Neil Armstrong Bia Nih A Kan Theihter Thanmi Pathian Lianngan Sunparnak


Thlapa cung i a ke alamh hmasabik mi Neil Armstrong cu thlapa cung lam akal hnu kum 43 tluk asi hnu August 25, 2012 ah a nunnak a liam ai cang. A kum 82 asi. 

Armstrong kong an ttialmi tampi lakah, pakhat te abiapi ngaimi cu Armstrong hi amah zawn lawng a ruatmi asi lo tihi asi. 1969 kum Appolo 11 he thlapa cung i a tum hmasa bik dingmi minung NASA nawlngeitu  Slayton, George Low, Bob Gilruth, and Chris Kraft nih an thim tikah Armstrong hi amah zawnlawng ruah a hmang lomi (a person who did not have a large ego) asi caah an rak thim ti asi.

Neil Armstrong nih thlapa cung i a chimhmi bia pakhat cu, “ A dum i aa dawh tukmi biahrum tiate vawlei (Earth) hi ka hmuh tikah ka lau ko. Ka mit khatlei cu ka kutpi in ka phenh tikah cu vawilei (Earth) cu ka hmu kho tilo. Alianngan a thawngmi  ka silo, a hmemi zeihmah lote ka si ko” ti asi. 

Hi Armstrong bia chirhchan in Bible thiang Salm 8 le Salm 19 hi reltthan tuah uhsih.
Salm 8 hi Pathian Sunparnak le Minung Lianngannak kong David nih hla in a phanhmi asi. Salm 19 hi Pathian sunparnak a sermi thil ah a langhnak kong asi.

Salm 8
Cang khatnak : “Maw Bawipa, kan Bawipa, na lianhngannak cu vawleicung dihlak ah hin a lang ko! Nangmah thanghatnak hi van tiang a phan

Cang thumnak in cangruknak:  Nangmah na sermi van le an hmun ciote ah na chiahmi  thlapa le arfi hna khi ka zoh tikah, minung hi zeidah a si i na hnakkar ah na tenh? Minung menmen a simi hi zeidah a si i a zawn na ruah? ti hi ka ruat. Nangmah lawnglawng hi a cungah a ummi na si i sunparnak le upatnak cu a lu ah na chinh. Na sermi thil vialte a uktu ah na ser i zeizong vialte hna dihlak cungah khan na chiah.

Cang kuanak: “Maw Bawipa, kan Bawipa, na lianhngannak cu vawleicung dihlak ah hin a lang ko! 

Salm 19: 1-6
Van nih khin Pathian sunparnak a langhter i a tuahmi thil kha a kan hmuhsak. Chun nih a hun changtu chun sinah khan a chim i zan zong nih a hun changtu zan sinah khan a nolh ve. Bia siseh holh siseh an hmang lo, aw thawng zong zeihmanh theih a um lo; asinain an aw cu vawlei khuazakip ah a thang i an bia cu vanhramdeng a phan. Bawipa nih ni cu van ah khin thlam a sakpiak i nupi hi tlangval a inn in a hung chuah bantuk khin a hung chuak, tlik aa zuammi tlik zuamnak i an hung chuah bantuk khin a hung chuak. Vanhramdeng khattelei khin aa thawk i khattelei ah a kal. A linhnak in aa thup khomi thil zeihmanh an um lo. 


Hi tluk linangan sunparnak a ngeimi kan Pathian cu a nawl kan ngaih awk asi fawn. Ziah ti ahcun Bawipa phung cu a hat a tling, nunnak thar petu a si. Bawipa nawlbia cu bochan awk a tlak, fimnak a baumi fimnak petu a si. Bawipa phunglam cu ahmaanmi an si, cu phunglam a zulmi cu an lung aa lawm. A nawlbia cu dinnak leiah a tlingmi an si i hngalhthiamnak lungthin pe khotu an si, Bawipa biak cu a ha, cu biaknak cu zungzal in a hmun lai. Bawipa biakhiahnak cu an ding, zungzal in ahmaanmi an si. Sui nakin duh deuh awk an si, sui thiang bik phun nak hmanh in duh deuh awk an si. Khuaihliti nakin an thlum deuh, khuaihliti thiang bik nakin an thlum deuh. ( Salm 19:7-10)

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU