Pale Ni Thawngtthabia

Ka fa le biatak chungah khua an sa ti mi nain a ka lawmhter deuhtu zeihmanh a um ti lo.  3 John 1:4:


1. Bia hmaithi:

Rev. Dr. Si Thar
Asunglawi mi “Pa le Zarhpini” ah hi bantuk in ka dawt mi unau hna sinah Pathian bia in thangzang peknak caantha ka hmuh caah tampi ka lung aa lawmh. Hi bantuk in zarhtin “Thawngtha chimhnak” caah tlangtla tu nan cung zongah tampi lunglawmhnak ka ngeih.Pathian min ka thangthat fon.


2. Pa le Zarhpini thawknak atawi in:

America ram Washington DC uk chungah aum mi Spoken khua pawng Big Bend River kam an lo ah Mr. Willian Jackson Smart cu achungkhar he nuam ngai in dum an tuah i khua an sa. Chungkhar te in an i nuam lingcing, 1890 kum March thla ah ruah lo piin an nu nih athi tak hna. A nupi le a fa le a dawtuk mi William Jacson Smart nih cun nu tuanvo le pa tuanvo lak in a fa le cu tha tein a zoh khenh hna. A fa le an van upa dih cang. A fanu fangkhat te zong cu va a van ngeih i Mrs. John Bruce Dodd a van si cang. William Jeckson Smart zong 1910 kum ah a thi ve i a nupi pawng te ah an vui. Nikhat, Nu le Zarhpi ni ah Mrs John Bruce Dodd cu a va pumh ve. Nu le Zarhpi tha tuk le duhnung tuk, lungtlin tuk ding in an tuah mi a hmuh ah a fel tuk mi, a nupi um lo hnu in fa le caah harnak zeipoah tuar in a thabik in a rak zohkhenh tu, a pa kha a van theih than i mitthli he thla a cam bu in ‘Pa le Zarhpi ni” tuah ve ding a lungchungah biakhiahnak a neih. June thla zarhthumnak kha “Pa le Zarhpi ni” tiah ati i atuah thawk taktak. Duhsa tein an ram pi nih an cohlan lawng si lo in atu cu volei khua zakip ah tuah hi asi cang.


3. Bible chungah Pa le cheukhat le chungkhar hna:


Pa” kong ruat ahcun “Nu” kong ruahchih lo in asi kho lo. Zei cah tiah “Nu” um lo ahcun “Pa” a um kho lo i “Pa” um lo ah zong “Nu” a um kho lo caah asi. Bible chungah “Pa” le “Nu” hna dirhmun le an khuakhannak an khuasaknak hna kan zoh tuah hna lai.


- Abraham le Sarah (Gen 16 chung): Pathian biakamnak philh/ hngah khawhlo in anmah ruahnak in khua an khang sual ruangah chungkhar ah lungretheih ngeihchia mitthli tlaknak a tlun zia, cu he aa peh in nihin ni tiang voleipi ah hnahnawhnak aa peh peng zia...

- Isac le Rebekah (Gen 25, 28 chung): An fa le an thleidang sual hna ruangah chungkhar ah lungretheihnak le nuamlonak a tlun zia...

- Noah (Gen.9:20ff): Pa asi mi ei le din thiamlo ruangah fa le chiatser sualnak tiang an phan zia...

- Jepthah (Biaceihtu11:34-40): Pathian attihzah mi asi ko nain mi teiduhtuk ruangah le lungran deuh ruangah mah fanu te thihnak tiang a phan zia...

- Herod le Herodias(Mt.14:1-12): Pa asi mi pawrhlat ruamkai ruangah le Nu asi mi ziarngeih le mihuat ruangah Pathian riantuantu tiang thah a huah zia....

- Joshua le Cornelius (Joshua 24:14 le Acts.10:11) Pa le nih Pathian theih le tihzah bu in chungkhar ah khua an khan i an hruai hna tikah cu chungkhar ah nuamnak daihnak in a khat zia...

- Volei chanpi chanthum ah Pa le dirhmun: Volei pi hi mifim hna nih chan phunphun in an then hna. Cu vialte cu zoh in bualtlak in chanthum ah kan then tuah hna lai. Cu hna cu:
Chanhlun: Pa le nih aanaa ngantak in an ngeih. Fa le hi duh bang in tuah khawh arak si. An duh ah sal ah zuar khawh asi i an duh ah thah khawh hmanh a rak si. Fa le cungah thinlung haktuk in uk cu fa le sunghnak asi kho.

