Biatak Nunnak - Luatnak Hram, Teinak Muru - Bawi Jesuh

Kan nunnak lamtluan ah biatak hi aho pauh nih kan duh ciomi asi.  Kanmah kan i biatak khawh lo hmanhah midang aa biatak mi cu kan uar i kan upat, kan tihzah hna. Vawlei cung i a ummi biaknak vialte zong nih anmah hmuhmi lam cio in biatak cu an kawl cio ve. Asinain, Jesuh dah tilo aho dang hmanh nih, " Keimah hi lam le biatak le nunnak ka si" (Johan 14:6) a timi an umlo. 
     Minung a dingfelmi ahohmanh kan um lo ( Rom 3:10). Kannih nih, sualnak kan ngei lo, kan ti ahcun kanmah le kanmah kan i hlen a si i kan chungah biatak a um lo. (1 John 1:8). Kan sualnak nih hin Pathian he a kan tthen (Isaiah 59:2). Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi. Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang. (Rom 5: 8,10,11). Kannih cu Pathian nih vel akan ngeih hna caah akan khamh hna i khamhnak kan hmuh cu amah kan zumhnak thawngin a si. Khamhnak kan hmuhmi cu kanmah tuahmi a si lo, Pathian laksawng a si.(Efesa 2:8). Pathian nih cun amah mi hrimhrim si awkah a kan khamh i a kan auh; cucu kanmah tuahmi ruangah si loin amah nih aa tinhmi le vel a kan ngeih ca ruang tu ah khan a si.( 2 Timote 1:9). Hi tluk velngeihnak he akan dawtu Pathian cu upat ding asi i, zumh ding hrimhrim asi. Ahohmanh nih zumhnak loin Pathian lung ton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh.( Hebru 11:6). Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai.(1 John 1:9)
        Pathian nih a kan dawtnak a langhterning cu hitihin a si: a Fapa ngeihchun kha vawlei ah hin a run thlah i amah thawngin nunnak kan ngei lai. Dawtnak cu, Pathian kan rak dawt hi a si lo, amah nih a kan dawt i kan sual ngaihthiamnak caah a Fapa kan sinah a run thlah hi a si.( 1 Johan 4:9). 
        Jesuh thawngin kannih cu thimmi miphun, Siangpahrang tlangbawi, miphun thiang, Pathian miphun hrimhrim kan si. Muihnak chungin amah ceunak chungah akan kotu hna Pathian nih khuaruahharmi thil a tuahmi thanh awkah kannih cu akan thimmi hna kan si. Hlanah cun kannih cu Pathian mi kan rak si lo, sihmanhsehlaw atu cu kan si cang; hlanah cun Pathian zaangfahnak kha kan rak hngal lo, sihmanhsehlaw a tu cu zaangfahnak kha kan hmuh cang.( 1 Peter 2:9)
        Minung nih cun "rak ka hmuhsak hmasalaw kan zumh lai" kan ti. Pathian nih cun "Rak ka zum, lam kan hmuhsak lai" akan ti. "Nan ka auh ahcun kan leh hna lai i a nganmi le a thukmi thil nan hngalh bal lomi hna kha kan chimh hna lai" akan ti.(Jeremiah 33:3). Bible a laifang bak asimi Salm 118:8 ah cun, " Minung i bochan nakcun Bawipa i bochan cu a ṭha deuh" ati. Vawlei le a cung i a ummi thil vialte a sertu Pathian hi vancung le vawlei Bawi a si (Salm 24;1)
        Pathian theih loin cang thil an um lo. A thuk bikmi muihnak horkuang chungin kal hmanh ning usilaw, zeihmanh kan ṭih lai lo, zeicahtiah Bawipa nih akan umpi.(Salm 23:4). Tukforhnak kan in tikah in khawhnak thazang akan pek lai i chuah khawhnak lam zong akan serpiak lai ( 1 Korin 10:13). Pathian cu kan i dornak le kan thazang a si, harnak caan ah a kan bawm zungzaltu a si. (Salm 46:1). Pathian nih, “Kan kaltak bal hna lai lo i kan hlaw bal fawn hna lai lo,” akan ti. (Hebru 13:5). Pathian nih biakamnak a sermi paohpaoh cu biatak a si tiah a fiang cang; Amah chung i aa dormi hna caah cun amah cu phaw a si.(Phungthukbia 30:5). Amah nih akan zohkhenh ko caah kan lungretheihnak vialte kha amah cungah chia dih ko usih ( 1 Peter 5:7). Zei caah tiah cun Pathian nih kan caah tinhmi a ngei i cucu vanchiatnak siloin thlachuahnak asi i, amah sinah thla kaan cam ahcun akan ngaih piak lai i, kan thinlung dihlak in kan kawl tikah Bawipa cu kan hmuh hrimhrim ko lai(Jeremiah 29:11). Jesuh Khrih cu kan chungkhar i lutlai asi, bia kan i ruahmi vialte daitein arak thei/ngai vemi asi i, kan mit i hmuh khawh lomi rawl akan dumpi pengtu asi fawn.(Jesus Christ is the head of this house, the silent listener of every conversation, the unseen host of every meal). 
        Bawipa kha i bochan usilaw kan lungthli tum kha akan pek lai. Kan nunnak kha Bawipa pe tuah usih, amah kha i bochan usilaw amah nih akan bawmh lai (Salm 37:4-5). Pathin cu nunnem le mitoidor a si caah a nawl hi i cawn ve usih; cun dinhnak kha kan hmuh lai.Pathian  seihnam asimi nunnemnak le toidornak seinam cu i bei tuah uhsi, zei caah tiah, mi nunneemmi le mitoidor hna nunnak ah harsat le buainak hnahnawhnak le lungretheihnak a tlawm i, Pathian nih a umpi hna caah vawlei cung i an tonmi thil an porhnak seinam cu a bei a nuam i an thil cu a zaang. (Matthai 11:29-30)
         Kan tonmi thilkip ah raltha le thawng ngaiin kar hlan tuah hna usih. "Ṭhawng ngai le ralṭha ngaiin um ko; na thinphang hlah, na lung zong dong hlah; zeicahtiah Bawipa na Pathian cu khuazeika na kalnak hmanh ah na sinah a um ko,” tiah Joshua 1:9 ah ati. Pathian nih a kan pekmi Thlarau nih cun mi ralchia ah a kan ser lo, ṭhawnnak le dawtnak le mah le mah i uk khawhnak tu khan a kan khahter.( 2 Timothy 1:7).
         Kan nunak lamtluan ah biatak he nung usilaw Bawipa cu i bochan peng ko usih. Zei caah tiah Biatak asimi Bawipa cu kan luatnak asi (John 8:32). Kan Bawipa Jesuh Khrih thawngin teinak a kan petu Pathian cu thangṭhat si ko seh ( 1 Korin 15:57).




Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU