Jesuh Jerusalem Sunparnak he a luhnak (Mark 11:1-10)

Biahram domhnak

Pastor Samuel

Jesuh Jerusalem a luhnak kong hi kan zoh ahcun, Jesuh nih Amah tein Bawi a sinak, Messiah a sinak le profet a sinak hna a langhternak a si. Cu caah a lut tikah sunparnak he a lut. Hihi kan zoh tikah a kan hmuhsakmi le a kan cawn piakmi thil hna tlawmpal  langhter kaa zuam lai. Jesuh Jerusalem a luhnak hi gospel pali ning in an ttial cio hna i Mark ttialmi hi ka langhter lai.

Mark 11:1-10 ( A tawinak in): ¹Jerusalem ah a kal i Bethanikhua kha an phan dengmang cang, cu tikah Jesuh nih a zultu pahnih kha a thlah hna i, ²"nan hmai khua ah khin va kal u law nan va luh ka te ah khin ahohmanh nih an i cit bal lomi laa fate, hri in aa hreng ko mi kha nan va hmuh lai. Va phoih u law hika ahhin ratpi u. ³Cun minih, ' zeicahdah mah khakha nan tuah?' tiah an in hal hna ahcun, 'kan Bawipa nih a herh i kan rak in pek than hna zau lai, ' tiah nan ti hna lai," a ti hna. ⁴Cucaah cun rak kal i inn pakhat innka ah la fate pakhat a rak i hreng ko kha an va hmuh taktak......... ⁷Laa cu Jesuh sin ah khan an ratpi hna i an puan kha a keng ah an danh hna i Jesuh cu aa cit. ⁸Mi tampi nih an puan kha lamah an phah, cun a cheu nih lo lak i thing nge kha an va samh hna i lam ah cun an phah hna. ⁹Mi tampi nih an au i, " Pathian cu thangthat ko, Bawipa min in a rami cu Pathian nih thluachuah pe ko seh. ¹⁰Kan pu David pennak a rading cu Pathian nih thluachuah pe ko seh, Pathian cu thang that ko u, " an ti.

Balbal nih chimmi zohtthannak

Vs.1-5 Ahhin Jesuh nih zultu Pahnih a thlahnak kan hmuh. Tyndale Commentary nih a timi cu, 'zultu pahnih thlah a sinak cu, zumhnak ca i hmai a kal chungtu an si;  a thei lomi hna sinah i an bawipa i bochannak le nawlngaihnak in an kal langhternak, thil pakhat a ummi cu zumhnak thawng in zumhnak (through faith for faith. Rom. 1:17) caah thlah an si' , a ti. Pathian nih zumtu hmuhnak ding zumtu a kan herh.

Vs.7-8 Chung ah laa a keng puan danh a si nak le lam ah puan le thing nge an phahnak cu Jesuh Siangpahrang buntuk in an cohlannak a si. Cu siangpahrang cu David chung in a ra ding ti an awrhmi a si. Jesuh nih sunparnak an pek kha a thlauh hna lo. Cun Bethani khuami nu nih zihmui a toih lio zong kha micheu nih a toihtu nu kha an mawtchiat ko hna nain Jesuh nih mawtchiat hlah u, kei cu nan sinah ka um zungzal ttung lai lo, a ti hna(Mk.14:3-7).

Vs.9-10. Mipi nih Jesuh kha an thangthat i " Hosana" tiah an au. " Bawipa min in a rami cu Pathian nih thluachuah pe ko seh" an ti lio ah annih chung i aa telmi Farasimi hna nih khan Jesuh cu an thawh i, Saya,na zultu pawl hi daihter hna, an ti tikah Jesuh nih a lehmi hna cu hi mihna hi ka daihter hna ahcun lung hrimhrim hi an au lai, a ti hna(Lk.19:39). Hihi kan zoh tikah Jesuh zongnih surparnak le thangtthatnak an pek kha a lawmh ko hna ti cu a fiang. Cu caah ah a kan khamhtu thangtthat hi zumhtu hna i kan rian pakhat ah ruah hrim hrim ding a si.

Laafate or Laa le la fate(Mk.11:2 le Mt.21:7) : Matt. nih cun laa le a fate a ti, laapi he, laafa he Jesuh cit dawh in a chim(Mt.21:7). Hmundang ahcun la fate lawng an langter. Matthai ni laa pahnih a cit ternak a ruang cu, Matt. cu Jews mit in Baibal a ttial caah Baibal Cahlun ta kha a lak caah a si. Profet Zakariah nih, Jesuh Jerusalem a luhnak kong kha hi tin hi a rak  ttial chung cang, ' I lawm tuah, i lawm tuah, Zion fanu, fakpi in au tuah, Jerusalem fanu, zeicahtiah zohhmanh na Siangpahrang cu a ra lio, Amah cu teitu a si, teinak cu amah ta  asi, toidor in Laa cung cit in, laa fanote cung cit in a ra (Zekhariah 9:9),' a ti. Hi kan lai Baibal ahhin cu Laa hi pakhat zong a si kho, pahnih zong a si kho, Laa a timi kha Laa fano zong a si chih khawh. Asinain Baibal dang ahcun fiang tein laa pahnih an si kha a langter.

