“Pathian Remruat Kan Timi Hi”

Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh” Rom 8:28.

Dr. Van Cin Thang
Rom 8:28 in kan ihnemh tik paoh ah “zeizong vialte hi a tha lei” ti’n kan thawk theo tawn. A ngaingai tiah cun, “amah (Pathian) a dawmi hna caah le amah nih aa tinhmi ningin a kawhmi hna caah cun” ti’n a thawk. Khrihfa hna hi zumhnak thawngin hngalhnak kan hmuh i, zumhnak thawngin Pathian nih a kan umpi zungzal timi ah fek te’n kan dir khawhnak hi a si. Chimduhmi cu kan zeizong vialte a tha lei ah serpiakmi kan si khawhnak dingah Pathian a dawmi le amah duhnak chungah a tlawnglengmi kan si hmasa a herh hnga. “Zeizong vialte” timi ahhin na thinlung an temtawntu, an buaitertu, thinharnak na ngeimi vialte, Pathian he nan ipehtlaihnak vialte aa tel dih. Phundang in chim ahcun a tu lio harnak le nganfahnak hna na tongmi hna” hi an si. Pathian cu a hramthawk tein a rak um bantukin kan donghnak zongah a um i, nifa kan cawlcanghnak zongah a um peng ve. A kan umpi zungzal.  Ngol loin rian a tuan zungzalmi Pathian a si.  Pathian umnak ah nganfahnak a um maw? A hramthawk in Pathian a rak um maw, a donghnak lawngah maw a um tiah biahalnak he aa erhmi tampi kan um kho men. Aphi cu; 

Hi Baibal cang hi tha tein zoh ahcun Pathian he timi in aa thawkmi Baibal cacang a si.  Pathian cu zeizong vialte a rak sersiam hlan ah a rak um diam cang i, tulio a cang cuahmahmi caan zongah hin a um i, a tu in hmailei caan zongah a um thiamthiam fawn ko lai. Cu nih a kan fianhmi cu nunnak ah zeibantuk thil na tong, a hung cang/chuah zongah a donghnak ah Pathian nih  thluachuahnak ah a merton than kho ko, ti hi a si.

Rom 8:28 in hna ka rak in ngamhter tawn. Cu pinah midang zong ka rak hnemh ve tawn hna. Asinain ka nunnak ah thlarau thazaang le nun hnangamnak a ka pe taktaknak hi a sau rih lo. Aruangcu a sullam ka rak ifianning kha phundang pi ah a rak si. Pathian bia kan he caan kan lak tikah Thiangthlarau sawmnak hi a rak biapi ngaite. Cucaah Pathian bia (Baibal) hi pumpak thlacamnak le Thiangthlarau sawmnak he kan ruah/rel lioah hin cung leiin hngalhthiamnak a ra i cu tikah kan nunnak ah sullam a ngei i thlarau rawl taktak ah an i cang tawn. Sihmanhsehlaw minung tuaktannak men in kan rel tik paoh ah nunnak thazaang a si kho tawn lo i sullam zong a bingtalet in ilak sual a fawi te. Cucaah Rom 8:28 cacang hi a hramthawk ah Pathian kan chiah lo chungpoah a sullam naa fiangning aa palh ko lai.

Harnak le nganfahnak nih a kan tlunh tikah Pathian a um lai lo tiah, Pathian umpi lamhruainak zong zumh huhua loin kan um theu tawn. Asinain Pathian cu hramthawknak le donghnak ngei loin kan Pathian a si (Salm 90:2) i, a mah a zumhmi hna nunnak ah zeithil poah tlung ko hmanhseh Pathian nih a donghnak ah thluachuahnak ah a canter ko ti hi Rom 8:28 nih a kan fianhmi cu a si. 

Kan Baibal nih ngaihchiatnak hna kha ngaihchiatnak ah rel hlah u tiah a kan cawnpiak bal lo. Nain “nan cungah hneksaknak a phunphun a tlun tikah vantha ah irel u, nan zumhnak in nan tei khawh tikah in khawhnak nan ngei. Cucu zeihmanh bau loin a tlingmi nan si nakhnga” (Jeim 1:3,4). Nifa kan nunnak ah Pathian riantuannak aa tel zungzalmi tu khi theihter a kan duhmi a si. Kan tongmi harnak le thatnak hna hi vanthat van chiat ruangah siloin kan nunnak ah Pathian riantuannak tu a si, ti hi a si. Pathian sunparnak a langhnak ding ca tu a si. Paul nih thil a cangmi poahoah hi a tha dihmi a si, a ti bal lo. Pathian nih ngaihchiatnak a kan tonternak a ruang hna hi hngalh khawh dih a si, a ti bal fawn lo. Zumhnak kan ngei poah cun zeithil poah tlam a tlin dih ko lai, a ti fawn lo. Asinain zummhnak ah puitlingmi si hna seh ti a kan duh ruangah a si.

