ZEIDAH KA TUAHPIAK SEH TI NA DUH ?

Cun Elisha nih amah cu, “Zeidah kan tuahpiak lai? Zedah na ngeih ka chim tuah tiah” a ti. Cun anih nih “Na salnu nih hin  inn chungah chiti um khat dah ti lo cu zei hmanh ka ngei lo,” tiah a ti (II Siangpahrang 4:2 ); Cun anih nih a thawh i, “a si ah cun amah cu zeidah kan tuah piak kun hnga?” tiah a ti (IISiangpahrang 4:14).

Dawtmi nu le pa, U le nau hna tu caan ah hin zeidah na herh i, zeidah tuah piak na duh? Chambaunak le herhpang a tawngmi kan um hna maw? Hi Pathian bia hi rel law zeidah ka tuah lai i zeidah ka hmuh lai ti  na fiang ko lai.

Lungretheihnak le ngaihchiatnak an  tonnak:

Kan Bible kan relmi  4: 14 kan  zoh tikah Shunam minu hi a rum ngaimi a si. Asinain ava hi a tartuk cang nain fapa an ngei kholo. Fapa a ngei lomi hna khi an i lawmhnak a tling kho hnga maw? Thim pakhat te kan ngeih lo hmanh a pawitak in kan theih ahcun lawmhnak a tling kho hrim lai lo. An ning hna a zak thulh lai i, an hmai hna a chia lai.Sui le ngun chawva in aa hnemh zongah, a va nih a hnemh zongah hnangamnak taktak le lawmhnak a ngei kho lai lo. Hanah zong a va nih keimah pei ka um ko a ti zongah a lung a dai kho ve lo khah.  Cun 4: 1 leiah hin nuhmeinu a va nih a thih tak cangmi  an leiba ruangah a fapa hna pahnih  sal in tlaih an timhmi nu a vansan lai le a lung kuai lai hi hmuh khawh tthan  a si. Na ngaihchia  hlah ti sawh in a si kho ti lomi  innchungkhar an si. Hi hna nu pa hnih an tuarnak, an ngaihchiatnak le an ningzahnak  bantuk in  tu caan ah a lungre a theimi , a ning a zak mi le a hmai a chiami hna kan um maw? Hi hna nih zeidah an tuah ?

 An inn ah an kawhmi:

Shunam minu nih Pathian biachimchungtu Profet kha a inn ah rawlei  a rak fial caah a inn ah a lut pah tawn. Minu nih ava sinah hipa hi Pathian mi thiang a si ka hngalh a ti. A inn ah a luh termi kha a mui a tthat ca le duh a nun sawhsawh ca men ah si lo in  a hngalh fian taktak mi a si caah a si. A phungmen in zohkheh sawh a si lo. Cun Nuhmeinu zong nih a in ah a sawmmi kha a hngalhfian caah a sawm ve mi a si. Nangteh na hngalhfian  hnu ah na sawmmi a um maw? Hawi nawlcawn sawh cun a si kho lai lo. Shunam minu nih a dawtnak kha a zoh tik ah Profet pa a lungre a thei.  Hi tluk in a kan tuamhlawmtu le zohkhenh tu hi zei tal tuah piak lo cun timi a nun ah a um cang caah Gehazi cu…Zeidah tuah piak a duh va hal tuah tiah a thlah  nain minu nih zeihmanh a chim lo. A chim lo zong ah Profet pa a lungre a thei i zeidah kan tuah piak kun lai tiah khua a ruat. Ruat ve hmanh Pathian a dawmi hna caah Pathian a lungre a thei ve ko lai tin a fiang ko lo maw? Cu caah Pathian nih hin  amah a dawmi hna caah le a tinhmi ningin a kawhmi hna caah cun zeizong vialte kha a ttha lei ah a ser piak ko hna ti kha kan hngalh(Rom. 8:28 ) ti a si . Nuhmei nu zong kha zeidah kan tuah piak lai, ka chim tuah a ti nain a duhmi kha a chim ve lo. Zeicah tiah an duhmi a theitu a si ko ti kha an zumh. Kannih hawihna cu si uhsihlaw a chim kan i lap lai ning hi….. ti ko uh. Hawidawt tha tein ruathmanh,  kan duhmi chim len nak in zeidah a herh deuh ti hi hngal uhsihlaw zeitluk in dah a tthat hnga. Nuhmei nu nih mitthli he bochannak ngan taktak in a rak pang ve tik ah Profet pa a lungre a thei ve. Cu caah zeidah kan tuah piak lai timi biahalnak hi a chuahnak kha a si. Nangteh zeidah kan tuah piak lai ti halmi sin a duh ve maw?

Zeidah an tuah piak hna:

Dawtmi  hna ruahawk taktak a si. Ziah nihin tiang zeidah na duh a kan ti duh hnga lo? Zeidah kan tuah piak lai zong a kan ti duh hnga lo? Bawipa ka zangfah ko, ka bawm ko kan ti hmanh ah zeicahdah  leh duh lomi kan tampi ko hnga? Shunam minu cu amah theng nih a chim lo zong ah Pathian mithiang a simi  hnuzul Gehazi nih fapa a ngeih lo a chimh tikah laklawhnak um loin  hei au tuah a ti i,tutik a caan a phak tikah fan a pom lai a ti. Minu nih Maw Pathian mi Bawipa na salnu hi ka hlen hlah hen a ti, a thlam lawng in ka lawmhter hlah a tak ka co ter ko tinak a si lai dah. Pathian mithiang chimning in fa a pawi taktak i a hrin . Pathian nih a thlahmi a bia hi thlahhnawhchan ngeih lo in a lak in a kir ter lo(Isai.55:11) ti kha a tling.

