Zumhnak

Voikhat cu khua khua khat ah ruah asur lonak caan asau ngai cang caah an khua ningpi i pum in ruahsur nakding caah thlacamnak an tuah. Khuami kip, bu kip, chungkhar tling tein cu thlacamnak ah an kal cio ve.

Ka piangthar atimi tampi an i tel. Evangelist tam nawnpi an um ve fawn. Bukip pastor pawl an bible cauk cio he an rak ra cio ve. Thlacam thiam an timi pawl an um ve. Holh theilo a holh thiammi pawl an tthu ve. Khuang tum pah i lam lo cun thlacam a tui kho lo atimi pawl an khuang he an hung ve. Phungchimh sau uar lomi mino samsen pawl tam nawnpi an i tel ve. Zarhpini pumhnak i skirt tawi le jean tawhrolh aarek ngaimi thengtheng hruk a huam ngelcelmi nuhngak no laklawh tete zong tthut awk an that lo caah dir bu in an i pum ve. Bible cawnpiaknak le phungchimh tik pauh i lusuk a hmang ngaimi, a ngu lengmang mi khrihfabu upa an tling dih ngawt. Zumhnak le pomning aa dang ciociomi an si ko nain hmun khat te ah anmah satal cio in Pathian sinah thla an cam ti. Aw thangpi in a aukhuangmi an um bantuk in, thinlung chung te-in Pathian sin thlacam mi an um. Biafang dawh le bia thuk a hmangmi an um bantuk in, an duhnak zawnte bak "Bawipa hihi ka duh, Jesuh min in - Amen" ati i a thlacam dih colh tu zong an um cio.

Hi tluk mi phun tling tampi an ratnak a ruang cu ruahsur seh tiah Pathian sin thlacam ding ah asi. Asinain, sifak ngaimi hngakchia pate pakhat lawng nih nithawng arak i put, Pathian nih ruah a sur ter taktak ko lai tiah a zumh caah. Ruah cu ciin taktak in a sur taktak i midang cu an ciin dih.

Mi tampi nih thla kan cam cio, Pathian kan zum cio ko kan ti nain kan tuarsernak nih a zulh tawn lo. 

Hebru 11:1.  
Zumhnak ngeih kan ti hi, kan i ruahchanmi kan hmuh ṭheo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si.

Jeim 2:14, 2:17
Ka u le ka nau hna, pakhat khat nih, “Zumhnak ka ngei,” ti seh law, cu zumhnak cu a tuahnak nih a langhter ṭung lo ahcun, zeidah a ṭhathnem? Cu zumhnak nih cun a khamh khawh lai maw? Tuahnak zeihmanh a chuahter lo ahcun zumhnak cu a thimi thil a si ko. 



Comments

Popular posts from this blog

Zohchun Awktlak Khrihfa Innchungkhar

Zumh Awktlak Nun

Bawipa Cu A Tha