Aho Pa/Fa Dah Na Si?

“Pa" nawlngaih hi thlachuah conak asi. 
(1). David cu a u le hna ral hla i sak pah in raldoh awk i i tiannak hmun i an umnak lei i kal awkah a pa nih rian a fial tikah a kal colh. Cu ka ah Philistine minganpa Goliath a thah khawh a minthan aa thawk.David nih Goliath atei tikah Siangpahrang Saul nih “Aho fapa dah na si, tlangvalpa?” tiah arak hal[1]. David pa, Jesse hi miphun dawtu le Pathian a tihzahmi asi i a fapa le hi an ram caah a pechan ngamtu asi. (2) Joseph hi a pa nawl a ngaih caah thlachuah aco, mi lianngan ah aa chuah. A u le saṭil run khalhnak ah a pa nih kal a fial tikah a kal colh.  A pa nih rian a fial lio te ah rak kal hlah sehlaw mi lianngan a si kho hnga lo. A pa a philh lonak cu siangpahrang changtu asi i a u le he an i ton than tikah hmuh khawh asi.
Pa le zei rello  hi ttih a nung. David hi Bethsheba he a palh i a sual mi a va si ko zongah afapa Absalon nih a pa zei rello taktak in a um tikah Pathian nih David a tanh thiamthiam. Noah hi zuu ri lakin a din caah a sual ngai, asinain, a fa pa Haan nih a pa tlamtlin lonak thuh piak, remh piak loin midang achimh tikah Haan lehlam nih chiatsernak a hmuh. Lainawngmi, zuu dingmi pa hna fale an van a chia.
Pale upat tihzah hmunhma pekthiam nih teinak nun, hlawhtlin nun akan pek khawh. Israel miphun nih raal an doh lioah an hruaitu an pa Moses nih a kut a sanh tik pauh ah ral an vun tei deuh i, a ban tha a bat deuh tik i a thlak tik pauh ah an sung deuh lengmang. Joshua le ahawi nih a kut sanh an bawmh pah tawn, cun lung nganpi cungah an chiah piak. Pa le cungah hin teinak thlachuah a um hrimhrim. Joshua te pawl nih "kan nih kan tha a tthawng deuh , nangmah khat lei ah i thawn law, kanmah nih kan kut kan vun samh tuah lai"ti awk a ttha lo. Kan pa le nih zeitluk an tha a der zongah, a zeipauh an si zongah anmah khuakhannak cungah hin thlachuah a um hrimhrim.
Luke Thawngtha chungah "Fapa Tluapa" kong a um. Vawlei cung i a minthang bik tuanbia lakah aa tel mi asi. Fapa tlaupa kong hi Jesuh nih zeiruangah dah arak chimh timi hi Bible thiamsang hna nih an chimh tikah: Pa 1 nak ah Pathian kan "PA" i dawtnak a ngan zia, cun, pa 2 nakah, Luke 11 chung hrawng i Pharisee pawl nawlbia le phunglam tamtuk nan theih ko nain, thlarau mit in zoh tikah nan tlau ve ko tiah a chimh duh mi  a si an ti. Mi tampi cu a ttha ngai mi, kan lo ko nain a tlau mi kan si zia kha Fapa Upa pa nih a langh ter. Tu chan ah Fapa tlau lawng si lo in Fanu tlau, Nu tlau, Pa tlau kan um leen cang. Kan chuahkehnak ram a lenglei aphanmi zong mi tam nawn kan tlau thluahmah cang. Holh thlau, nunphung thlau, chungkhar thinlung thlau, miphun dawtnak thlau, zumhngetnak thlau mi kan tam liangluang cang. Nu le pa nih maw an fale an thlau, fale nih dek nu le pa kan thlau? Nu le pa nih kan fale miphun dang lakah maw kan thlau maw, fale nih dah kan nu le pa, kan  bia le hla, nunphung ziaza sining midang hmai ah kan zahpi?


[1] 1 Samuel 17: 56, 17:58

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU

Pathian Kan Sinah A Um