Aho Kut Chungah Dah Na Um?

Basketball a tha deuhmi hi lungkhat ah $ 20 hrawng asi. Asinain, cu basketball cu celhtiam Michael Jordan kut chung a phanh tikah $ million 33 nak tam deuh hmuhnak ah aa chuah. Aho kut chungah dah a um tikha a biapi.

Tennis a celh thiam lomi caah cun tennis racket hi zeihmanh a sunglawi lo. Asinain, Maria Sharapova kut chung i tennis racket nih $ million 80 tluk a chuahpi khawh. Tennis racket hi aho kut chungah dah a um tikha a biapi.

Kanmah cio nih hiangṭhunh kan i tlai ahcun ui le ar hna dawinak men asi hnga. Asinain, Moses kut chung i hiangṭhunh nih cun Rili Sen kha a ṭhen khawh. Thiangṭhunh hi aho kut chungah dah a um timi hi a biapi.

Hngakchia sawhsawh hna kut chung i lungherhchehnak (chai) nih vate peelnak ding men asi kho. Asinain, David kut chung i lungherhchehnak hi Pathian minung hna zei reelloin a zuamtaihmi Goliath a thah khawh. Lungherhchehnak (chai)hi aho kut chungah dah a um tihi a biapi. 

Mi tampi kan kut chung i nga le changreu hna hi kanmah pawkhimnak ding ca i rawll menmen asi ko nain, Jesuh kut chung i   changreu hlum nga le nga pahnih nih mi thawngnga caah pawkhimnak a chuahpi. Aho kut chungah dah a um tihi a biapi ko.

Lettama pakhat kut chung i a ummi thirkhenh pa 2 nih inn pakhat hmanh asa kho lo. Jesuh Khrih kut chung/cung i aa khen chihmi thirkhenh paa 2 cu vawlei cung misual vialte caah Khamhnak asi. Aho kut chungah dah a um ti kha a biapi.

Kan nunnak, kan sining, kan zeizong vialte hiteh aho kut ah dah kan chiah timi hi abiapi ko. Kan chiatnak, kan thatnak, kan i lawmhnak, kaan ngaihchiatnak, kan teinak, kan tlamtlin rihlonak, kan lungretheihnak, kan hnangamnak, kan thawnnak, kan zonzainak, kan lungtlinnak, ka diriam thiam lonak, KAN SINING VIALTE hi Zeizong vialte a ser i an cungah nawl a ngeimi a liannganmi Pathian khut chungah lungthiang tein zumhnak he chiah ding asi. Zei ruangah ti ahcun thil zeipauh hi Aho Kut Chungah Dah A Um tihi a biapi. Kan Nunnak hi aho kut chungah dah a um tihi a biapi tuk hringhran.

  • Na nunnak kha Bawipa pe tuah, amah kha i bochan law amah nih an bawmh lai. Salm 37:5
  • Pathian nih cun nan herh leng tiangin an pek khawh ko hna, cucaah nanmah ca i nan herhmi caah khan nan i zat tiangin nan ngei zungzal ko lai i thil ṭha tuah nan duhmi ca i nan herhmi caah khan a zat leng tiang hmanh nan ngei ko lai.           2 Korin 9:8
  • Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,’ ti hi a ngan bik le a biapi bik nawlbia cu a si. Matthai 22:37




Pathian Kut Chungah Ka Um 
Ka Khamtu Bawi a ka hruaitu he cun
Thil zeihmanh ka cung tlung seh ka him ko
Thlichia le ruahpi in a ka Khamh lai
Amah kut chungah ka um.

( Amah kut chung ah ka um )2
Thil zeihmanh ka cung tlung seh ka him ko
Amah kut chungah ka um.

2. A dawtnak tang cungah a ka pom i
Daihnak bia kha a aw nih a ka chimh
Pathian nih a ka ven ca’h ka him ko
Amah kut chungah ka um.

3. Amah nih ka nunnak a ven caah
Zeihmanh nih an kan then kho bal lai lo
Amah nih a ka huhphenh lai ka hngalh
Amah kut chungah ka um.

Comments

Popular posts from this blog

BAIBAL ZEITINDAH KAN REL LAI?

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU