BAWIPA NIH TUUKHAL BANTUKIN A KAN VEN


1Bawipa cu tuukhal bantukin a ka vengtu a si, ka herhmi vialte kha a ka pek dih. 2Ramhring lakah a ka bawhter, dinh hmun ti pawngah a ka hruai. 3Thazaang thar kha a ka pek i a rak ka kamh bantukin ahmaanmi lam ah a ka hruai. 4A thuk bikmi muihnak horkuang chungin kal hmanh ning law, Bawipa, zeihmanh ka ttih lai lo, zeicahtiah nangmah nih na ka umpi. Na thiangthunh le na tanbo nih ka hna an ka ngamter. 5 Ka ral hna hmaika ah rawl na ka dangh, ka lu ah chiti na ka toih i ka hrai cu a liam in a liam. 6Na thatnak le ka dawtnak nih ka nun chung vialte an ka umpi lai i  na inn cu a zungzal in ka inn a si lai. (Salm 23:1-6)



Pastor Bawi Dua
Bawipa lamhruainak kan timi hi vawlei cung kan nun chung ca lawng si loin zungzal kan thlarau ca tiang a si (cang 6). Hi vawlei cungah lam a phunphun (a harnak le a fawinak ) ah a kan kalpi, a kan hruai.

1. Ka herhmi vialte kha a ka pek dih

Salm catialtu nih, “ka duhmi vialte kha a ka pek dih” ti loin “ka herhmi vialte kha a ka pek dih” a timi hi chingchiah awk tlak ngai a si. Duhmi le herhmi thleidan thiam i papek thiam hi a biapi ngai. A caan ah cun kan duhmi hi kan herhmi ah kan ruah tawn. Kan duhmi paoh hi kan herhmi a rak lem lo. Herhmi duh thiam hi a biapi tuk. Kan duhmi nakin kan herhmi hal thiam hi Bawipa nih a duh deuhmi a si. Tuukhal bantukin a kan vengtu Bawipa kan Pathian hi kan duhmi paoh pek dih aa timmi a si lo. Kan herhmi tu kha pek a kan duh. Herhmi pek kan si hi Bawipa a thangtthat tuk ding kan si.



Thli, ti le ceunak te hna hi kan nunnak ah a um lo awk tthat loin kan herhmi a si. Cu hna cu a man in i cawk herh sehlaw zarhkhat nunnak khim hmanh aa cawk kho lo kan tam lai.Cu kan herhmi cu Bawipa nih man lo tein a kan pek. Hi ruangah Bawipa na thangthat i a sinah lawmhnak na chim kho maw?



2. Ramhring lakah a ka bawhter

Ramhring timi cu dum le lo a si lo ti cu hngalh cio a si. Ram lak i hring dildel tein a ummi kha a si. Saram tlawnnak (pastures) kha a si. Saram (tuu) pawl caah ramhring lak ah bawh cu a nuam tukmi le hna a ngam tukmi a si. Nain, cu phen te ah philh awk a ttha lomi cu ramhring lakah sahrang zong um an hmang ti hi a si. Ramhring lak a si ti i hnangam tuk in a bawh sawh i khaltu zei a rel lomi saram (tuu) pawl cu an i relh lo karah sahrang nih an seh sual tawn hna. Hlawhtlin caan a si rua an ti lio ah sahrang rawl ah an cang sual tawn.



Cucu kan i ralring a herh ngaimi a si. Thluachuach kan tin co, kan hlawh a tling kan ti lio can ah thluachuah petu Pathian kan philh sual ahcun thluachuah kan timi hi sahrang ah an cang kho ve. Luke 15 chung kan hmuhmi Fapa Tlau pa nih bekawng hmanh ttam len a duh i ttam awk a ngei lonak le a donghnak ah a tawro in a thutnak a ruang cu a pa ro thluachuah hman zia a rak thiam lo caah a si. Luke 16:9 ah vawlei cung chawva in hawikom i ser hna u a ti. A sullam cu vawlei cungah nan hmumi chawva cu an petu hna Pathian nan hngalh chinnak si sehlaw Pathian he an hawikomh tertu hna siseh tinak a si. Ramhring lakah sahrang um ve ti thei buin ramhring lak bawh zia thiam hna u sih.







