Pathian Nih Amak taktakmi Rian Nganpi Akan Pek ( God Gives Us A Great Commision)

Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law,  20 kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai. Matthai 28: 19-20

1813 kum ah Kawlram ah Pathian Thawngtha phuangtu Adonirum Judson arak phan. Atu kum hi Kawlram ah Pathian bia rak phanh kum kum 200 a tling cang. 1860 kum ah Shan miphun sinah Pathian thawngtha phuang tu Josiah Cushing a phan. 1877 ah Kachin ram ah Pathian thawngtha phuangtu Rev. J. Lyon le a nupi an phan i, kumkhat hnu ah malaria zawtnak in an thi fawn. 1899 kum ah Arthur Carson le Mrs. Laura Carson Hakha an phan ve. 1910 kum ah J.H.Cope Tedim a phan ve.

1983 kum thokin Zomi Baptist Convention (ZBC)nih Chin for Christ in One Centenary (CCOC) minin Pathian Khamhnak thawngtha phuannak rian cu, Carson siangbawi hna an rak phanhnak kum 100 tlin kum 1999 kum tiang kum 16 ttuan asi. 2004 kum ah Chinmi Khirh-fa kan sinak, Pu Thuam Hang le Pu Pau Suan nih Khrih hi an Khamtu Pathian i an cohlannak kum 100 tlinnak puai Chin Chrsitian Centenary cu Khuasak khua ah tuah asi fawn.

Chinram ah Siangbawi 7 an rak phan. Hi siangbawi pawl nih Khamhnak Thawngthabia an rak phorhmi hi Bible bia lawng asi hrimhrim lo. Hnipuan hmanh ahruk thiam rihlomi Chinmi kan nun khuasakning hrimhrim kha an kan hlen piak. Thlarau tlau Chinmi Pathian bia an kan phorh. Ca ngei lomi Chinmi caah ca an kan tuah piak. Nun khuasakning a thiam lomi Chinmi nun khuasak khuaruah daan an kan cawn piak.

A zei ruangah hme ramking Chinram ah hi siangbawi hna nih harsat lunglen tuar in rat an duh ngelcel hnga? Ziah Carson, Dr. East and J.H.Cope hna nih kan Chinram theng te ah an lu an phum an nunnak an pek hnga? America ram ah chungkhar unau dawttu ngei lomi an si lo, asifaakmi zong an si fawn lo. Chinmi caah an lu an phum. 1983 kum CCOC an thawkkum bak ah CCOC palai pa thum nih an nunnak an pek. Atu ah Pathian caah a nunnak a pemi Chinmi tampi an um cang. Hi ruangah hin Chinmi Pathian rian kan ttuannak hi tampi a karh i hlawh a tling cang.

1925 kum ah Hnaring ah Saya Isaac timi Khrihfa siang cachimtu arak phan hmasa bik. Amah hi Pathian bia arak kan phorh hmasa biktu lakah atelvemi asi. Sayakyi Aung Dwe , Rev. Sang Ling, Saya Za Ling  hna zong hi Lautu ram ah Pathian bia arak phor hmasa bikmi lakah philh awk ttha lomi an si fawn lai. Cu hnu ah 1932 thokin Rev. Tluang Hmung nih Bible cauk le Sobul lawng bak i tlaih  in Lautu miphun Pathian thawngthabia acawn piak hna. Maw zumhawktlak Pathian fa Lautu pasal ttha ava sidah! 1959 i arak phanmi  Roman Caltholic Missionary Rev. Fr. Adre Bareights nih hin thlarau lei thanchonak le khamhnak lawng siloin zatlang le nungphung, ca tibantuk zong akan tuah piak caah Lautu Khrihfa tuanbia ah mi roling taktak Pathian saltha asinak a um peng cang lai. F.K. Lehman zong hi Hnaring ah saupi a ummi asi ve.

Khrihfa Mission rian hi ti phunthum in ttuan asi. Fakpi'n rianttuan in THLANTI luang in rian ttuan a herh. MITTHLI tlakin thlacam in, ngaihchiat lunglen harsatnak tuar in ttuan aherhmi rian asi. Aherh ah cun Thisen luang nunnak pek tiangin ttuan a herhmi rian asi. Khrihfa Mission rian hi rian fawi asi hrimhrim lo. A har ruangah ttuan lo in um khawh awk cu asi fawn lo. Pathian rian cu ttuan lo awk ttha lo, ttuan hrimhrim ding asi caah ttuan asi. Ziah Pathian rian cu ttuan aherh? 1nk ah, cung lei in Pathian fialnak a um. 2nk ah tang lei in auhnak, aihram nak, hlamnak a um caah asi.


