Vailamtah Cungin Jesuh Bia 7

“Temhnak a in cu ka rak duhmi a si ko; thihnak cu ngaihthiamnak a umtertu raithawinak a si." Isaiah 53:10

1. “Ka Pa, ngaithiam hna. An tuahmi hi zei a si ti awk an hngal lo,” (Luke 23:34) (Sual Ngaihthiamnak) 
Ngaihthiamnak um loin luatnak a um kho lo. Jesuh nih misual nang le kei hi sualnak chungin a kan   khamh duh caah Calvary tlang vailamtah cung i thihnak cu aa thim riangmang i cu thihnak cu ngaihthiamnak a um tertu raithawinak asi i, cu ngaihthiamnak ruangah sualnak in kan luat. Aho nih dah, zei nih dah Jesuh a thah? Nangmah le keimah sualnak ruangah Jesuh Calvary tlangcung vailamthnak ah thihnak atuar. Jesuh a that tuhi Pharisee hna, ka suallo ati i a kut a tawltu Pilate, Rom ralkap hna lawng siloin nangmah le keimah zong kan i tel ve. Minung hi kan theih ko na buin kan tuahmi sualnak le kan theihlo buin kan tuahmi sualnak a tamtuk. Jesuh nih a Pa Pathian sinah sualngaihthiamnak a kan hal piakmi asi.

2. “Mah hihi kan chimh: nihin ah Paradis ah keimah sinah na um lai,”(Luke 23:43)(Sual Ngaihchihnak) 
"Mi nih kan cungah an sual tikah kan ngaihthiam hna bangin kan sualnak kha kan ngai thiam ve" tiah     Jesuh nih thlacam ning akan cawn piak. Pathian sinah kan sualnak caah ngaihthiamnak a kan hal piak lawng siloin amah hrimhrim nih minung sualnak hi a ngaihthiam. Sual i ngaihchihnak thinlung in     amah sin a panhmi ahopauh hi amah thatnak le lianngannak, pennak chungah a kan chiah khawh ko. Pathian pennak chung i i telve ding nakin a ngan deuhmi teinak le ruahchannak Khrihfami nih kan ngei lo. Sual ngaihchihnak hi sual ngaihthiamnak caah a hram asi i luatnak caah kutka asi fawn.

3.
Cuka i a nu le a dawtmi a zultu an dir ko kha a vun hmuh hna i a nu cu, “Ka nu, khaka ah khan na    fapa a um khah,” tiah a vun ti, a dawtmi a zultu zong cu, “Khaka ah khan na nu a um khah,” tiah a    vun ti ve. (John 19:26-27) (Siaherh Zawnruahnak le i Zohkhenhnak)
Jesuh nih hin a Nu a sia a herh, a unau a zultu a sia a herh.Jesuh nih Nu le Pa le fa le karlak (chungkhar) ah i siaherh zawnruahnak le i zohkhenh cio ding akan duh piak. Nu le Pa nih kan fale kan thlau lo ding abiapi bantuk in, fa le nih Nu le Pa hi zohkhenh ding abiapi. Nu le Pa pawng i um ttung i Nu le Pa zei rellomi si sualloding abiapi.Lamhlat ramdang phanh hnu ah Nu le Pa a philh dengdeng mi hna si sual loding abiapi.Cu lawng siloin "Ka unau pakhatkhat cungah, zeitluk hmanh in sifak le nauta sisehlaw, nan tuahmi thil paoh hi ka cung i nan tuah a si,’ tian Matthew 25 chungah akan ti rih. Jesuh hnu zultu Khrihfa hna nih Mi harsa, nuhmei, ngakttah zohkhenh cawmken ding hi Jesuh nih akan cahmi, akan fialmi rian asi fawn.
 

4.  “Ka Pathian, ka Pathian, zeicahdah na ka kaltak,”(Matt 27:46)(Tuarnak le I pekchannak)
 Sualnak ngeilomi nih hitluk harsatnak a tuar tikah minung sinak 100 ah 100 asivemi Joseph le Mary fapa Jesuh cu a ttap aihram. Khrih cu sualnak zeihmanh a ngei lo, sihmanhsehlaw kanmah ruangah Pathian nih kan sualnak kha a hrawmter. Kan sualnak a rih tuk caah vawlei pumpi zong nih a phur kho lo i li aa hnin. Ni zong nih Jesuh tuarnak hi azoh ngam tilocaah khua a hmui. Hi bantuk in tuarnak hi afah tuk caah Jesuh dah tilo ahodang nih an phorh khawh dingmi asilo caah, Pathian nih afapa ngeihchun kanmah vawlei mi sual caah akan pek. Pathian le minung kar ah remnak sertu cu minung Khrih Jesuh lawng a si, amah cu mi vialte tlanhnak caah a lu aa pemi asi.
 
