HARNAK CAAN AH PATHIAN CU THANGTHAT, TEINAK LAM A SI




Paul le Silas cu thla an cam i Pathian sinah thangthatnak hla an sa(Lam. 16:25)

Annih nih hlasak le thangthat kha an thawk tikah  BAWIPA nih Ammon, Moab le Seir Tlang mi, Judah tuk awk i a rami hna kha lamhruang a ahter hna i cucaah an sung dih (2 Chan. 20:21c-22)

Saya Bawi Dua
Mupi nih thlichia lakah thazaang thar a lak than bangin thazaang thar lak than in a muimi kan lungthin innka cu hung than hna u sihlaw Pathian cu lungthin takte in thangthat than hna u sih. Ngaihchiat caan le harnak ton caan ah Pathian thangthat khawh hi a har taktakmi thil a si. Sihmanhsehlaw cu bantuk caan i Pathian thangthat khawh a biapi khun fawn. Cu bantuk harnak caan i Pathian thangthat khawhnak nih teinak nganpi a chuahter tawn. Cucaah atutan ah harnak caan ah Pathian thangthat cu teinak lam a si timi thawngtha in thazaang lak ti hna u sih tiah kan sawm hna. 

Pathian cu a mi hna (Israel) nih an thangthatnak hmun ah a um (But thou art holy, O thou that inhabitest the praises of Israel) tiah Salm 22:3 (KJV) nih a ti. Pathian cu Amah a thangthatmi hna sinah a thawnnak, a thil ti khawhnak le a lianngannak a langhter tawn. Cucu Paul le Silas (Lamkaltu 16) le Siangpahrang Jehoshafat le a mi hna tuanbia (2 Chanrelnak 20) ah kan hmuh khawh.
Filipi khua ah lim khuavang a ngeih caah hmailei a cang ding thil a chim chung khomi sal ngaknu pakhat a rak um i cu nu nih a bawile kha tangka tampi a hmuhter hna. Cu minu cu Paul le Silas nih an damter. Cu caah a bawile nih an tangka hmuhnak kha a dih cang tiah an ruah caah Paul le Silas cu an tlaih i fakpi in an tuk hnuah Filipi thong ah an thlak. Thonginn a chung chung chin ah an chiah pinah an ke ah a rit ngaimi hreng an khenh rih hna. An tuknak hma nih le a fak lai, an ke ah an hrengmi thil rih nih le si lai, thong chung chung chin ah um si rih lai, lung cu a dong bak lai mu. An thinlung cu muihnak nih a zelh dih ve ko hnga mu.
Sihmanhsehlaw zantim hrawng a hung si ah Paul le Silas cu thla an cam i Pathian cu hla in an thangthat. Cu tikah cu ah cun Pathian thil ti khawh thawnnak cu a lang. Chikkhatte ah li aa hnin i thonginn cu a hram tiang in a hninh dih. Hmakhatte ah innka vialte kha an i hung dih i thongtla pawl thir cikcin vialte kha an i phoih dih. Cuticun, thong chung harnak in  teinak le luatnak an hmu. Van zoh ah a san, lei zoh ah a pit i khuaruahhar vansang au in na um lio caan ah Bawipa Pathian sinah thla cam law Amah cu thangthat ko. Cu nih cun naa ruahchan ngam lomi teinak nganpi an phorh lai.
Harnak caan ah Pathian a au i a thangthatmi hna sinah Pathian thawnnak aa langhning zoh rih tuah u sih. Jehoshafat siangpahrang a tuan lio ah Judah cu hrawh dih dingah tihnung ral Ammon, Moab le Seir Tlang mi cu Judah an rak naih cuahmah. An tih tuk hringhran. A tuah awk an hngal lo. Khuaruahhar vansang le lungrethei in an um. Khi tikah Jehoshafat nih cun a mi vialte cu rawl ulh awkah a thanh hna. Judah ram chung khua dihlak khan Bawipa kawl awkah cun an ra i an i pum hna (2 Chan. 20:4). Nu le ngakchia thluk lo Bawipa hmai ah cun an dir dih hna i Bawipa cu an thangthat. Pumhnak ah a um vemi Jahaziel sinah Bawipa thlarau cu a tlung i, anih nih, “Judah mi vialte le Jerusalem mi hna le Siangpahrang Jehoshafat hna, thei tuah u: BAWIPA nih hi bangin nan sinah, ‘Hi mibu nganpi ruangah nan thinphang in nan lung dong hlah u; zeicahtiah hi raldohnak cu nanmah ta a si lo, Pathian i a si. … Nan thinphang hlah u, nan lungdong hlah u; thaizing ah chuahhnawh hna u law BAWIPA cu nan sinah a um lai,” tiah a ti (2 Chan. 20:15-17).
Khi tikah Jehoshafat nih vawlei zoh in a lu a khun i Judah ram mi vialte le Jerusalem mi vialte kha BAWIPA hmaiah an bawk i BAWIPA kha an biak. Cun Pathian riantuantu Levi le tlangbawi pawl nih BAWIPA Pathian cu aw thang piin thangthat awkah an dir ve. An Siangpahrang Jehoshafat nih, “BAWIPA nan Pathian cu zum u law fehter nan si lai; a profet hna kha zum hna u law nan hlawh a tling lai,” tiah a ti hna. Cun anih nih BAWIPA sinah thangthatnak hla a satu ding le amah a hlortu ding kha a thiah hna. Annih nih hlasak le thangthat kha an thawk tikah an ral vialte cu an thi dih.
Judahmi nih tei khawh ruat in an ruat lomi ral tihnung nih an kulh hna lioah an sining vialte thumh in lungthin hmunkhatte in an i pum ti, thla an cam ti i Pathian cu an thangthat ti tikah Pathian nih a thil ti khawh thawnnak a phuan i ruah banh lo teinak nganpi cu an hmu.
U le nau hna, nihin ah kan pawngkam ah tihnung ral phunzakip nih an kan kulh. Lungthin a baa i ruahchannak a dong theo thawn. Tuah awk hngalh loin ar ko in kan to theo. Cu lioah kan tuah awk rian biapi taktak cu Pathian sinah thla cam, a thangthatnak hla sa le, a min hlorh kha a si. Khi tikah Pathian nih a thil ti khawh thawnnak cu kan cungah a tlunh lai i lungdaih hnangamnak na hmu than lai.
Paul le Silas nih hnabei dong vansang in an um caan ah Pathian sinah thla an cam i a thangthatnak hla an sa tikah Pathian nih teinak le luatnak a pek hna bantukin le Judahmi le Jerusalem mi nih tihnung ral nih an kulh hna i tuah awk hngalh lo, khuaruahhar vansan au le lungrethei in le ngaihchia mitthli tlak in an um lioah nu le ngakchia thluk lo an zapi tein an i pum i lungthin khatte in thla an cam ti i Pathian cu an thangthat ti tikah minung ruahnak nih a phak lomi teinak nganpi an hmuh i lunglawmhnak le lungdaih hnangamnak in an khat than bantukin kan ngaihchiat lilen caan le harnak le tihnung ral nih an kan kulh lio caan ah thla cam ti i a thawngmi kan biak Pathian cu kan thangthat ti hna ahcun teinak kan hmu lai i lungdaih hnangamnak cu kan co than lai. HARNAK CAAN AH PATHIAN THANGTHAT CU TEINAK LAM A SI.
Nan zapi cungah Pathian thluachuah a thar in tlung than ko seh!    

Comments

Popular posts from this blog

BAIBAL ZEITINDAH KAN REL LAI?

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU