh an si lai,” a ti. (Rom 10:9 -13)
3. Pathian Velngeihnak kha kan cohlan a herh. Kannih cu vel kaan ngeih hna caah akan khamh i khamhnak kan hmuh cu amah kan zumhnak thawngin a si. Khamhnak kan hmuhmi cu kanmah tuahmi a si lo, Pathian laksawng a si. Hi kongah hin kan i porhlawt khawhmi zeihmanh a um lo, zeicahtiah kanmah ṭuannak thawngin kan hmuhmi a si lo. (Efesa 2:9)
4. Pathian Khamhnak Ro Kan cohlan a herh. Pathian nih amah a zummi hna cu Pathian fa cannak nawl kha a pek hna.( John 1:12)

2. Khamhnak Ro Cotu Hna Cu Nuntha in Nung Hna Seh Ti Akan Duh.

Kannih cu Pathian kutchuak kan si i Pathian nih thil ṭha tuah dingah a rak kan tinh bantukin Khrih he kan i pehtlaihnak thawngin thil ṭha cu kan tuah khawhnak hnga a kan ser ṭhanmi kan si. (Efesa 2:10). A tawifiannak in thlachiatruah nun kan ngeih ding asi. 


Khrih zumtu hna nih thil ṭha tampi an tuah khawh. Jonah zumhnak nih amah le a chungkhar vialte tilian chungin khamhnak a tlunpi. Moses zumhnak nih amah le a miphun vialte tiangin saltaannak in khamhnak a chuah pi. Joseph zumhnak nih a unau vialte harsatnak in a khamh khawh. Abramham zumhnak nih Pathian kamhmi ram ah a chungkhar le a unau tiang a phanhpi khawh. Jesuh chan rel tikah Abramham min reel chih asi fawn. (Hebrew 11: 7-29)

Kan nih teh zeitin dah Khrihfa nuntha in kan nung lai?

Nan zumhnak i ṭhatnak chap kha fak piin i zuam u; cun nan ṭhatnak ah khan hngalhnak i chap u; nan hngalhnak ah khan mah le mah i uk khawhnak i chap u; mah le mah i uk khawhnak ah khan in khawhnak i chap u; in khawhnak ah khan Pathian ṭihzahnak i chap u; Pathian ṭihzahnak ah khan unau bantukin i dawtnak i chap u law unau bantukin i dawtnak ah khan zawnruahnak i chap u. Hi thil hi nan herhmi an si i tam piin nan ngeih hna ahcun Bawipa Jesuh Khrih nan hngalhnak ah khan ṭhawnnak an pek hna lai i rian tampi an ṭuanter khawh hna lai.  2 Peter 1:5-9) 

Kannih cu thimmi miphun, Siangpahrang tlangbawi, miphun thiang, Pathian miphun hrimhrim kan si. Muihnak chungin amah ceunak chungah akan kotu hna Pathian nih khuaruahharmi thil a tuahmi thanh awkah kannih cu akan thimmi hna kan si. 1 Peter 2:9   

Pathian kha kan nunnak Bawi ah kan cohlan i amah seihnam le a nawl asimi Toidornak le Nunneemnak kha kan i cawn i, a duhmi thil kan tuah pauh ahcun kan nunnak ah kan herhbaumi cu Pathian nih tuanvo alaakkhawh tuk ko lai. Pathian kan zumh i Amah nih tuah seh ti akan duhmi kan tuah pauh ahcun kan thil  a zaang lai. Khrih fale nih harsatnak le buainak kan tong lailo ti asi hrimhrim lo nain, hi harsatnak le buainak vialte cungah teinak nun kan hmuh lai. Harsatnak hrial hi Khrih Nawl, Khrih Nundaan asilo. Harsatnak cung i teinak nganpi hmuh hi Khrih phung asi. Cucaah thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo. Nikhat hnu nikhat Pathian nih akanteipi ko lai.