Pathian Hmaiah Santlailo Thil a um Lo

Pastor Ling Din

Cucaah kuhchuk hnah kha an i put i amah don awkah khan an kal i, “Pathian cu thangṭhat ko u! Bawipa min in a rami cu Pathian nih thluachuah pe ko seh. Pathian nih Israel Siangpahrang cu thluachuah pe ko seh,” tiah an au. John 12:13

Jerusalem khua kha an hei naih cang i Oliv Tlang i a ummi Bethfeih le Bethani khua kha an phak tikah, Jesuh nih a zultu pahnih kha a thlah hna i “Nan hmai khua ah khin va kal u law nan va luh kate ah, ahohmanh nih an i cit bal lomi laa fate, hri in aa hreng komi kha nan hmuh lai. Va phoih u law hika ah hin ratpi u. Cun mi nih, ‘Zeicahdah mah khakha nan tuah?’ tiah an in hal hna ahcun. ‘Kan Bawipa nih a herh i kan rak in pek ṭhan zau hna lai,’ tiah nan ti lai,” a ti hna. Cucaah an rak kal i khua chung zalam ah cun inn pakhat innka pawngah laa fate pakhat a rak i hren ko cu an va hmuh. An phoih lioah khan an pawng i a dirmi micheu nih khan, “Zeidah nan tuah? Laa fate hri maw nan phoih?” tiah an hal hna. Jesuh nih a chimh hna bantuk khan an leh hna i, i kalpi ko u, tiah an ti hna. Laa cu Jesuh sinah khan an ratpi i an puan kha a keng ah an danh i Jesuh nih aa cit. Mi tampi nih an puan kha lam ah khan an phah, cun a cheu nih lo lak i thingnge kha an va sam hna i lam ah cun an phah hna. "Hosanna! Bawipa min in a rami cu Pathian nih thluachuahnak pe ko seh. Kan pu David pennak a ra liomi cu thluachuahnak hmu ko seh! Hosanna! A sang bik van ah khin Pathian cu thangṭhat si ko seh,” tiah an ti. Marka11:1-11


     Hibantuk in caantha caan sunglawi a ka petu Pathian cungah kaa lawm i caan a ka petu pulpit committee cungah lunglawmhnak tampi ka ngei.
     Atu kan relmi Baibal cacang hi kan theih lengmang mi Jesuh Khrih Jerusalem a lut lioah sunglawi ngaiin an rak dawnnak le hrem rih lomi Laa fate aa citnak kong asi. Jesuh Khrih Jerusalem a lut lio a sun lawi tertu thil pathum Laa, Puan, le Thinghna (Kuhchuk hnah) kong hi  chim ka duhmi asi.
     Laa hi hrem ciami a um ko nain hrem lomi thengmang kha Jesuh nih ai thim. Laa hi a hlan ahcun siangpahrang le bawi hna nih an hmanmi asi. Kan khua kan ram hna zongah zunglei in a tlung bawi hna nih an rak tlunpi tawn kan hmuh. Khuasak tha le bawi lawngnih rang in khual an rak tlawng tawn. Jesuh sunparnak a langh tertu cu hrem lomi Laa fate asi. Kan theih awk cu zeitlukin sunparnak a langh ter zongah Laa cu bawi asi lo ti hi theih ding asi. Nihin hrem lomi Laa bantukin  biakinn pumhnak a phan bal lomi zong hi Pathian nih a kan hmanmi tampi kan um lai i aa pum lengmang mi zong hi a kan hman lo lio caan a um ko lai. Pathian nih a kan hman lioah hin minung hmaiah kan bawi lo ding hi a biapi ngai. Laa fate cu hrem lomi a si nain a hrang lo. Dai tein Jesuh nih aa cit. Duhpaoh ni cawl seh law Jesuh sunparnak kha hmual a pho ter sual hnga. Kan nih Jesuh le Khrihfabu hmual a pho tertu si loin sunparnak a langh tertu si kan herh ve.
         A pahnihnak ah puan kong hi chim ka duh. Kan Laipuan hi man a ngei ngaimi asi. Pathian nih kan nu hna thawitenh thiamnak sang taktak a rak pek hna. Kan Laiphung ah puanparkai asiloah puanphah hi sung ngai in kan ngeih mi thil pakhat asi. Keimah chan ahcun ka tanh ti lo nain Bishop a rak tlun lioah puanpar an kai termi cu ka hmuh ve. Bukbau chungah kan chiah lio cu a ho nih a ngeih zong kan theih lo. An vun chuahpi cio tikah Bishop pa kan sunsaknak kha a langh ter ngai. Vawlei chiah le hlawnh sawsawh ahcun san a tlai lo nain Pathian caah cun san tlai takmi asi. Puan cu nunnak a ngei lomi thil a si nain Pathian sunparnak a langh tertu ah a cang.Pathian nih a kan hman i a herh ahcun vawlei zongah kan i phah ve a hau ko. Mitang ah kan bawk a hau ko. Pathian hmanmi minung, a sunparnak a langh tertu minung kan si a herh ko.
     A pathumnak ah chim ka duh mi cu Thinghnah/Kuhchuk hnah hi asi.Mark chung ahcun thinghnah a ti nain Johan chung kan relmi khan cun Kuhchuk hna a ti i Kuhchuk hnah kong hi chim ka duh. Kan ramah hin Kuhchuk hi vawlei tha a kho lo. Vawlei chia deuhnak a bo deuhnak lawng a kho. Kan lo hna ah a um ahcun a ci mit a hau. Vawlei tha a ei dih ti asi. Asinain khat lei ah santlai tak asi ve. A hnah kha hnaw (Hnia sia) ah kan pa le chan ah an rak tah. Aba zong kan ei khawh i a hna zong kan ngakchiat lioah cun kut zung tah thiamnak (seihnam phiar tibantuk) ah a kan bawmh ngai. A thei kha kan ei kho i rap chiahnak ah kan hman caah vasa a kan ei tertu ah a si ve. Kapa hi thil tah a thiam pah i meithal khuh (Lai meithal) ah a tah ve i arte in arak thlen tawn i ar a kan ngei ter kho tu a si ve. Chim ka duhmi cu santlailo kan si zongah, minih cimit a kan duhmi a kan huatmi a kan rem lomi kan si zongah kan mah le kan santlainak , kan ti khawhnak a um ko. Kan thathnemnak a um ko. Cucaah bia a chim kho lomi Kuhchuk hna nih Jesuh sunparnak a co ter khawh ahcun kan mah kan co ter kho ve ko lai.
     Cucaah hi thil pathum Laa, Puan le Kuhchuk hna an si ning hi ruat in Pathian hmaiah santlainak a langh ter kho tu si hna u sih ti hi chim ka duh mi asi. A thami a um a si ahcun Pathian nih a thar in thlua kan chuah piak hram seh. Amen.