Kan Put Ding Kan Vailamtah Cu ...

Ahohmanh a vailam tahnak kha aa put i ka hnu in  aka zul lo mi cu ka mi si awk aa tlak lo. Matt 10 : 38

 A vailam tahnak kha aa put i aka zul lo mi cu aka zultu asi kho lo. Luke 14 : 27

Rev. Timothy Pa Hrang

Mahhi Pathian bia thiang asi . Amen

Thlacam ta u sih ;

Bawipa Pathian na bia thiang hi na duh ning in kan cohlan khawhnak hnga le kan i nun pi khawhnak lai na Thiangthlarau in kan bawmh hram ko .Bawi Khrih min in ; Amen .

ZBC Hymn No : 279 ( Jesuh lawng nih maw vailam aput lai ? )

Khrih nih amah vailam tahnak cu aa put cang caah kan put ding vailam tahnak cu Khrihnih aa put cang mi si lo in kanmah vailam tah tung tu asi .

Bawi Khrih nih arak putmi vailam tahnak cu ruat hmanh usi . Aral hna nih an duh ning te in an saih piakmi asi. An put ter tik ah achah tuk, asau tuk, arit tuk, ahrap tuk ti in kaa khat hmanh holh lo te in an tuah ning in aa put ko . An saih piakmi vailamtah cu a caah arit tuk ruang ah atuar lo i aapu kho bak lo. Amah duhnakah kal pi lo in aral nih an hruainak Kalvary tlang ( Luruh tlang  ) lei panh in a kalmi lamcho sangah atu le atu atluk pi . Adonghnak ah cun lam ah khan Sairin khuami Simon kha an tawng i vailamtahnak thing kha hram hram in an put ter . Mtt 27 : 32

Cu tin an tuah cu Jesuh Khrih an zangfah caah si hin lo in arit tukmi vailam tung an put ter ruangah athabat arei theih tuknak tur khawh lo in  Galgotha ( Luruh Hmun ) vailam cungah an tar manh hlan ah athi sual lai ti an phan caah asi .

Kan put hnga vaitam tah cu: aputu kan ca ah zang deuh seh tiah kan themh ding asi lo . Kan tan ding zong asi fawn lo .

Vailamtahnak cu zawmhtaihnak , thangchiatnak, chiatsernak , hremnak le thah tuarnak asi. Matt 27:27-50; Mk 15:33-41; Lk 23:1-39; Jn19:44-49

Cu vailamtahnak tung cu kanmah nih kan duh ning in  ( Order made ) tuahmi asi lo. Kan ral nih an mah duh ning te in an kan put ter ding le an kan tarnak dingah an tuahmi asi. Cu ruangah apu tu ding ca ah achah tuk kho , arit tuk kho , asau tuk kho mi le ahrap tuk kho mi asi. Kan cungah thil ttha lo tuah a duhmi nih cun awl te in kan put khawh ding cu an tuah bal lai lo ti cu afiang ngaimi asi.

Cu ca ah akan dawtu nu le pa , tu le fa  ,  u le nau , rualchan cingla ,  hawi le kawm hna nih kanmah  siarem ding ah an kan tuah piakmi cu kan put hnga vailamtahtung asi kho lai lo. Cu ruangah Khrih thawngttha zumtu paoh paoh Khrihfa kan si ko nain Zumtu paoh paoh Zultu kan si kho lo ti cu afiang mi asi .

Kan put hnga ding vailamtah tung hi achah tuk , arit tuk ,asau tuk ,ahrap tuk tinak nawl kan ngei lo .

U le nau hna kan i ruah ding cu :

01. Mah te in saihmi vailamtah tung maw kan put kun lai ?

02. A kan dawtu hna nih an kan saih piakmi vailamtah tung maw kan put lai?

03. Kan vailamtah tung pu lo in maw acit tu in kan i cit kun lai ?

Kan ral nih an kan tuah piakmi vailamtah tung kan put ko ah cun ttih anungmi Golgotha (Luruh hmun) cu kan phan te ko lai. Cu vailamtah tung ah khan zawmhtaihnak , sersatnak , chiatsernak he thlai kan si ko lai.

Sihmanhseh law :

01. Thlai kan si i kan thaw acat tik ah cun kan ral (Akan dohtu) hna hmanh nih Pathian kan Pa kha an thangthat lai i hipa hi asual hrim hrim lo    an ti te ko lai . Lk 23 : 47 .

02. Nunnak angei lomi Vawlei pumpi ;  Nikaa ; Thlapa le Arfi  hna hmanh nih Pathian fa kan sinak kha tehte an khan te ko lai. Mtt 27 : 54 .

Cu tik ah cun, Khrih keneh zulh in mah vailamtah tung kan put ruang i zawmhtaihnak , sersatnak  , chiatsernak le thah kan tuarnak vialte cu Pa Pathian Sunparnak ca ah asi te lai .

Thawngttha a hrawmtu kan dih lak cung ah Pathian nih thluachuah kan pe cio ko seh.

Adonhnak hla : ZBC 387   Kal law ttuan ( Go and work )