Nunnak ah minung ruahnak le thluak tuaktannak nih a hngalh ban khawh lomi thil hna an tampi nak lakah nihin Khrihfa tampi nih tihnung ngaimi kan i nunpi mi cu; Pathian telh loin nunnak sullam kan hrilhfiahning, a phi kan chuahtermi le a rannak le tawinak rumro in nunnak sullam kan i lak tawnmi hi a si. Khrihfa nun cu phiatlaan (shortcut) siloin lam saumi (long journey) ti tu in kan ilak thiam ahcun kan hram a fek hnga i kan kalning zong a tluang ko lai. Pathian cu a lung a saumi le lungsau thinfual tein rian a tuan zungzalmi a si tihi philh awk tha an si lo. “Lungsau te’n” timi cu lung awtawm lo tein Pathian sin in hngak khawh khi a si. Khrihfa tampi lam kan pial sual tawnnak le kan tlu sual tawnnak cu Pathian sining le a riantuanning i fianlo ruang, lungrang ngaiin biakhiahnak le tuahnak kan ngei ruangah a si. Cu nih cun nunnak ah biahalnak tampi, lungvaivuannak le awklokchongnak a chuahpi tawn.

B.Th ka kai ka lioah kan classmate pawl he kan i el lent awn i, kan saya pa kan rak halmi pakhat cu “Thluahchuah” kong hi a si. Saya, ziah Pathian nih Khrihfa a si lomi Hindu pawl le biaknak dang hna hi inntha lotha he siarem ngaiin a chiah hna i, kannih Khrihfa bel sifak ngai le retheih ngaiin a kan chiah kun? Hihi an pathian thluahchuah maw kanmah Pathian thluahchuah dah? Saya pa nih, Satan nih a tuah khawh lomi a um lo, mithi lawng a thawhter khawh lo timi kha na theih bal ko lo maw? tiah a rak kan ti.. Chimh duhmi cu nunnak ahhin pumpak cio kan tongmi thil he pehtlaih in biahalnak kan ngei cio; ziah ..zeiruangah….? Zeiruangah Japan ram ah hitluk kokek hrawhralnak a tlun hnga? hei ti btk, dongh hngal loin. Kan ifian dingmi cu kan khualtlawnnak vawlei ahhin challage kan ngei cio. Asinain Pathian nih teinak hmuh hna seh ti a kan duh. Aruangcu thil cheukhat kan tongmi hna hi sullam ngei lo ngaimi a lo ko nain Pathian nih kan caah sullam ngeih dingin a rak timhtuah dih cangmi a si. Cucu a fale kan thatnak, kan thannak ding caah a si.

Paul nih cun, kan nunnak hrampi a domhtu cu Pathian a si i, cu chungah cun thatnak le chiatnak, sifah ngaihchiatnak le lawmhnak le harnak phunphun hna an i cawhlulh ko hna lai, a sinain a donghnak caankhatkhat ah Pathian khua khanmi a thatnak le lawmhnak nih hmunhma a la te lai, a ti. Amah aa tinhmi ningin a kawhmi hna cu nang le kei hi kan si ko. Kan ca i Pathian tinhmi kan timi cu “ Pathian nih zeizong vialte a kan tuahpiak dihmi chungin nang le kei khamhnak le luatnak kan hmuh khawh nakhnga ding caah, a thisen in a rak kan tlanhnak le a intuarnak hna hi an si. “Pathian nih a thatnak leiah”timi zawn ahhin, thatnak kan ti tikah kan vun ruah colhmi cu ngandamnak, lawmhnak, rumnak, nun khuasaunak te hna khi an hei si ko hnga. A tlangpi in chim ahcun thil siningcang tluannak, duhdim tein nunnak khi a si ko. Sihmanhsehlaw Paul nih thatnak lei ah a timi cu Pathian nih a kan duh pimi Khrih Jesuh nun kan ihawm khawh ve ding khi a si. Phundang in chim rih ahcun zeithil na tong hmanh ah na tongmi thil ah kan Bawipa Jesuh bantukin nunpi khawhnak, in khawhnak, chimrel khawhnak nun ngei khi a si. Cucu Pathian remruat kan timi cu a si. Kan nunnak ah Pathian nih rem a kan ruahpiak ning cio in Amen pek khawh hi Khrihfa nun ngaingai cu a si. 

Bawipa thatnak nan dihlak cungah hmun camcin ko seh!

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU

Pathian Kan Sinah A Um