Chanlai: Achia a tha thleidang cuaithlai in nun a rak si. Thazang le thiamnak hmang in nun asi caah an hmet lio cu nu le pa nih fa le kha an tuk an velh an uk khawh hna. An rak tthang hnu ah cu ti in an tuah kho ti lo. Fa le cheuhkhat cu nu le pa nih a tih in an tih lehlam hna. Nu le pa nih a tih in tih mi fanu fapa hna kan si sual maw?

Chanthar/Atu kan chan: Nu le pa aanaa ngeihnak nak in “Right” Covo timi nih an van uk tuk cang hna. Nu le pa nih dawtnak, fimnak le lungsaunak he uk hna lo ahcun mah fa le lila kong ah thawnginn chung hmanh phan khawh asi. Chan zulh in fa le hruai ding pa le nu nih i zuam hrimhrim ding asi.


Pathian atihzah mi Pa le nih Pathian theihbu tein dawtnak le thlacamnak he innchungkhar hruai ko ahcun, cu Khrihfa chungkhar dawh nih cun a cunglei i achanchan in a um kho mi piahtanaa vialte hi a hloh dih i Khrihfa Chungkhar dawh te aser khawh ko. Zei cah tiah dawt awk tlak lo a kan daw i pakhat le pakhat idaw uh a kan titu (Jn. 13:34), nan ral hmanh va daw uh a kan titu (5:44), midang nih na cungah tuah hna seh ti na duh bang in midang sinah va tuah uh(Mt. 7:12)a kan titu Jesuh dawtnak chungah chungkhar an nunpi, an hruai hna caah asi.


4. Pa le nih zohchunawk tlak in nun ding a herh:

Kan Bible nih Pa le pawl hi chungkhar ah “Lu” nan si tiah a kan ti. Lu i sinak hi kan zoh tikah:

Mit pahnih: Pa le nih innchungkhar ah thlarau lei le pumsa lei herhnak kaphnih in zoh le hmuh a herh.

Mah i nupi le fa le hna an thatnak le an baunak zon hna hmuh tti khawh a herh fon.

Hna pahnih: Na nupi le na fa le hna an thangthatnak le an thangchiatnak a pahnih in na theih khawh lai.

Hnar pakhat: Nunnak thaw chuahnak asi. Pa nih thlarau lei le pumsa lei caah nunnak thaw dopzia na thiam a hau.

Ka pakhat: Pasal bia tamtuk cu “Nu” tiah kawh asi. Ka pakhat lawng asi bantuk in hna nih an theih mi hnarcheunak bia tamdeuh na chimh ahcun patling na si lo.


5. Pa le Nu sin in thluachuah:

Nu le pa lo in fa le kan chuak kholo bantuk in nu le pa sin in rak luang lo in fa le nih thluachuah kan hmu kho lo. Bible nih a kan cawnpiak. Cu caah fa le nih nu le pa hna lungtlin ter khawh cu abiapi ngaingai mi asi. Pa le nih hin fa le caah damnak, thawnnak, fimnak, thiamnak, rumnak le nawlngeihkhawhnak thluachuah hna hi duh piak dih cio asi. Volei thil kong ahcun Pa thawngtha pa le Pa santlailo deuh cu i dan taktak asi. Asi nain fa le thluachuah peknak ahcun Pa santlailo te zong i dannak a ngeih lo ti kha fa le nih theih a herh taktak. Hi tluk in fa le caah duhsaknak a ngeih tu pa le nih hin asangbik in an kan duhpiak mi cu, “fanu pafa hna nih Pathian bia ah kan nun ding” hi asi. Johan nih cun “ Ka fa le baitak chungah khua an sa timi nain a ka lawmhter deuhtu zeihman a um lo” tiah ati.

Pa le duhnak fa le cungah tling hram seh law pa le lawmhnak atling i an ngandam i an nun sau seh law tu le fa le khua le ram miphun hna caah thluachuah luannak sihram hna seh. Amen.

Comments

Popular posts from this blog

Zohchun Awktlak Khrihfa Innchungkhar

A Sunglawimi Thangthat Awktlak Thluachuak NU