5. 
“Ka ti a hal,”(John 19:28) (Tem-innak)
Jesuh minung asinak le zeitluk indah kan caah harsatnak a tuar tihi a fiang. "Ka thazang a dih cang,     vawlei i thletmi ti bantukin a dih cang. Ka ruh vialte kha ka hliahhlok in an pong dih, ka lung cu ka chungah a timi khuailul bantuk a si.Ka hrom cu leidip ro in a ro, ka lei cu ka dang cunglei ah aa beh" tiah Pslam 22:14-15 ah aa ttial. Jerusalem in Golgatha karlak Harsatnak Lam cungah suimilam pathum hlei thi le thlanti luangin harsatnak a tuar. A pum taksa a derthom lawng siloin, a thinlung a thlarau a ba. 
 
6. 
“Aa lim cang,” (John 19:30) (Teinak)Jesuh thisen nih vawlei thokka tein arak ummi sualnak vialte(Genesis 3) kha a thian ter dih. Vawlei a nun chung kum thum chung hrawng i a tuanvo lawng kha siloin, vawlei thokka in zungzal tiang caah Sual Ngaihthiamnak le Khamhnak kha akan pek. Sualnak vialte atei, sualnak nih a ngeihmi chiatnak vialte atei. PA Pathian nih vawlei misual khamh awkah FAPA Jesuh arak thlah i, cu FAPA Jesuh nih sualnak kha a tei, arian aa lim cang i, THIANG THLARAU in a zungzal in a kan umpi lai. Jesuh nih cun, “A ka dawmi paoh nih cun ka bia kha an ngaih lai. Annih cu ka Pa nih a dawt hna lai i ka Pa le keimah cu kan ra lai i an sinah kan um lai. A ka daw lomi paoh nih ka bia kha an ngai lo. Ka chimmi bia nan theihmi hi keimah bia a si lo, a ka thlahtu ka Pa bia a si. “Hi vialte hi nan sin ka um lioah hin kan chimh hna, sihmanhsehlaw ka Pa nih ka min in a run thlah laimi Bawmtu, Thiang Thlarau nih cun zeizong vialte kha an cawnpiak hna lai i kan chimhmi vialte hna kha nan lung an pemter hna lai. “Daihnak kan chiahtak hna, keimah daihnak cu kan pek hna. Vawlei nih an pek hna bantukin kan pe hna lo. Lungrethei le vansang au in um hlah u: nan thin zong phang hlah u. ‘Kan kaltak hna lai,sihmanhsehlaw nan sinah ka ra ṭhan lai,’ (John 14:23-28) ati. A thawhtthan nakding hi hika ah a chimh cia cang.

7.
“Ka Pa, na kut chungah ka thlarau kha ka chiah,” (Luke 23: 46)(Nun raithawinak)
Ka Pa sinin a rami ka si taktak i vawlei cungah hin ka ra; atu cu hi vawlei hin ka chuak lai i ka Pa sinah ka kal lai," tiah John 16:28 ah Jesuh nih a chimhcia cang. Jesuh cu achimh ningin a ttuan taktak tu asi. Jesuh nunnak hi a chuahka in a thih tiang Pathian sinah rawithawinak nun asi. Pathian a lawmtertu thi zeipauh tuahmi hi biaknak le thangtthatnak asi caah, Jesuh nih a chuahka in a thih tiang Pathian lung a tong kho i, athih tik hmanah ah a thlarau Pathian sinah a chiah. Sihmanhsehlaw Pathian nih a kan zaangfahnak cu a tam tuk i a kan dawtnak cu a ngan tuk hringhran caah a nawl kan ngaih lo ruang i thlarau lei in kan thih ko lioah khan Khrih sinah cun a kan nunter. Khamh nan sinak cu Pathian vel thawngin a si. Khrih Jesuh he kan i pehtlaihnak thawngin vancung khua i amah sin i uktu si ve dingah, amah he cun a kan thawhter. Khrih Jesuh thawngin a langmi a dawtnak chung i a ummi a vel cu zeitluk in dah a ngan ti kha a zungzal in hmu hna seh ti a kan duh caah, hi cu a tuah. Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si. (Efesa 2:4-8)

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU