Jesuh kha fek tein i zoh chih u sih. (Learn from the Master)

 “Hi tlukin vanrang zat in a tammi tehte bu nih khan kannih cu an kan kulh. Cu caah cun lam a kan dawntu thil paohpaoh le kan tlaihchan pengmi sualnak vialte kha hlaw hna u sih law kan hmai i chiahmi tlikzuamnak ah khan i zuam u sih. Jesuh kha fek tein i zoh chih u sih, amah cungah cun kan zumhnak cu a hram thawk in a dongh tiang a um. Hmailei lunglawmhnak aa ruahchanmi ruangah khan vailam cung i thih ningzahnak cu zeihmanh ah a rel lo i atu cu Pathian bawithutdan orhlei kamah khan a hung thu cang. A inmi thil kha ruat hna hmanh u, misual mi nih akha tluk in an huatnak a in peng ko kha ruat hmanh u. Cu caah cun lungdong in maw ngol sual lai u sih.  Hebru 12:1-3
Rev. Dr. Si Khia
Mipa pakhat cu thli fak ngai in a hran ni ah vanlawng fate (glider) cit dingah aa thawh. Lungfim zinpan ahcun cu bantuk ni celngel ahcun glider icit ding a si lo. A duh tuk lung ah thlihran lak ahcun vanlawng fate cu a mongh i van ah a kai ko. Tlawmpal chung cu zei tinak um lo in a tluang. Nain tlawmpal ah a citmi glider cu fakpiin aa hnin. Thlichia nih cun tanglei ah a nam cuahmah. Vansang nawnpi in vawlei ah tlak hram aa thawk. Zei tuah awk theih lo in thla tu a cam. Can tlawmpal ah aacitmi (glider) nih vawlei ah a tlakpi lai i amah pum he glider he vawlei ah sop dih man dih in an tlak ding khi a si cang. Zeitindah him tein vawlei ah ka tum khawh lai timi a ruat kho ti lo. Mah lio te ahcun a kam lei ah mupi pakhat a mah bantuk in thlihran nih mupi pakhat a nan ve khi a mit sir in a hun hmuh. Mupi nih zeitindah a tuah te lai kha a zoh ko. Mupi cu a thla a samh. Vawlei lei hoih in chuk zuan in a zuang (daivin a thut). Mupi bantuk in aacitmi cu fektein a tlaih i atang vawlei lei hoih in daivin a thut ve. Tlawmpal te lawng a rauh ah amah he mupi he him tein thlichia chemnak chung in an luat i an him. Mipa nih cun a mah fimnak le thiamnak in cu thlichia chung in luatnak lam a thei lo. Amah nak in a thiam i a thei deuhmi mupi tu kha a zoh i a sin in a cawn.
Khrihfa tampi cu hi pa bantuk hin kan si lo. Hawi sin cawn hi kan duh hna lo. Hawi tuahmi thiltha le nunzia cawn kan i nautat. Kanmah nak a hngal deuhmi nih ruahnak pekmi, fimchimhmi kan la duh tawn lo. Ramthumnak ah a ummi ko hi kan zual rua. Ka theih ve, ka hngalh ve timi lungput kan ngei tuk hna rua. Angeih zat ka ngei ve, a hmuh zat ka hmu ve, a eimi ka ei kho ve, aa hrukmi ka hruk kho ve ti lungput kan ngei tuk hna rua.
Midang sin in cawn awk pakhat te tal cu cawn awk kan ngei. Cawn zong itim tuah. Cu nak hmanh in na pastor, na saya, na nu le na pa sin in cawn khawh peng izuam tuah. Jesuh Khrih sin in cawn i zuam chinchin fawn. Na sung lai lo. Naa miak lai.
Mipa nih thlichia chemnak lam in luat dingah mitthep loin mupi cu a zoh i mupi a tuah ning in a tuah ve caah thihnak in a luat. Pawngkam thlichia phun zakip nih kan nunnak man dih le kuai dih in a kan den hnik caan a tam ngai kho. Hi bantuk caan ah hin Jesuh Bawipa cungah kan mit kan chia maw? Amah lawng kan izohchunh awk Bawi, Saya, Chimtu, Hruaitu a si. Amah thawng lawnglawng in kan nun hi a si.
Harnak na ton caan ah na lung dong hlah she. Jesuh Khrih kha fek tein zoh chih in kan zumhnak cu Jesuh Khrih ah fek tein hram bunh usih.

Comments

Popular posts from this blog

BAIBAL ZEITINDAH KAN REL LAI?

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU