Tlang Pathum

Matt. 28: 19 Cucaah khuazakip ah va kal u law miphun vialte kha ka zultu ah va ser hna u

Tutan zarh hi Khrihfabu tam nawn ahcun Mission Sunday nan hman cio theo lai tiah ka zumh. An hmannak a ruang cu tutan zarh hi Mission riantuannak caah zaanghlei cawikhun u sih ti khi a si. Zeicatiah Mission rian le Khrihfabu cu aa tthen kho lomi le tthen awk a ttha lomi nu le va bantuk an si.

1. Sinaitlang ( Nawlbiatlang)

Sinaitlang hi Moses nih nawlbia Pahra a rak laknak tlang a si caah phundang in chim ahcun Nawlbiatlang tiah kan ti khawh. Cu nawlbia Pahra hna cu- 1) Keimah hlei in pathian dang nan biak lai lo. 2) Siasal nan biak lai lo. 3) Nan Pathian min cu ningcang lo in hmang hlah u. 4) Sabbath ni kha ulh hna u. 5) Nan nu le nan pa kha upat hna u. 6) Lai nan nawng lai lo. 7) Va cung in pa nan i duh lai lo, nupi cung in nu nan i duh lai lo. 8) Nan fir lai lo. 9) Nan minung hawicungah tehte dinglo nan si lai lo. 10) Nan inn pa inn kha nan mit a thi lai lo. A satil siseh, a nu pi siseh, a sal pa le a sal nu siseh, a ngeihmi thil poah siseh, nan mit a thi lai lo, a ti.

Hi lio caan hi kan zoh ahcun nawlbia zulhnak le tuahnak in Pathian rak biak caan a si tiah kan ti khawh. Nawlbia ti sullam cu zulh ding phunglam a si i zulh ahcun luat ding a si i, zulh lo ahcun dantat ding a si. Phundang in kan chimh ahcun kan zulh kho ahcun zungzal nunnak kan co hnga i kan zulh kho lo ahcun zungzal hell ram kan co hnga. Tuah u, zulh u, nan tuah lo i nan zulh lo ahcun nan thi lai ti cu nawlbia kha a si. Cucu kan i  ruah duhmi tlang pakhatnak cu a si.

2. Kalvari tlang ( Velngeihnak/ Khamhnak tlang)

Chan a hung liam zuahmah i Pathian nih Sinaitlangah nawlbia a kan pekmi cu a homihmanh nih kan zulhkho lo caah Kalvari tlangah a kan lanhpi. Kalvari tlang kan timi cu kan theih dih cia mi, Bawi Jesuh Khrih nih vawilei mivialte kan caah, chiatsernak phunzakip he vailam cungah  a nunnak hloh bak in a kan tlanhnak/ khamhnak tlang kha a si.

Cu Kalvari tlang, chiatsernak vailam cungah a thimi Bawi Jesuh Khrih vel le thisen thawng in Nawlbia a rak zulh kho lo ruangah a thi hngami nang le kei cu luat ter kan si cang. Haleluiah! Cucaah Kalvari tlang cu Velngeihnak/Khamhnak tlang tiah ka ti duhnak a si. Khrih nih Kalvari tlang vailam cungah kan ca i, a nunnak a hloh thawng in mi zeihmanh hi thihnak chung in luat ter kan si cang. Cucu Pathian vel thawng in a si. A min thiang thangtthat in um ko seh. Amen! Hihi kan i ruah duhmi tlang pahnihnak a si.

3. Galili tlang (Mission tlang )

Galili tlang hi Mission tlang tiah kan ti khawh. Kan Bawipa Jseuh Khrih cu vawlei mivial te kan caah a thi i a tho tthan hnu ah a zultu hna sinah a langhthan. Cutincun azultu hna he ni tlawmpal an len tti hnu, vancung khua a kai lai te ah, rovui bia a cah takmi hna cu nihin kan Biblecang thimmi hi a si. Siaherh taktak in a cah takmi hna rovui bia mak taktak khi a si. Cu a rovui bia cu hi ti hin a si-

Cucaah khuazakip ah va kal u law, miphun vialte cu ka zultu ah va ser hna u,” ti hi a si. Hi rovui bia hi zumtu nang le kei caah a si. Hi bia umtu ning zohhliah tikah ralkap bawinih a kuttang ralkap hna sinah va kal u, va tuah u, tiah order a chuahmi bantuk khi a si. Kal lo awk tha lo le ttuan lo awk tha lomi kan tuah hrimhrim dingmi a si. A hopoah hi bia chung in kan luat kho lo. Cucu Mission rian kan ti lengmangmi cu a si.