3. A hmaanmi lam ah a ka hruai (he guides me paths of righteousness, NIV)

“A hmaanmi lam” ti hi “a dingmi lam” ti zong in ti khawh a si rih. Cu lam cu Bawipa nih a rak kan kamhmi a si. Cu a rak kan kamhmi lam ah cun Bawipa nih a kan hruai. Cu lam cu zei lam dah a si? A kaumi le a nuammi, zulh a fawimi cu a si ruam lo hih. A bi i zulh a harmi, mi tlawmte lawng nih an zulhmi lam a si (Matt. 7:14). Cu lam cu zul tti hna u sih ti kan sawm hna.



4. A thuk bikmi muihnak horkuang

Bawipa nih a kan kalpinak lam hi mortorka lampi bantuk a si lo. A muih zong a mui i a thuk fawnmi horkuang a si. Salam catialtu nih cun cu lam a thuk bikmi muihnak horkuang chungin kal hmanh ning kaw, Bawipa, zeihmanh ka ttih lai lo a ti. Zeicahdah a ttih lo? Bawipa nih a tthiangtthunh le a tanbo he a ka umpi ti kha a hngalh. Bawipa nih a ka umpi, Bawipa cu ka sinah a um (Immanuel) ti kan hngalh ahcun zei thil hmanh tlung sehlaw kan i lawm ko lai. Habakkuk le Job nun zong kha vun ruah chih hmanh. Bawipa lam hruainak hi kanmah duh bangin a fawimi a si lo. Cucaah mi tampi cu a cheuchum tiang lawng kan zulh i kan pial tthan tawn. Cu lam cu a dongh tiang zul tti hna u sih tiah kan sawm hna.



5. Ka ral hna hmaika ah rawl na ka dangh

Rawl cu dangh vekvek ah hotel te hna ah dangh awk a si nain Bawipa hi ral hmaika hna ah dangh a hmang. Ral hmai ah rawl ei hi a thawtnak zong tep a har ko lai. Ral hmai ah rawl ei cu ralrin tein ei a hau lai. Minung hi kan ral a va tam ve dah! Rawl ei hmanh ah kan ral an um. Ral hna hmai ah rawl a eimi kan si hi i philh sual hlah u sih. Na rawl ei, ti din lai zong ah an vengtu Bawipa a si kha philh hlah.



6. Na inn cu a zungzal in ka inn a si lai

Bawipa nih cu ti i a thuk bikmi muihnak horkuang le ral hna umnak hmun ah a kan kalpi i a kan hruai hi a kan dawt lo caah a si lo. A dawtmi Israel miphun pi zong a dawt tuk hna caah Egypt sal cannak in a chuahpi hna. Asinain an lam thluan kha zoh hmanh. Rawl ttam tihal in an um caan a um ko. Rili sen nih an lam a kham hna i khuaruahhar awklok chawng in an um ko. A cheu, aa sum kho deuh lo pawl cu a zai zong an zai len kha. Sihmanhsehlaw cu harnak chung in Bawipa a tthatnak le a dawtnak kha a lang. Cucaah Salm catialtu nih “na thatnak le na dawtnak nih ka nun chung vialte an ka umpi” a ti. Bawipa tthatnak le dawtnak hi harnak caan ah a lang tawn. Zeithil kan ton zongah Bawipa tthatnak le dawtnak nih an ka umpi ko ti tu kha philh hlah u sih.



Cu ti i Bawipa nih lam a kan hruai cu a inn chungah um ter a kan duh caah a si. A inn cu kan inn si ve seh ti kha a kan duh piak. Bawipa lam hruainak cu a har zong, a fawi zongah a dongh tiang a zulmi hna i a zungzal an umnak an inn cu Bawipa inn a si. Cucu a biapi tukmi a si. Vawlei ah zungzal kan umnak inn a um lo. A zungzal kan umnak ding inn cu Bawipa inn lawnglawng a si. Cu Bawipa inn cu Amah nih tuukhal bantukin a kan vennak tangah a dongh tiang zumh awk tlak tein a zulmi nih kan hmu lai.



Tuukhal bantukin a kan vengtu Bawipa cu kan duhmi nakin kan herhmi tu a kan pek, kan duhnak lei nakin kan herhnak lei tu a kan hruai. A fawinak lawngte si loin a harnak chung zong a kan hruai. Sihmanhsehlaw a dawt le a thatnak in an kan umpi zungzal. A donghnak ah, a zungzal a inn tiang a kan kalpi.

Comments

Popular posts from this blog

Zohchun Awktlak Khrihfa Innchungkhar

Zumh Awktlak Nun

Bawipa Cu A Tha