A tlau cuahmah komi kanmah khamh awk ah a Fapa ngeichun pek tiangin Pathian nih akan dawt. Kan ram Chinram le Kawlram hmun dangdang ah amah rianttuantu tampi arak thlah. Anmah zong nih an nunnak hi Pathian caah le kanmah caah an pek. Lautu mi, Pathian caah a nunnak a pemi an tampi ve cang.

Nang le kei nih teh Pathian Fialmi Rian caah zeital kan tuahmi a um maw? A dang kan ttuan khawh rih lo hmanah ah:

  1. Na chungkhar, na nupi na tefa, na chungkhat hna hi Pathian hi aka Khamtu le ka Pathian asi tiah an chohlan khawh ngak hnga Pathian Khamhnak Thawngthabia cu chimh hna.
  2. Na innpa kha nangmah vanram na phanh duh bantuk in vanram an phanh khawh ve nakhnga Pathian Khamhnak Thawngthabia cu chimh hna. Nangmah naa dawt tluk in na innpa va dawt timi ah hihi aa tel ko lai. Pathian bia na chim thiam lo zongah DAWTNAK va langh ter hna. Pathian cu Dawtnak asi caah na Khrihfa nunzia an hmunnak thawngin Pathian an hmuh ko lai. Nangmah kap lei in na rian na tei pauh ahcun Pathian nih amah rian ( Amah Kaan-dah) cu a tei tuk ko lai, phang hlah!
  3. Na rian ttuanti hawi, na sianginn kaiti hawi hna sinah Pathian Khamhnak Thawngthabia cu chimh hna.
  4. Na Khrihfabu nih Khrihfa mission rian an ttuannak ah i tel ve. Nangmah na kal khawh lo zongah na chawva in siseh, abiapi bikah Thlacam piak taktaknak in siseh ipe ve.
  5. Nan si khawh ahcun Pathian rianttuantu hna hi bawmh hna. Khrihfa Missionary hna hi bawm hna. Pathian bia a cawng cuahmah liomi Bible sianghngakchia hna zohkhenh hna.
  6. Pathian bia a phuang cuahmah mi pastor pawl, evangelist le Khrihfa missionary hna na ton tikah thangthat tha pe hna. Cawnglawmh hna. Arian an ttuanmi Pathian na cungah aa lawm ko lai.
  7. Khrihfabu, Khrihfa Association le Fellowship na theihmi pawl caah thlacam piak hna.
Pathian cu kan dihlak Bawipa a si i amah a zummi paoh cu thluachuahnak tampi in a pek ko hna.  Cathiang nih, "Bawipa min a aumi paoh cu khamh an si lai," a ti bangin a si taktak ko.  Asinain, an zumh lo ahcun zeitindah a min cu an auh khawh lai? Cun bia kha an theih lo ahcun zeitindah an zumh khawh lai? Cun bia cu chimh an si lo ahcun zeitindah an theih khawh lai? (Rom 10:12-14)
Mirang holh ah Great! kan ti ahcun amak taktak, khuaruahhar thil asi, tinak asi i, cun a sullamdang pakhat cu a nganpi, a biapimi tinak asi fawn. Pathian Nih Rian Nganpi, Rian Mak Taktakmi Akan Khinh. Mah cucu Amah thawngthabia phuan ding hi asi. Pathian thawngthabia hi thlarau khamhnak ca lawng hmanh siloin Duhdim Nunnak kan hmuh khawh nak caah asi i a mak kho tuk, a sunglawi ngai fawn.

Cucaah Jesuh min upatnak caah cun vancung i a ummi vialte nih si hna seh, vawlei i a ummi vialte nih si hna seh, vawlei tang i a ummi vialte nih si hna seh, an khuk an i bil lai i, Pathian kan Pa sunparnak caah cun lei vialte nih Jesuh cu Bawipa a si, an ti ( Filipi 2:10-11) nakhnga Pathian nih a rian ah in hmang cio hram hna seh.

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU

Pathian Kan Sinah A Um