Pathian Nih Nan Si Akan Ti Ahcun Kan Si Ko ( We Are What God Said We Are)

Minung kan si caah, "ka tlamtling lo, chambaunak ka ngei, bawmhtu ka herh, thil ttha lawngte ka tuah lengmang kho lo..tbk" kan sinak kan i theihmi hi thil ttha asi. A tlamtling dihmi minung kan um lo. Minung asi balmi lakah Khrih Jesuh dah tilo, hohmanh kan tlamtling lo. Mi tlamtling kan um lo caah mi vialte nih Pathian kan herh.Cu asi caah Khrih Jesuh he aa pehtlaimi nunnak kan herh. Zeicahtiah Khrih Jesuh he aa pehtlaimi nunnak a kan petu Thlarau phung ningin sualnak   le thihnak phung chungin luat ter kan si ( Rom 8:2). Cu Khrih Jesuh thawngin Pathian fa cannak nawl kha pek kan si. (John 1:12).Pathian hawi kan si (John 15:15). Kannih cu Pathian rocotu kan si, Khrih roco-hawi kan si. (Rom 8:17). Khrih Jesuh thawngin thil zeipauh tonngamnak thazang a ngeimi kan si (Filipi 4:13). 

Khrih Jesuh a ngeimi hna nunnak ah :

"Asi kho lai lo" kan ti caan ah Pathian nih "Zei thil pah asi kho ko" (Luke 18:27) akan ti. " Ka tha a ba, ka rethei, ka thil arit" kan ti caan ah " Dinhnak kan pek lai" (Mat 11:28-30) akan ti. " Dawtu ka ngei lo" kan ti lio ah " Ka fapa ngeihchun pek tiangin kan dawt ko" (Johan 3:16) akan ti. "Ka tuar kho tilo, ka tuah kho ti lai lo, ka pehzulh kho ti lai lo" ka ti tikah "Ka veel cu na caah aza ko, na ka auh tikah kan leh lai, harnak na in tikah kan umpi lai. Harnak chung in kan chuah lai i kan upat lai.( II Korin 12:9, Salm 91:15) akan ti. " Zeihmanh ka tuaktaan kho ti lo" kan ti lio caan ah " Lam kan hmuhsak lai, na lam ka tluan ter lai" akan ti. " Ka thiamlo, ka ningttih, hi thil hi cu ka tong ngam lai lo ee" ka ti caan ah " Khrih thawngin zei thil pauh tonnaknak" akan pek. (Filipi 4:13). " Ka chei lai lo" kan ti lio ah "Zei pauh ka tuah khawh dih ko" (II Korin 9:8) akan ti. " A tha lo ee, a phung asi hrim lo" kan ti lio ko zongah " ka dawtmi ka fa le caan thil zeipauh a thatnnak lei i kan tuah piak ko ee" (Roman 8:28 )a kan ti. " Ka palhnak a tam, ngaihthiam awk hmanh ka tha tilo" kan ti lio ah " Kan ngaihthiam, kan cohlan ko" (I John 1:9, Rom 8:1) akan ti. " Ka tawlreel thiam tilo, a ruahawk ka thei tilo" kan ti lio ah " Na herhmi zeipauh kan pek ko lai" (Filipi 4:19) akan ti. Kan tih tikah, " Tih hlah na thinphang hlah, ralchia ding ah kan ser lo, ṭhawnnak le dawtnak le  mah le mah i uk khawhnak tu khan kan khahter. ( Joshua 1:9, II Timothy 1:7) akan ti." Ka fim lo, ka thiam lo" ka ti tikah " Fimthiamnak kan pek ko" ( I Kor 1:30) akan ti. "Ka lileng tuk ee" kan ti lio ah " Kan kaltaak, kan chiataak bal lai lo" (Hebrews 13:5) akan ti fawn.

Khrih Jesuh thawngin zeitluk mi vantha dah kan si! Cu asi caah Pathian nih miluat nan si akan ti ahcun miluat kan si. Mi ttha nan si akan ti ahcun mitha kan si ko. Mifim nan si akan ti ahcun mifim kan si. Mithiam nan si akan ti ahcun mithiam kan si. Mi raltha nan si akan ti ahcun mi raltha kan si. Thil tha vialte hi Pathin sinin an ra i, Pathian nih thil tha tuah dingah akan duh fawn.

Pathian bia cu cohlang uhsilaw, Pathian a lawm tertu thil kha tuah i zuam lengmang usih.

Comments

Popular posts from this blog

BAIBAL ZEITINDAH KAN REL LAI?

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU