Pathian Cu Tuukhal Bantukin A Kan Vengtu A Si.

Shrek timi tuu hi khur pakhat chungah kum 6 chung aa thup. Hi tuu hi an hmuh than hnuah tuu hmurmettu nih minute 30 renglo a hmur an hmeh piak mi hi pound 60 a rit. Tu pakhat hi pound 10 tang lawng a rit tawn. Shrek nih hin amah sining nakin a let nga a ritmi hmur kum 6 chung a phor. A ruang cu tuu khaltu sinin a zaam, aa thup caah asi. 

Pathian hi tuukhal bantukin a kan vengtu a si, kan herhmi vialte kha a ka pek dih (Salm 23:1). Kannih cu amah ta kan si; a mi kan si i a tuurun kan si (Salm 100:3). Asinain, caan tampi cu Pathian umpi lamhruainak tangah um duhlo in lam kan pial, Pathian sinin kan i thup lengmang. A taktak le a ngaingai ti ahcun Pathian sinin i thuh khawh phung asilo( Salm 139:7-12). Ka sining vialte a theitu cu Pathian lawnglawng hi asi (Salm 139: 1-6; 13-16). Bawipa cu a ṭha; a fekmi a dawtnak cu zungzal in a hmun, zumhawktlak a sinak cu chan vialte tiangin a hmun (Salm 100:5). Hi tluk a thami Pathian, tuukhaltha i tuurun kan simi cu a sunglawi hrinhran dah. Tuukhaltha Bawipa nih ramhring lakah a kan bawhter dinh hmun ti pawngah a kan hruai (Salm 23:2). Ramnuam ram tha le nunkhuasak a nomhnak ah khua akan sak ter. Thazang thar kha a kan pek i a rak kan kamh bantukin ahmaanmi lam ah a kan hruai.(Salm 23:3).  A thuk bikmi muihnak horkuang chungin kal hmanh ning usilaw, zeihmanh kan ṭih lai lo, zeicahtiah Bawipa nih a kan umpi, ka hnangamnak akan pek (Salm 23:4). Bawipa ṭhatnak le dawtnak nih kan nun chung vialte a kan umpi lai i Bawipa inn cu a zungzal in kan inn a si lai (Salm 23:6).Cu asi caah hitluk a thami tuukhaltha Pathian sinin adang ah tlik ding, lam pial ding asilo. 

Tuukhaaltha Pathian sinin ka zaam i kan i thuh caan a sau deuh pauh ah kan thil a rit deuhdeuh lai.

Ka phorhmi thil zeipauh: lungretheih ngaihchiat vansan lungawtawmnak vialte hi Pathian sinah khinh ding an si. Kan tonmi thil vialte teikhawh nakding thazaang le fimnak tu kha Pathian sinah hal ding asi. Asin i a ummi cu akan chiahsawh bal lailo. Pathian hi a fale zuanhnawh loin a um kho bal fawn lai lo. Pathian nih, " Rethei le thilrit mi vialte hna, ka sinah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang,” (Matt 11:28-30) akan ti. Tuukhaal tha Jesuh nih nunneemnak le toidornak kan ngeih ahcun dinhnak kan hmuh lai i kan thil a zaang lai tiah akan ti fawn. Pathian cu kan i dornak le kan thazang a si, harnak caan ah a kan bawm zungzaltu a si (Salm 46:1). A fale sinah, "Lam kan hmuhsak zungzal hna lai i thil ṭha in nan paw kan khimter zungzal hna lai. Ngandam le thazang ṭhawng in kan umter hna lai. Ti tampi a ngeimi dum bantuk nan si lai; a kao bal lomi cerhti bantuk nan si lai (Isaiah 58:11)" atitu Pathian asi fawn.
Jesuh nih, "Tuukhal ṭha cu keimah hi ka si. Tuukhal ṭha cu a tuu hna caah a lu hloh kha a sian (Johan 10:11)." akan ti lawng siloin, "Kei cu nunnak kha nan ngeih i duhdim tein nan ngeih nakhnga caah ka ra (John 10:10)" akan ti fawn. 
Neem Tein An Auh

Maw a tlau i a baa mi ra kir tuah.
Tuukhal tha nih cun an lem lengmang ko.
Khamh awkah  an kawl, thianh awkah an hngah
Rau lo tein a sinah ra kir tuah 
Nem tein an auh, thinfual in an nawl.
Dawtnak in, "Ka sin ra tuah," an ti.
Nem tein an auh, thinfual in an nawl
Tuukhal tha an auhnak kha ngai tuah

An hngah ko rih, zeicaah na thih lai?
Saupi tuurun chungin tlau cang hmanhlaw,
A nunnak thi in, nangmah kha an tlanh,
Khuaruahhar dawtnak,  chim khawh lomi cu.

A bia kha ngai tuah, a dawtnak ruat tuah.
Nangmah sualnak kha thingcungah a in,
Ngaihthiamnak tling le zungzal nunnak cu,
A sermi remnak thawngin an pek cang. 

Lam ding in lut tuah, lam tak in lut tuah,
Jesuh in lut tuah innka kha a si
A mah nih nem tein an auh lengmang,
Ra lut tuah law, tlau than ti lo dingin.





                    



Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU

Pathian Kan Sinah A Um