Cucaah kan bia hmaiah kan chimh cang bantukin Khrihfabu le Mission rianttuannak cu aa tthen kho lomi a si. Nihin Khrihfa kan chan hi Galili tlang pin lei  chan a si cang. Kalvari tlang cu kan lonh diam cangmi tlang a si. Nain micheukhat cu Kalvari tlangah a helhum rihmi kan tam ngai rih. Pathian nih a fale kan nunnak hi a dotdot tein a kan kal pi lengmang. Cucaah mithiang Paul zong nih cekcek (Sanpioh) lawng ei duh peng hlah ngat u, bu hakmi zong hi ei pah cang tuah ngat u  tiah a kan ti phah.

Khrihfa mi nunlam hi a fawimi le a nuammi lam a si bal lo. Biakinn chungah khuangtum in lam cu a nuam ngai nain rammui ah vakal i nunnak le thisen vathaap cu a fawi hrimhrim lo. Carson bawinu le bawipa cu vawlei ram  ttha bik le ram nuam bik an timi US ram chuak takin vawlei cung sifaknak ram Laitlangah an nunnak liam tiang in Khrih rovui bia cu an zulh i an ttuan. Lairam ah CCOC palai mi tampi an nunnak liam tiangin  Khrih rovui bia (Mission) cu an zulh i an ttuan ve.

Lautu zumtu nusal pasal hna- hawi dang cu an nunnak liam tiang in dahkaw thlarau tlau caah rian an ttuan hih! na biartung ilet law, na taisawm fek tein i sawm tuah, na hacang irial chih law, na kuttum i sum chih law a tlau cuahmah mi le rak kan chanh u tiah a ho bawmtu ngei lo in a hrum a ai cuahmahmi kan unau  caah tho usih law kal usih. Kumkhat chungah thla 12 kan ngei sikaw, na ni hlawh chungin thlarau a tlaumi caah kumkhat chungah thlakhat na ni hlawh tal in na kal ve lai lo maw? Pathian dawtnak le tthatnak kha philh hrimhrim lai ci unau.

Khuazakip ah kal kan ti tikah kan zapi Lai Bible pakhat cio le hla cauk pakhat cio zal ah isanh zau in kan kal dih lai tinak a si hrimhrim lo. Kan zumhnak dirhmun ah a dilmi si lo in a luangmi si ding tu kha a si deuh. Ti cu aa dil peng ahcun a thu a nam i, dinawk ttha a si kho lo. Khrihfabu/ zumtu kan ti mi zong hi a luang lo ahcun din awk ttha lo ti bantuk  kan si ko hnga.

Dawtmi ka phun hawi hna, Mission rianttuannak ahhin, ka manh rih lo, ka fim lo, ka rum lo, ka dam lo ka tar cang tiah hrial khawh le al awk khawh a si lo. A tu kan caan hi kal i ttuan caan a si. A homihmanh nih kan i hmaithla dingmi rian pipa taktak a si. Cu rian cu Galili tlang i,  Khrih nih vancungkhua a kai lai te caan, a zultu hna sinah ro a vuih takmi rovui bia a si. Nihin Khrih zumtu kan dirhmun cu Galili tlang pin lei nun a si awk a si cang. Cu bantuk zumtu nunnak nih cun caandongh Ni ah sunparnak sui luchin he na Pathian an tawng tertu a si te lai. Pathian nih thlua kan chuah piak hram seh. A men!

Comments

Popular posts from this blog

Zohchun Awktlak Khrihfa Innchungkhar

Zumh Awktlak Nun

Bawipa Cu A Tha