 Afapa te a hung tthang i a hung upat deuh ah khan a thih  tthan tik ah cu ngaihchiat  le ka vanchiat cu tiah ttah le hramnak  in hmang lo in fa a ngeih lo lio i fa ngeihnak a chimtu pa kawl ah a thawh…. Pathian min thangtthat in um ko seh.  A thi cangmi a fatu a kal tak , a rak petu kha a va kawl. Nang teh a rawk cang mi, a thi cangmi, a tlau cangmi ah maw na buai deuh a rak in petu dah na kawl i, na hlam ve? Profet pa umnak a phak tikah Profet pa nih a rak hmuh I na dam maw? Nava a dam maw? Nafa a dam maw? tiah Gehazi kha a va  hal ter tikah  a piahtana a chim duh rih lo. Zeicahtiah Profet pa lawngkha a bochanmi cu a si. Profet pa ke kha a tlaih i, Gehazi nih namhlo ding in a timh tikah Profet pa nih um ko seh, amah cu a lungre a thei ngai ngai a ti(4:27c). Gehazi nih a lungretheihnak a hmuh piak thiam lo zong ah a panhmi pa nih a hmuh piak dih ko. A ho nih an kan hmuh piak thiam   lo i, an kan kham zong ah Jesuh nih a hmuh ah cun kham hlah a ti te ko hna lai. Gehazi nih Profet tthiangtthun put in dam ter ding a va kal nain minu nih a zul lo. Profet pa kan kal tak kho lai lo a ti caah Profet pa cu a sinah a kal tthan. Gehazi nih a nun ter khawh taktak lo. Dawtmi hna Pathian tthawnnak hlanh kan si zong ah minung lei in kan tuah khawh lo le hlawh tling lo a um tthio ti kha a kan cawn piak. A sinain Profet pa nih a va phaktikah a bawhhnawh  i, a mit le mit, a hmur le hmur  a kut cu kut cung ah a chiah i a bawmh hnawh hnu ah ngakchia cu a hung nung tthan.A thi cangmi hna an nuntthannak  hnga Jesuh an cungah bawh ter hna uh sih. Pumkhat sinak langhter lawng ah nun a si ko hih. Elisha a kawlmi nu a fa a nungtthan cang…. Lawmhnak in a khat cang, cuccu anmah nuva tuahmi si lo, thihnak lawng zoh lo in a nun ter  tu ding ah a tuah kho tu an va kawl i an sawm caah a si.

Cu bangin nuhmei nu zong nih Elisha kha a inn ah a sawm, Elisha nih zeidah na ngeih a ti tikah thup lo tein chiti um khat ka ngei tiah a hun chuah pi. Chiti a hun chuahpi tu nuhmei nu kha chiti rawnnak um dang va kawl hna a ti. Na fiang maw, nang zeidah na chuah pi lai, chiti chuah pitu chiti rawnnak um vaa kawl hna a ti ah cun zeidah na chuah pi ve lai. Phaisa chuahpi mi hna nih Phaisa chiahnak i kawl cia a herh ve ko lai hih. Na cheuhracheu khat a tlawm te a si mi thup lo in rak chuah pi ko hmanh, a chiahnak va kawl tiah an titu ding cu a hmai ka ah na va chiahmi pa kha a si lai. Cu chiti cu um a lawngmi dihlak an rawn i a khah dih hlan lo cu a reu kho lo. Um lawngmi a dih hnu lawngah a reu ve. Na herh chung poh a luan tertu ding Pathian hmai ka ah zeidah na ngeih ve i, zeidah na chuah pi ve lai. Cu chiti cu an zuar i  leiba an cham hnu ah nun chung dihlak paw cawmnak ah an hman. Nun chung ca za ding tiang in a karh tertu kha a hmaika ah an va chiahmi pa kha a si. Nang the zeidah tuah piak na duh ve? A philh khawh lomi le tuah piak lo awk a tha lomi kan si ve nak lai zeidah kan ngeih ve? Na thup bang lai maw? Hi hna an ngaihchiat mitthli a tla ciami a hnawt tu in hnawh piak lo in a chunglei ina hung luan tthan khawh lo ding in a kham piak hna. Pathian thinlung le mit ah a tlau kho lomi, philh khawh lomi  kan si ve ah cun zeidah kan tuah piak lai a kan ti cio ko lai? Zeidah ka  tuahpiak seh ti na duh?

Bia donghnak:

Hi chungkhar hnih hna nih vulei mirum, mi thawng mi liannak in an thinlung le an nunnak ah Elisha a um deuh i, hmun an pek deuh bang kan nun ah Khrih lawng um ter deuh in le hmunhma  pek ve ah cun a thinlung ah a tapmi kan si ve lai , kanmah hmanh nih kan chim thiam lo hmanh ah Amah hrimhrim nih zeidah kan tuah piak lai tiah a kan ti ve ko lai. 

Pathian nih thlua kan chuah piak ko seh….Amen.