Zeiruang ah laa theng aa cit? Jesuh nih laa theng aa cit hi zeiruang ahdah a si hnga, ti ruahnak Acheu cawnpiaktu hna nih an ti micu, Laa cit cu toidor he daihnak phawrtu hmelhchunhnak a si i, rangcit cu teinak pawrtu hmelhchunhnak a si, an ti. Abiana ah ral an tuk i an tei a si ahcun, rangcung cit in khua lei thangttha thanh ding in thlah a si ttheo, an ti. Laa aa cit ruang ah mipi nih an hmuh cio khawh hna i an thanngtthat khawh hna.

Mk.11:1-10 Chungah  kan hmuhmi hna thil 4 .

1.      A nawl ngeihnak le a sining  a langhternak si  a si. Zei cah tiah 'Jesuh nih laa fate an rak hrengmi kha va phoih u law, ratpi u, ziah nan phoih tiah a ngeitu nih an inti hna ahcun, kan Bawipa nih a herh va ti u'(v3), a ti. Amah Jesuh bia bang in an va chimh tik ah a ngeitu hna zong nih siangte in an rak pe ve hna. Matthai nih a langhtermi pakhat cu, Jerusalem khua chung an va luh tikah,' hipa hi ahodah a si?' an ti i mibu nih hipa hi profet Jesuh a si, an ti (Mt.21:10-11).

2.      Zultu pahnih thlahnak cu zultu (zumtu) vialte a kan thlah hmehchunhnak a si. Jesuh cu a zultu hna hi a thei rih lomi hna sin ah a kan thlah. Zultu pahnih cu a hreng komi va phoih piak ding in a thlah hna. Cu bantuk in kannih zumtu hna zong Jesuh nih hrengmi hna, a luat lomi hna lautnak pek awk ah a kan thlah. Jesuh nih nawlngeihnak cu pek ka si cang, cucaah khua zakip ah va kal u law miphun vialte kha a ka zultu ah va ser hna u (Mt.28:19), a ti.

3.      Amah, Jesuh sunparnak ding caah Laa hri phoih piak a si.. Jesuh hrengmi, hremmi hna luatter le phoih piak a kan fial cu, Luatnak hmuhnak ca lawng si loin Amah sunparnak ca zong a si chih. Hrengmi laa kha luatter a sinak cu, amah duhning in nunding si lo in Jesuh duhning in umding a si. Cucu mipi nih an theihnak ding le surparnak an pek khawhnak hnga caah a si. Phundang in kan chim ahcun aa citding, a hman hnga ding a si.

 Zumtu hna nih kan ruahawk a herhmi cu Jesus nih luatnak, khamhnak a kan pek hi kanmah duhning in um ding si loin Amah nih a kan tinh piakmi ah kal ding tu a si deuh. Laa fate a hri phoih piak a sinak cu a duhnak ah tlawng ding si loin Jesuh tinh piakmi Jerusalem lei kal ding le Jesuh sunprnak caah a si.

4.      Jesuh citmi laa fate zong surparnak a co ve. Jesuh cu Jerusalem a luhnak a lam thluan ah puan le thinghnah phah piak a si. Sihmanh seh law, laa cung cit in a kal tik ah sunparnak peknak caah an phahmi puan le thing hnah cu laa nih cun a lamh men ko hna. Jesuh nih aa citmi laa cu surparnak le thangtthatnak hna cu aa hrawm ve. Hi nih a kan cawn piakmi cu Jesuh a hmangmi, aa citmi kan si ko ahcun a sunparnak zong kan i kan i hrawm ko lai. Rom 8: 17 nih a timi cu a temh-innak kha kan i hrawm ahcun a sun parnak zong kan i hrawm lai.

Nihin Khrihfa cheukhat cu a temh-innak hrawm duh loin a sunparnak lawng hrawm kan duh. Laa fate nih Jesuh aa citter lo ahcun Jerusalem a luh kho lai lo. Sunparnak zong aa hrawm kho lai lo. Cu caah kan nih zong Jerusalem thar ah Jesuh Sunparnak aa hrawmmi si ding ah Jesuh nih aa cit khomi laa bantuk kan si a herh. Jesuh kha Lu ah kan ser i kan cungah chiah ve a herh. Jesuh caah kan nun, kan thazang kan hman lawng ah a sunparnak cu kan i hrawm lai.

Bia funnak

A donghnak ah chim ka duhmi cu: (1)Jesuh laa cung cit in ra hlah seh law, mipi nih an hmuh cio kho lai lo, tiah ka zumh. Jesuh cu Laa aa cit caah mi vialte nih an hmuh khawh i an thangtthat. Cu ve bantuk in kan cung ah a ummi Jesuh hi mivialte nih an hmuh khawh ve nak hnga zumtu hna kan rian a si. (2) Satan pennak chung in luatter kan sinak cu kanmah duhnak lei ah kal ding si loin Amah Jesuh Sunparnak caah ah kan nun hmang Jesuh nih a kan duh. (3) Kan nun kha Jesuh sunparnak caah a hmangmi kan si ahcun, a sunparnak zong kan in hrawm ve lai. Cu caah atu kan nun hi hmailei nunnak caah a biapit ngai, ti hi kan theih cio ding ding ka duhmi a si.