Khrihfa Hna Lunglawmhnak

Nihin hi Jesuh Khrih chuahlai hngahnak (Advent) zarh 3 nak a si. Nihin kan tlangtar  cu Lawmhnak (Joy) a si. Jesuh Khrih akan phorhmi Lunglawmhnak kan ngei hna maw?

December 14 (Cawn Ni 5 ni), 2012, USA ram, Connecticut  State, Newtown khua ah tlangval kum 20 a simi nih a nu (Sayama a simi) le kum 5-10 kar a simi siangngakchia 20 le sayakyi, sayate tiah ngakchia 20, upa 6 meithal in thih lakin a kah hna. Amah le mah zong aa kah ve. Zeitluk ngaihchiat dah a si.Christmas sianginn khar lai teah mah bantuk thil a can tikahhin chungkhar hna caah ngaihchiatnak hi ruah piak khawh an si lo. USA President Obama zongnih hnemhnakbia a chimpah in a celh lo caah a tap. 

Jesuh Khrihnih amah zumtu hna nunnak ah lunglawmhnak kan ngeih ding hi a kan siaherh tuk. “Ka lunglawmhnak kha nan chungah a umi nan ilawmhnak cu a tlinnakhnga, hi bia cu kanchimhhna,”(John 15:11)tiah a kanti.

Baibal ah Lunglawmhnak” (Joy) kong hi voi 500 nak tam a um. Phungchim minthang pakhat nih a chimbalmi cu: “Khrihfa sinak a nganbik langhtertu hmelchunhnak cu zumhnak a si lo; lawmhnak a si,” tiah a ti. Jesuh Khrih vawlei a rat tikah “Lawmhnak” a rak kan phorh. Khrih phorhmi lawmhnak cu voikhatte meh thaw i mehruangah i lawmh i pawtam tikah i lawmh tilo bantuk khi a si lo. Picnic kan kal i chunnitlak i nuam, asinain zan lei inn phak tikah ingpuan lungrawk in um khi a si fawn lo.

Paul nih Filipi thonginn chungah thong a tlaklio ah Filipi cakuat hi a tial. “Bawipa chungi nan nunnak ah khan i lawmzungzal ko u ti kan duh hna. I lawm ko u, tiah ka nolh than rih ko lai,” (Filipi 4:4) tiah a tial. Harnak tampi nih a kan kulh cuahmah lio zongah chunglei nunnak ah thuk pi in lawmh khawh le hnangamnak ngeih khawh khi Khrihfa Lawmhnak taktak cu a si. 

Pathian kan lawmhnak ding a ruang tampi a um nain a tanglei thil hna ruangah hin a bikin Pathian cungah i lawm hna usih tiah kan sawm hna. 

1)     Misual hna caah Jesuh Khrih akan pek caah Pathian cu lawmh hna u sih (1 Timote 1:15).

2)     A luan ciami can chungah a kan dawtnak, khamhnak, tlanhnak, bawmhnak, le thluachuah thil tha tampi ruangah Pathian cu lawmhusih (Salm 70:5).

3)     Nifatin kan nunnak ah akan umpi peng caahPathian cu lawmh u sih (Mat. 1:23).

4)     Kan tei khawhlomi “vawlei nih achuah termi harnak vialte ???” tei piaktu a si caah Pathian cu lawmh u sih (Johan 16:33).

5)     Jesuh zumtu kan si ruangah Hell mei in luatnak a kanpek i le zungzal nunnak (Van ram) akan coter caah Pathian cu lawmh u sih (Johan 3:16).

Biadonghnak:

“Vawlei Lawm tuah” timi hla phuahtu cu Isaac Watts (1675-1748) asi. Khrihfa Hlabu tambik phuahtu pa a si.A pa Khrihfa Upa le a nu (refugee) nih an hrinmi a si. Kum 14 chung an chungkhar in hremnak, tuarnak an tong. Cu ruangah Isaac Watts cu mi zawtfak pang ngai asi. Atung pe 5 nak tlawmpal lawng a sang. Apum a derthawmnain a lungthin le thlarau cu a thawng ngai.Kum 45 a silio, a hawipa inn dum chung thingkung tangah “Vawlei Lawm tuah” timihla hi Salm 98 cherhchanlak in a phuah. Pathian ukmi nunnak cu a him, lawmhnak a si, dinnak zong a sinak kha a langhter. Mary, Joseph, tuukharhna, vancungmi, nichuahlei mifim, caw rawleinak kuang kong tehna aa tel lo nain mahhla hi vawleicung ah sakbikmi Carol hla asi. Zeicahtiah khamhtu Jesuh Khrih a chuah cu kan caah lawmhnak asi ruangah a si.

Jesuh Khrih cu a luanciami kan nunnak caah lawmhnak a si. Nihin kan nunnak caah lawmhnak asi. Hmailei cazongah lawmhnak a si fawn.Kan nunnak dihlak in “Vawlei Lawm tuah, Bawipa a tum” timi hla hi sahna usih.

“Nan thinphanghlah u; zeicahtiah nan sini ka ratnak cu nan ca i thawngtha he a si, cu thawngtha nihcun mi vialte sinah lunglawmhnak a tlunter lai,”

 (Luka 2:10).

“A sung bikmi a laksawng caah hin Pathian cu lawmko u sih”

(2 Korin 9:15).